Nog adres

Мидхъуыддæгты министрад хатдзæгтæ сарæзта аивгъуыйгæ азæн

РХИ-йы Мидхъуыддæгты министрад рауæрхгонд æмбырды фехъусын кодта 2015 азы йæ оперативон-службæйон архайды хатдзæгты тыххæй. Сæрдариуæг ын кодта РХИ-йы Мидхъуыддæгты министр Лæууойты Æхсар. Æмбырды хайад райстой Мидхъуыддæгты министры хæдивджытæ, министрады службæты къухдариуæггæнджытæ, районты дæлхæйтты хистæртæ, пресс-службæйы минæвæрттæ.
Йæ раныхасы Мидхъуыддæгты министр Лæууойты Æхсар банысан кодта уыцы факт, зæгъгæ, 2015 азы республикæйы оперативон уавæр уыд стабилон, контроль ыл кодтой мидхъуыддæгты органтæ.
РХИ-йы Мидхъуыддæгты министрад йæ куыст арæзта Республикæ Хуссар Ирыстоны Конституцийы бындурыл, РХИ-йы Хицауады уынаффæты, Парламенты райсгæ закъондæттынадон актты, райсгæ уæрæсейаг закъондæттынады бындурыл, РХИ-йы Мидхъуыддæгты министрады нормативон акттыл, оперативон æмбырдты райсгæ уынаффæтыл. Фыццаг рады ведомствойы æппæт куыст здæхт уыд æмбæстæгты закъонон интерестæ бахъахъхъæнын, фыдракæндтæ ма æруадзын æмæ сæ раргом кæнынмæ.
Аивгъуыйгæ азы РХИ-йы Мидхъуыддæгты министрады æппæт цæгтæн, æппæт структурон дæлхæйттæн уыд æндыгъд куысты аз. Хыгъдон рæстæджы Республикæ Хуссар Ирыстоны территорийыл службæты æппæт здæхтыты срегистрацигонд фыдракæндты иумиаг нымæц уыд 165 (2014 азы хатдзæгтæм гæсгæ та — 222), уыдонæй 130 раргом æрцыдысты.
2015 азы фыдракæндты раргомдзинад уыд 78,7% (2014 азы 72,5%). 2014 азимæ абаргæйæ, аивгъуыйгæ азы фыдракæндты нымæц фæкъаддæр 57 фыдракæнды, проценттæм гæсгæ та — 25,6%. Уголовон фæдагуырды хаххы фæдыл регистраци æрцыд 118 фыдракæнды (2014 азы та — 196), уыдонæй раргом æрцыдысты 85 фыдракæнды (2014 азы та — 138). Афтæмæй фыдракæндты раргомдзинад уыд 72,0% (2014 азы — 70,4%), кæнæ фыдракæндты раргомдзинады хицæндзинад у 39,7%. Уæззау фыдракæндты фæдыл регистраци æрцыд 75 фыдракæнды (2014 азы — 98), уыдонæй раргом æрцыд 44 (2014 азы — 54). Уымæ гæсгæ фыдракæндты раргомдзинад уыд 58,6% (2014 азы — 55,1%), кæнæ фыдракæндты раргомдзинады хицæндзинад у 23,4%.
Фыдракæндты къаддæр кæныны иумиаг æвæрццаг динамикæмæ нæ кæсгæйæ, æнæмæнгхъæуæг у республикæйы мидхъуыддæгты органты потенциал ноджы уæлдай æххæст гуырахсты реализаци кæнын.
Ивгъуыд азы аналогон рæстæгимæ абаргæйæ, стабилон æмвæзадыл сты ахæм фыдракæндты фæдыл раргомдзинад, куыд искæйы амарын бафæлварын, тыхми бакæнын, хæцæнгарз давын кæнæ йæ тыхæй исын, паддзахадон арæныл ахизыны цаутæ æмæ æндæртæ.
2015 азы фæкъаддæр сты ахæм фыдракæндтæ, куыд искæй амарын, стигъын, давын, фæлывдмитæ, æхсæнадон æгъдау халын, мæлæты цаутимæ автоаваритæ, автотранспорт атæрын, хицауады минæвары ахасты тыхæй спайда кæнын, æнæзакъонæй наркотиктæ зилын, æнæзакъонæй хæцæнгарз амал кæнын æмæ йæ æфснайын, æнæмæт ахаст дарын æмæ æндæр фыдракæндтæ.
