Nog adres

ÆРЫГОН СПОРТСМЕНКÆЙЫ РАДОН ÆНТЫСТ

Цалдæр боны дæргъы РХИ-йы прессæ æмæ интернеты информацион сайтты фæрстыл хъуысы цхинвайлаг æрыгон спротсменты æнтыстыты тыххæй. Уыдон сты РХИ-йы сывæллæттæ æмæ æвзæнгты скъолайы кекусин - каны каратэйы хуызæй тренер Созайты Владимиры хъомылгæнинæгтæ Семен Ливерко, Дудайты Донна æмæ Гаглойты Дианæ.
13 æм марты горæт Ставраполы уагъд цыд турнир «Кубок восходящей звезды», уым Созайты Владимиры хъомыл-гæнинæгтæ хайад райстой 10-11 азы кары категорийы. Семен Ливерко ар-хайдта 30 кг уæзы категорийы æмæ æртæ тохы рамбулыны фæстæ ссис уæлахиздзау. Дыккаг сызгъæрин майданы хицау ссис Дудайты Донна. Уый архайдта 35 кг уæзы категорийы æмæ рамбылтта йæ ныхмæлæуджыты æртæйæ. 40 кг уæзы категорийы архайдта Гаглойты Дианæ. Йæ ныхмæлæуджытæй иу разынд арæхстджындæр, фембылд ын æрмæстдæр иу хатт æмæ ссис æвзист майданы хицау. Афтæмæй æрыгон спортсментæ Ирыстонмæ æрхастой дыууæ сыгъзæрин æмæ иу æвзист майдан. Дудайты Донна ма æрхаста турниры сæйраг приз «Кубок восходящей звезды»-йы кубок дæр.

«Тынг райгондæй баззадтæн мæ хъомылгæнинæгты æнтыстытæй. Цæгат Кавказы каратейы кекусин-каны хуызы спортыл ис тынг хорз куыст, спортсмен-тæн сæ цæттæдзинад ис бæрзонд æм-вæзадыл æмæ уыдоны ʻхсæн мæ хъомылгæнинæгты ахæм уæлахиз махæн у стыр æнтыст. Мæ хъомылгæнинæгтæ ма хорз спортивон бацæттæдзинады æм-рæнхъ равдыстой фидар спортивон ха-рактер», - загъта Созайты Владимир.
Ацы æнтыст нæ уыд фыццаг æнтыст Дудайты Доннайæн. Донна кекусин-ка-нæй цæттæ кæны æрмæстдæр иу афæдз, фæлæ ныридæгæн равдыста тырнындзинад, фидар æмæ ныфсхаст характер, спорты та ацы миниуджытæ вæййынц сæйрагдæр.
2015 азы Донна фыццаг хатт хайад райста Дзæуджыхъæуы уагъдцæуæг «Игры боевых действий»-ы VI турниры. 30 кг уæзы категорийы цыппар хатты татамимæ рахизгæйæ цыппар хатты дæр рамбылдта йæ ныхмæлæуджыты æмæ ссис 1-аг бынаты уæлахиздзау. Уыцы аз, сентябры мæйы Владимиры хъомылгæнинæгтæ хуынд æрцыдысты спротивон фестиваль «Мирный Кавказ»- ы хайад райсынмæ. Турниры хайад райстой 12 азæй 18 азы кары онг спортсментæ. Дудайты чызг уым фембылд ис æрмæстдæр иу тохы æмæ ссис дыккаг бынаты призер. Ацы турниры хатдзæгтæм гæсгæ ма Донна рамбылдта путевкæ Уæрæсейы тыхджындæр ерыстæм горæт Сочимæ. Донна уым райста хайад æмæ ахызт финалмæ. Фæлæ хъыгагæн, финалы йæ ныхмæлæууæг разынд фидардæр æмæ Донна ссис цыппæрæм бынаты хицау.
Ацы аз та февралы мæйы Донна хайад раста Хуссар Ирыстоны æрыгон каратистты 'хсæн ерысты æмæ рамбылдта фыццаг бынат æмæ йын лæвæрд æрцыд спорты фадыджы II-аг къæпхæн.
Йæ радон æнтыст Донна æрхаста 13 марты горæт Ставраполæй.
11 - аздзыд æрыгон спортсменкæ кæд тынг цъус рæстæг цæттæ кæны спор-тæй, уæддæр ныридæгæн бæрæг у, кæй йæм ис тырнындзинад спорты бæрзæндтæм, уый бæрæг у йе 'нтыстытæй дæр. Кæцыфæнды ныййарæгæн дæр йæ сæйраг мæт у йæ хъæбулты æнтыст æмæ Доннайы ныййарджытæн дæр сæ зæрдæтæ рухс кæнынц сæ хъæбулы æнтыстытæй:
«Донна йæ чысылæй фæстæмæ уыд æнкъард, æфсæрмдзæстыг саби, æз хъуыды дæр никуы акодтаин æмæ, уый искуы афтæ суæндон уыдаид. Тынг арæхсти ныв кæнынмæ æмæ йæ уымæ гæсгæ бакодтон Цхинвалы аивадон скъоламæ. Фæлæ афтæ æнæуæндаг кæй уыд, уый тыххæй мæ бафæндыд спортмæ дæр æй бакæнын. Равзæрстам каратэ æмæ мæнмæ гæсгæ нæ фæрæдыдыстæм»- зæгъы спортсменкæйы мад Уазæгты Марфа.
«Кæдфæнды дæр мæн ныфс ис, Донна татамимæ рахизгæйæ кæй барухс кæндзæн нæ зæрдæтæ æмæ Ирыстоны спорты кад кæй исдзæн бæрзонд»- стыр ныфсимæ йæ хъуыды раргом кодта тренер Созайты Владимир.
Махæн дæр нæ зæрдæ зæгъы æрыгон спортсменкæйæн дарддæр дæр фидар æнтыстытæ. Донна, дæ номæй сæрыстыр уæд Ирыстон æмæ дын бантысæд ирон тырыса Олимпаг хъæзтытæй уæлахизимæ æрхæссын.
ХУЫГАТЫ М.