Nog adres

Лæджымсæр сылгоймаг

Сылгоймаг æрмæст царддæттæг æмæ хæдзарон æфсин нæу. Цыдæриддæр царды хорзæй ис, уыцы хæрзиуджытæ иууылдæр баст сты сылгоймагимæ. Ныры дуджы сылгоймаг бæрзонд социалон къæпхæнмæ схызт, у æхсæнады авторитет, арæхдæр та - фидауынгæнæг, йæ бон бавæййы æвæрд нысæнттæ сæххæст кæнын вазыгджын æмæ ныхмæвæрд уавæрты.
Махмæ дæр ис бирæ ахæм сылгоймæгтæ, сты лæджымсæр, ацы уæззау дуджы, политикон-æхсæнадон процессты истой хайад æппæтварсонæй: зонадон кусджытæ, ахуыргæнджытæ, лæггад кæныны фадыджы кусджытæ, базаргæнджытæ, хæдзарон æф-синтæ, паддзахадон æмæ хицауадон органты кусджытæ. Уæлдай нæу, кæмфæнды кус, æрмæст кадимæ хæссын фæраз дæ ном, стъалыйы уысмæн ферттывдау ма у.
Иу ахæм фæрнджын сылгоймаджы тыххæй у абон мæ уац. Икъаты Мадинæ, Полиграфион-кондадон баиугæнды сæргълæууæг, Хуссар Ирыстоны Парламенты 4-æм æрсидты депутат.

Кæд сылгоймагæн хи артдзæст, хъæбултæ, бинонтæ, хæдзарон куыстытæ сæйрагдæр сты, уæддæр хатт рауайы афтæ, царды уылæнтæ йæ ахæссынц æмæ свæййы политик æмæ разамонæг, гъе та стыр амалиуæггæнæг, хайад райсы социалон-экономикон æмæ политикон къабазы.
Ахæм фæндвидар æмæ аккаг уды хицау у Икъаты Мадинæ Владимиры чызг дæр. Икъаты Мадинæ ныртæккæ кусы Полиграфион-кондадон баиугæнды сæргълæууæгæй. Уый куыд рæхсы, афтæ нæ сарæхсдзæн алы нæлгоймаг.
«Скъолайы ма ахуыр кодтон, афтæмæй-иу мæ фыд, зынгæ ирон поэт, Икъаты Владимиримæ арæх ссыдтæн Полиграфион кондадмæ. Мæ зæрдæ-мæ тынг фæцыд ацы куысты, стыр цымыдисимæ-иу мæ хъус дардтон, чиныг куыд мыхуыр цæуы, уымæ. Фæлæ, æз чысылæй фæстæмæ сфæнд кодтон музыкант суæвын. Ахуыр кодтон музыкалон скъолайы, арæх-иу зарыдтæн, канд хæдзары бинонты 'хсæн нæ, фæлæ, музыкалон скъола цы концерттæ лæвæрдта, уым. Зарыдтæн, мæ фыды æмдзæвгæтыл мæхæдæг цы музыкæ ныффыстон, уыцы зарджытæ. Мæ зæрды уыд скъолайы фæстæ уæлдæр музыкалон ахуыргæнæндонмæ бацæуын. Фæлæ мын мæ куырыхон фыд загъта, цæмæй æндæр професи равзарон. Музыкæ та, дам, цæрæнбонтæм уыдзæнис демæ. Мæ фыды фарнæй мæм уыд цыдæртæ æмæ сфæнд кодтон полиграфийы дæсныйад равзарын. Мæ фыд мæ йæхæдæг акодта Мæскуымæ. Фæлварæнтæ æнтыстджынæй радтон. Ахуыры рæстæджы тырныдтон, цæмæй мæ дæсныйады хаххыл райсон æппæт зонындзинæдтæ дæр. Ахуыр фæдæн æмæ райстон полиграфион кондады экономикæ æмæ организацийы дæсныйад. Райдианы Полиграфион кондады баиугæнды куыстон диспетчерæй, уый фæстæ та кондады хайады хистæрæй. Ныр 16 азы дæргъы та кусын Поли-графионкондады директорæй. Мæ бон цы у, уымæй архайын куыст афтæ сæвæрын, цæмæй, кондад нырыккон домæнтæн дзуапп дæтта. Стæй та ам цы коллектив кусы, уыдонæн рухс кæна сæ куыстæй сæ зæрдæ, сæ бинонты дарынхъом куыд уой», - зæгъы Икъаты Мадинæ.
Æмæ, æцæгæйдæр, Икъаты Мадинæйы разамынды рæстæджы типограф схызт гъæдджын куысты уæлдæр æмвæзадмæ. Абоны бон Полиграфион кондад у нæ республикæйы æфтиагджындæр кондадтæй сæ иу. Æмæ уым, Мадинæйы архайдæн ис егъау нысаниуæг. Æмæ, канд, хорз къухдариуæггæнæг нæу, Икъаты Мадинæ, уый ма у хорз политик дæр, уыд Парламенты 4-æм æрсидты депутат. «Кæд æмæ сылгоймагæн Хуыцауæй лæвæрд ис ахæм миниуджытæ, куыд бæрндзинад, фæлмæндзинад, нысанмæздæхтдзинад, цæсгомджындзинад, уæд йæ бон у æмæ тырна лидеры бынатмæ. Мах дуджы æхсæнады ис тынг бирæ зондджын, ахуыр сылгоймæгтæ, сæ бон у раст, фæлмæнæй баныхас кæнын алкæимæ дæр æмæ алцæйы тыххæй дæр. Сылгоймагæн йæ удыхъæд фæлмæндæр у, уый æнцондæрæй сахуыр вæййы ног домæнтыл, царды ногдзинæдтыл. Сылгоймаджы зæрдæйы фылдæр уарзондзинад ис, фылдæр æнкъарынад, фылдæр фæлмæндзинад - уыцы миниуджытæй се ‘ппæтæй дæр хайджын у Мадинæ, æмæ йын Хуыцау ноджыдæр радтæд æнæниздзинад æмæ бинонты амонд. Æвæццæгæн, мады инстинкт, наци цы тасы бын уыд, хотыхджын конфликт æмæ æхсæнадон психологон социалон-экономикон фадыджы цы уæззау уавæр сæвзæрд, уыдон радтой сылгоймагæн бар, цæмæй суа активондæр, хæдбардæр. Абон бирæ сылгоймæгтæ ис Хицауады, кондадты, уагдæтты сæргъ, бæрнон бынæтты. Сылгоймæгтæ аразынц реабилитацигæнæн центртæ, æнæпаддзахадон организацитæ. Уымæ гæсгæ сылгоймæгты хайадист фидауынгæнæн процессы у асхджиаг. Уыдонæн сæрибарæй сæ бон у хайад исын æхсæнпаддзахадон дискусситы, бадзырдон процесты, конференциты, тымбыл фынгты, дунеон æмвæзадыл сæ адæмы бартыл дзурынхъом сты. Гъе, уыдонæй иу у, Икъаты Мадинæ дæр.
Нæ зынаргъ Мадинæ! Дæ миддуне æххæст у сылгоймаджы хуыздæр æууæлтæй. Хорз къухдариуæггæнæг, æппæтфарсонæй цæттæ адæймаг уæвгæйæ, дæ фæлмæнзæрдæ, хуымæтæг, æмæ уадз, Ирыстоны дæхуызæн фæрныг сылгоймæгтæ фылдæр уæд.
УАЗÆГТЫ Марфа