Nog adres

Историон документы сырæзтæй рацыд иу афæдз

Иу афæдз рацыд, Республикæ Хуссар Ирыстон æмæ Уæрæсейы Федерацийы 'хсæн историон нысаниуæджы документ арæзт куы æрцыд, уымæй. 2015 азы 18 марты Республикæ Хуссар Ирыстоны Президент Тыбылты Леонид æмæ Уæрæсейы Федерацийы Президент Владимир Путин сæ къухтæ æрфыстой дыууæ бæстæйы 'хсæн Æмцæдисад æмæ интеграцийы тыххæй бадзырдыл. Ирон адæм куыд Цæгаты, афтæ Хуссары дæр æнусты дæргъы Стыр Уæрæсейы адæмимæ хæларæй цæрынц, рагæй сын уыдис æнгом, хæларадон ахастытæ, æмæ уыцы ахастытæй тынг буц уыдысты.
Фыццаг ирон минæварад Санкт-Петербургмæ æрцыд æмæ йæ дипломатон мисси æх-хæст кодта XVII-æм æнусы æмбисы. Ирон лæг йæхицæн кадыл нымадта Уæрæсейы æфсады службæ кæнын, Уæрæсейы сæрыл тохты активон хайад исын. Цыфæнды тохты, цыфæнды æндыгъд уавæрты дæр ирон адæймаг кæддæриддæр хъахъхъæдта Уæрæсейы интересты.

Фæлæ иу азы размæ цы историон Бадзырд арæзт æрцыд, уый ноджыдæр бафидар кодта уыцы ахастыты ныры дуджы актуалондзинад. Ацы Бадзырдæй дыууæ хæларадон паддзаха-дæй алкæйы раз дæр æвæрд æрцыд кæрæдзимæ ахасты стырдæр бæрндзинад. Мах та æххæст кæнæм, нæ фыдæлты раз нын цы бæрндзинад ис, уый, кæцытæ аскъуыддзаг кодтой æнустæм Уæрæсеимæ уæвын.
Кæд Уæрæсейы æххуысæй фервæзтыстæм скуынæгæй 2008 азы августы æмæ нæ хæд-бардзинад дæр Уæрæсейы Федерацийы æмæ уый фæстæ та ноджы æндæр паддзахадты æр-дыгæй нымад æрцыд, уæддæр нæ адæм сæ мидзæрдæйы катай кодтой, зæгъгæ, Уæрæсейы уæды къухдариуæгад куынæуал кусой, уæд нæ республикæйы хъысмæт куыд уыдзæн, ууыл. Фæлæ Бадзырд 25 азмæ арæзт æрцыд, æмæ хорз у, адарддæргæнæн ын кæй ис дæсгай азтæ. Абон Ныгуылæны бæстæтæ рацыдысты Уæрæсейы Федерацийы ныхмæ, йæ ныхмæ йын аразынц алыгъуызон санкцитæ, фæлæ нæ паддзахадты 'хсæн ахастытæ æнгомæй æнгомдæр кæнынц. Мах уыдыстæм, стæм æмæ дарддæр дæр уыдзыстæм хæларадон, цæдисон, æфсымæрон бæстæтæ.
Бадзырды нысан у, нæ адæмы царды æмвæзад фæхуыздæр кæнын, сабырад æмæ æдасдзинад хъахъхъæнын. Уый ма гаранти дæтты социалон уавæртæ фæхуыздæр, стæй царды æндæр къабæзтæ райтынг кæнынæн дæр.
Бадзырды фæлгæтты рæзынц интеграцион бастдзинæдтæ хъахъхъæнынады фадыджы, æдасдзинады иумæйаг тыгъдад аразыны хъуыддаджы, барадон системæйы. Арæзт æрцыдысты æмæ дарддæр дæр арæзт цæуынц дыууæ паддзахады министрадтæ æмæ ведомствоты 'хсæн уæлæмхас сразыдзинæдтæ, кæцытæ Хуссар Ирыстоны æмбæстæгтæн дæттынц дыууæ бæстæйы территорийыл дæр сæхи максималонæй æдасæй, сæрибарæй хатынæн. Ацы сразыдзинæдтæ здæхт сты Хуссар Ирыстоны царды уавæртæ æмæ гъæд фæхуыздæр кæнынмæ.
Мæскуыйы арæзт æрцыд меморандум Республикæ Хуссар Ирыстоны Фæсивæдон политикæ, спорт æмæ туризмы фæдыл комитет æмæ Уæрæсейы Федерацийы Ростуризмы 'хсæн 2016-2019 азтæн. Ацы меморандум фæахъаз уыдзæн нæ бæстæйы туризмы рæзтæн, спорт æмæ туризмы квалификациджын кадрты цæттæ кæнынæн, афтæ ма баххуыс уыдзæн ацы фадгуытæм инвесторты æрбакæнынæн.
Ныры æндыгъд дуджы адæймагæн иууыл ахсджиагдæр æдасдзинад у. Бадзырд хъахъ-хъæнынадон къабазы æмархайдæн бæлвырд кæны уæрæх фæлгæттæ. Сæйраг у уый, æмæ арæзт цæуы иууон хъахъхъæнынадон тыгъдад, æдасдзинады иууон тыгъдад. Нырæй фæстæмæ Хуссар Ирыстоны арæнтæм фæныхилын Уæрæсе нымайы, куыд йæхи арæнтæм фæныхилын æмæ хатдзæгтæ дæр уымæ гæсгæ араздзæн. Паддзахадон арæн хъахъ-хъæныны фæтк дырысæй æвдыст æрцыд Бадзырды.
Бадзырды уæлæмхас сразыдзинæдты фæлгæтты Хуссар Ирыстоны Хъахъхъæнынады министрады службæгæнджытæ æмбæлон медицинон æххуыс исдзысты Уæрæсейы Федерацийы медицинон уагдæтты.
Уæрæсе нын æххуыс кодта æмæ дарддæр дæр æххуыс кæны социалон фарстаты хъуыддаджы дæр. Ацы Бадзырды фæлгæтты куыст цæуы, цæмæй фæфылдæр уой пенситæ, фæфылдæр уой бюджетон организациты мыздтæ, арæзт æрцæуой медицинон фæдзæхстытæ, Уæрæсейы клиникæты не 'мбæстæгтæн медицинон æххуыс бакæныны тыххæй.
Мæскуы иу бонмæ нæ сырæзт, цыбыр рæстæгмæ бадзырд фæстиуджытæ нæ рат-дзæн. Уæлæмхас сразыдзинæдтыл дæр къухтæ фыст куы æрцæуой, уыдон та сты 12 бæрц, уый фæстæ дæр рæстæг хъæуы, цæмæй Хуссар Ирыстон æмæ Уæрæсейы 'хсæн Æмцæдисад æмæ интеграцийы тыххæй бадзырд скуса æххæст хъомысадæй. Ацы хъуыддаг та æр-цæудзæн æвæстиатæй æмæ йæм æнæрхъæцæй æнхъæлмæ кæсæм.
ОСИАТЫ И.