Nog adres

Цæллати Вадим: «Æз Ирыстоны нæ дих кæнын Цæгат æмæ Хуссарыл»

18-æм марты Хуссар Ирыстонмæ æрцыд Республикæ Цæгат Ирыстон-Аланийы адæмон артист Цæллати Вадим. Киноконцертон зал «Чермен»-ы уыд фантастикон фильм «Мафия»-йы премьерон равдыст, цыран зынгæ ирон актер Цæллати Вадим ахъазыд сæйраг ролы. Фæлæ уал уый размæ дзыллон-информацийы фæрæзты минæвæрттæн ауагъта пресс-конференци, цыран лæмбынæг радзырдта йæ актерон куысты тыххæй.
— Дзурынц, зæгъгæ, фæстаг рæстæджы ды фылдæр хъазыс æппæрццаг ролты.
— О, афтæ дзурынц, фæлæ уый бынтон афтæ нæу. Æртæ азы размæ кинофильм «Интерны»-йы, дохтыр-анестезиологы ролы куы ахъазыдтæн, уый фæстæ æххæст кæнын æвæрццаг ролтæ. Афтæ ма, æввахс рæстæджы рацæудзæн кинофильм «Райский уголок», цыран хъаздзынæн æвæрццаг ролы. Фылдæр мæ зыдтой куыд æппæрццаг ролты хъазæг, афтæ, фæлæ уымæ нæ кæсгæйæ мæ киномæкæсджытæ базыдтой кинофильм «Диверсант, конец войны»-йы, æвдыст цыд Уæрæсейы 1-аг каналæй, цыран уыдтæн æвæрццаг ролы — денджызон флоты хъайтар.
— Ды ахъазыдтæ бирæ ролты, дæ зæрдæмæ дзы æввахсдæр кæцы у?
— Кæй зæгъын æй хъæуы, мæ зæрдæмæ тынг æввахс у мæ фыццаг проект «Антикиллер −2», уымæн æмæ фыццаг уымæй райдыдтон мæ актерон архайд. Уым ахъазыдтæн ахæм ролы, кæцы мæнæн у тынг зынаргъ, мæ зæрдæйæн ма æввахс сты æндæр ролтæ дæр: «Интерны»-йы — ирон дохтыр Дауыты роль, фæлæ мæ фылдæр базыдтой, кинофильм «Диверсант»-ы дыккаг рангы капитан Даурайы ролы куы ахъазыдтæн, уый фæстæ. Уымæй дарддар ма, мæнæн ахсджиаг у киноныв «Мафия: игра на выживание»-йы — Кириллы ролы хъазын, кæцымæ цыдтæн 15 азы æмæ абоны бон мæнæн у нысаниуæгджын, куыд кинойы сæйраг хъайтар, афтæ.
Хъазыдтæн уырыссаг, англисаг æмæ гуырдзиаг æвзæгтыл. Уæрæсейы уыдтæн зындгонд артистыл нымад, фæлæ мæ Ирыстоны зыдтой тынг цъусæй. Бирæтæ мæ базыдтой 2009 азы киноныв «Олимпиус Инферно»-йы куы ахъазыдтæн, уый фæстæ. Киноныв ист æрцыд цыбыр рæстæгмæ. Кæд Уæрæсейы аххосджын кодтой Ныгуылæйнаг дзыллон-информацийы фæрæзтæ, уæддæр киноныв «Олимпиус Инферно»-йы æнæхъæн дунейæн фенын кодтам сабыр, фынæй адæммæ гуырдзиæгтæ кæй æрбабырстой, уый. Ома, сабыр, чысыл республикæйæн, йæ бон кæцæй суыдаид Гуырдзыстонмæ бабырсын. Кинонывы æз ахъазыдтæн гуырдзиаг æфсæддон Вахойы ролы æмæ мæн бирæтæ æнхъæлдтой гуырдзиаг.