Службæйон архайды хатдзæгтæм гæсгæ, министр банысан кодта 2015 азы криминалон милицийы, мидхъуыддæгты горæты управленийы, оперативон-фæдагурæн хайы куысты хатдзæгтæ хуыздæр кæй уыдысты, уый.
Æмбырды уæлдай хъусдард здæхт æрцыд фæндагон змæлды æдасдзинад сифтонг кæныны проблемæмæ. 2015 азы бæрæг æрцыд 479 шофыры машинæ нозтджынæй кæй скъæрдтой, уый.
2015 азы регулярон æгъдауæй уагъд цыдысты рейдтæ горæты æмæ республикæйы фæндæгтыл. Фæндагон змæлды фæтк халджыты ныхмæ ист цыд административон æфхæрд ивары хуызы. Ист цыдысты æппæт мадзæлттæ дæр фæндагон змæлды æдасдзинады паддзахадон инспекцийы цæугæ постты ’рдыгæй контроль фæтыхджындæр кæныны фæдыл. Афтæ ма РХИ-йы Парламент республикæйы закъондæттынадмæ бахста ивындзинæдтæ фæндагон змæлды уагæвæрд халджыты ахасты æфхæрд фæкарздæр кæныны тыххæй.
2014 азимæ абаргæйæ 2015 азы фæхуыздæр сты æнæзакъонæй хæцæнгарз амал кæныны цаутæ сбæрæг кæныны, цæрджытæй йæ райсыны, афтæ ма барвæндæй йæ радтыны фактты фæдыл бæрæггæнæнтæ дæр.
Хыгъдон рæстæджы урæд æрцыдысты 12 адæймаджы раздæр саразгæ фыдракæндты тыххæй. Куыд ивгъуыд аз, афтæ стабилонæй, 100% раргомдзинадæй баззадысты уыцы фыдракæндтæ, кæцытæ баст уыдысты æнæзакъонæй наркотиктæ зилыны регистрацигонд 10 фыдракæнды рæстæджы. Æнæ дохтыры снысанæй наркотикон фæрæзтæй, психотропон буарадтæй пайда кæныны тыххæй административон бæрндзинадмæ конд æрцыдысты 42 адæймаджы (2014 азы та — 63).
2015 азы Республикæ Хуссар Ирыстоны регистраци æрцыд 5 фыдракæнды æнæзакъонæй хæцæнгæрзтæ æмæ хæстон æрмæджытæ амал кæнын æмæ æфснайыны тыххæй. Уыдонæй 4 раргом æрцыдысты.
Ивгъуыд аз экономикон фыдракæндты ныхмæ тох кæныны дæлхæйттæ сбæрæг кодтой 5 фыдракæнды (2014 азы — 26), уыдонæй дыууæ раргом æрцыдысты (2014 азы — 23). Фыдракæндты раргомдзинад у 40% (2014 азы 88,4%).
Министр бахæс кодта ацы дæлхайы къухдариуæггæнджытæн, цæмæй 2016 азы фæактивондæр кæной сæ архайд ацы категорийы фыдракæндтæ раргом кæныны фæдыл.
Фыдракæндты раргом кæнын æмæ раиртасыны фæдыл зæгъæн ис, зæгъгæ, 2015 азы баконд æрцыд 97 уголовон хъуыддаджы (2014 азы — 132). Æдæппæтæй кæронмæ раиртæст æрцыдысты 53 уголовон хъуыддаджы (2014 азы — 73), æрурæдтой 48 уголовон хъуыддаджы (2014 азы — 57).
Министр банысан кодта Мидхъуыддæгты министрады пресс-службæйы продуктивон куыст мидхъуыддæгты министрады куыст иумиагæй прессæйы æмæ интернет-сайттыл равдисыны, æндæр информацион агентадтимæ æмархайды тыххæй.
Иумиагæй, 2015 азы РХИ-йы Мидхъуыддæгты министрады куыст нымад æрцыд рæстæмбисыл. Цухдзинæдты тыххæй лæвæрд æрцыдысты æмбæлон бацамындтæ.
2016 азы 20-æм февралы РХИ-йы Президент Тыбылты Леонид Республикæ Хуссар Ирыстоны адæммæ æмæ Парламентмæ цы Ныстуан сарæзта, уым 2016 азы оперативон-службæйон архайды приоритетон здæхтытæй бæрæг æрцыдысты фыдракæндты профилактикæ, фæндагон змæлды æдасдзинад, наркоманийы ныхмæ тох, криминалон милицийы куыст, сывæллæтты æмæ æнахъомты фыдракæнддзинад.
РХИ-йы Мидхъуыддæгты министрады пресс-службæ