Ацы хæсты цаутыл киноныв исын хъæуы ирæттæн сæхи, хъуамæ дзы хъазой ирон актертæ, уымæн æмæ æрмæстдæр ирон равдисдзæн нæ адæмы тых, удварн æмæ сæрибардзинады сæрыл тох.
— Вадим ды Хуссар Ирыстонмæ æрластай дæ кинофильм «Мафия». Цæуыл у йæ мидис?
— Фильм «Мафия: игра на выживание» æз æрластон Гасситы Знауыры ’руаджы, йемæ æз базонгæ дæн æрæджы. Уый мын загъта, цæмæй хуссарирыстойнаг цæрджытæн равдисон ацы фильм. Кæй зæгъын æй хъæуы, æз сразы дæн, æмæ йын зæгъын стыр бузныг. Кинонывы хайад исынц актертæ: Андрей Чадов, Юри Чурсин, Вениамин Смехов, Наталья Рудова, Сергей Безруков æмæ æндæр зындгонд артисттæ. Кинофильм ист æрцыд мафияйы хъазты бындурыл, йемæ хорз зонгæ у æрыгон фæлтæр. Ацы кино у жанрон, хъазынц дзы иуæндæсæй. Уыдонæй ма хъуамæ баззайа иу адæймаг, уæлдай нæу мафийæ у, æви сабыр цæрæг, кæд уый рамбула, уæд ын лæвæрд æрцæудзæн стыр æхцайы приз, иннæ дæсы марынц нæ цæстыты раз. Кинойы кадртæ ист сты нæ царды хабæрттæй. Æнæхъæнæй киноныв у цымыдисон, уымæн æмæ у фантастикон.
— Дæ хъуыдымæ гæсгæ, нæ æрыгон фæсивæдæн гæнæн ис æмæ пропагандæ кæнæм агресси?
— Фильмы ис карз сценæтæ, фæлæ ирæттæн ацы кинонывы цы у ахсджиаг? Нæ фæсивæд ацы фильм куы феной, уæд сын фадат уыдзæн ацы проекты сæйраг ролы се ’мзæххон ’фсымæры фенынæн. Адæймаг куы куса, уæд йæ къухты бафтдзæн бирæ æвæрццаг фæстиуджытæ.
— Ды хъазыс æрмæст кинойы нæ, фæлæ ма театры дæр. Иууыл тынгдæр дæ цы ролы фæнды ахъазын?
Дунеон драматургийæ мæ зæрдæмæ тынгдæр цæуы ныгуылæйнаг драматурги. Тынг мæ фæнды ахъазын Шекспиры, афтæ ма Гамлет æмæ Отеллойы ролты. Фæнды мæ А. С. Пушкины трагеди «Борис Годунов»-ы трагедийы Лжедмитрийы ролы ахъазын. Афтæ ма мæ зæрдæмæ тынг цæуынц Брехты уацмыстæ.
Фæнды мæ банысан кæнын æмæ театры сценæйыл мæ уарзон роль кæй у, спектакль «Медея»-йы Ясоны роль. Куыд артист, афтæ æз сырæзтæн ацы ролы хъазгæйæ.
— Радзур-ма нын Голливуды тыххæй.
— Дыууæ азы размæ мæн фæхуыдтой Голливудмæ кинонывы ахъазынмæ, цыран æз ахъазыдтæн Калоты Виталийы ролы. Уый у адæймаджы драмон роль, у тыхджын æмæ арфæйаг адæймаг. Ацы историйы тыххæй зоны æгас дуне æмæ мæ фæндыд цымыдисон истори саразын. Кæй зæгъын æй хъæуы, ахсджиаг у Виталийы марæгæй нæ, фæлæ йæ арфæйаг адæймагæй равдисын.
— Абоны онг дæуæн ист ис 40 кинонывæй фылдæр, ис дын, цæмæ бæллыс, ахæм роль?
— Æцæгæйдæр, мæнæн ист ис 55 кинопроекты, фæлæ дзы нырма алкæцы арæзт не ’рцыд. Кириллы ролы ахъазын мæ фæнды, уый у æвæрццаг хъайтар. Мæнæн ацы хъайтар у иууыл ахсджиагдæр.
— Ирыстоны дын цахæм плæнттæ æмæ бæллицтæ ис?
— Фæнды мæ, цæмæй ам Ирыстоны ист æрцæуа киноныв, цæмæй нæ феной хуыздæры ’рдыгæй фарс, фæлæ уый тыххæй хъæуы уавæртæ æмæ стыр æхцайы фæрæзтæ. Махмæ ис тынг бирæ курдиатджын адæм. Мæнæн гæнæн куы уаид, уæд сисин киноныв «Фатимæ», фæнды мæ æгас адæм æй феной æмæ базонгæ уой ацы историон, аивадон кинонывимæ. Мæхæдæг дзы ахъазин Ибрагимы кæнæ Чермены ролы.
— Театр æмæ кинойæ дарддæр дæ царды нысан цы у?
— Цард у театр, цыран мах кæнæм хъазгæ æмæ нæ алкæмæндæр ис йæхи сæйраг роль, иутæ дзы хъазынц æргом зæрдæйæ, аннæ та — характеронæй..
— Вадим ды характерон актер дæ?
— Æз хъуыды кæнын — нæ. Характерон актер у ахæм актер, кæцы тынг æнцонтæй йæхиуыл бары алыхуызон характертæ. Мæ характер аразын хъайтармæ мæ ахастæй, ома æддейæ бакасгæйæ баззайын ахæм адæймагæй æмæ характерон адæймаг та æддаг бакастæй тынг ивы, бирæ хатт æй зонгæ дæр нæ бакæндзынæ.
— Ардæм æрцæугæйæ цахæмæй федтай Хуссар Ирыстоны?
— Хуссар Ирыстоны ис тынг зæрдæхæлар адæм. Фыццаг хатт Хуссар Ирыстонмæ куы ’рцыдтæн, уæд хорз ныв нæ федтон — уый уыд 2009 азы августы цауты фæстæ, уæд горæт уыд пырх. Ныр тынг цин кæнын цы позитивон ивындзиндтæ æрцыд, уыдоныл. Æз Ирыстоны Цæгат æмæ Хуссарыл нæ дих кæнын. Иууыл фылдæр дзы мæ зæрдæмæ цæуы хуссарирыстойнаг адæм мадæлон ирон æвзагыл кæй дзурынц, уый.
— Дæ фæндиæгтæ Хуссар Ирыстоны адæмæн.
— Фыццаг рады мæ фæнды ирон адæмæн фидар æнæниздзинад, физикон æмæ моралон тыхтæ. Уадз, Ирыстон дидинау æфтауæт, макуыуал фенæт хæст æмæ зындзинæдтæ. Хъуамæ алы ирон адæймаг дæр хъахъхъæна йæхи, æгæрыстæмæй, тамако дæр ма дыма, уымæн æмæ мах чысыл адæм стæм.
Уыцы бон пресс-конференцийы фæстæ изæры авд сахатыл киноконцертон зал «Чермен»-ы æвдыст æрцыд кинофильм «Мафия».
Цæллати Вадим райгуырд æмæ схъомыл Цæгат Ирыстоны Дыгуры. Скъола каст фæуыны фæстæ дыууæ азы ахуыр кодта Цæгат Ирыстоны Хъæууон-хæрдзарадон университеты ветеринарон факультеты. Киномотограф суыдаид, ууыл никуы хъуыды кодта, фæлæ рауад афтæ æмæ йæ цард сбаста актеры дæсныйадимæ. 2002 азы кацис фæцис горæт Мæскуыйы Щукины номыл театралон ахуыргæнæндон. Уый фæстæ кусын райдыдта Таганкæйы театры.