Nog adres

Хъуылымбегты Доменти: «Паддзахадон исадæй пайда кæныны хъуыддаджы хъæуынц æндæргъуызон амæлттæ»

domenti.png

Дарддæр уагъд цæуынц Хицауады Сæрдар Хъуылымбегты Доментийы фембæлдтытæ министрадтæ æмæ ведомствоты къухдариуæггæнджытимæ семæ æмархайды æмæ куысты гъæд фæбæрзонддæр кæныны нысанæн.
Ацы хатт та уый фембæлд Паддзахадон исад æмæ зæххы фæдыл ахастыты комитеты (дарддæр Комитет) сæргълæууæг Пæррæстаты Сергейимæ.

Дзырд цыд, раздæр ацы къабазы хъуыддæгты уавæр æмæ разамынадон амæлтты тыххæй хицауадон рабадтыты рæгъмæ кæй рахастæуыд, иу цалдæр ахæм фарсты фæдыл. Фембæлды хайад райста Хицауады Сæрдары хæдивæг Тъехты Алан.
Хъуылымбегты Доменти йæ ныхасы райдианы банысан кодта, зæгъгæ, паддзахадон исадæй пайда кæныны фадыджы проблемæтæ раджы фæзынд æмæ сæ æвæстиатæй хъæуы аскъуыддзаг кæнын.
Куыд зонæм, афтæмæй 2012 азы республикæйы къухдариуæгады раз æрæвæрдæуыд паддзахадон исады реестр сног кæныны æмæ Комитеты куыст оптимизаци скæныны хæс.
«Паддзахадмæ ис зæххы фæсауæрцтæ, бæстыхæйттæ, æндæр исад, кæцытæй хъуамæ пайда цæуа ахадгæдæрæй. Уый тыххæй та хъæуы ивын нормативон-барадон базæ, стæй паддзахадон исадæн разамынад кæныны амæлттæ дæр», — загъта Хъуылымбегты Доменти.
Пæррæстаты Сергей радзырдта, саразын сын цы бантыст, æмæ Комитет йæ куысты цы зындзинæдтыл æмбæлы, уый тыххæй.
«Бæлвырд куыст баконд æрцыд, æнæхицау объекттæ кæй хонæм, уыдон сбæрæг кæныны æмæ сæ нормативон æгъдауæй ныффыссыны сæраппонд. Уыдон сты горæт Цхинвалы æмæ районты дæр. 2015 азы зонæнтæм гæсгæ Комитеты реестры бахынцыд æрцыд 1205 бæстыхайы. Æрвылаз дæр мах регистраци кæнæм 35 объекты, уыцы нымæцы эксплуатацимæ æрæджы кæй радтой, ахæмтæ дæр. Фæлæ нырма куыстæн йæ кæрон дæр нæ зыны», — бафиппайдта уый.
Комитеты къухдариуæггæнæг фехъусын кодта, зæгъгæ, паддзахадон исады фæдыл цæуы гуырахстджын сгарæн куыст, республикæйы районтæм арæх цæуынц инспекцитæ, æмæ дзы арæх ссардæуы бирæ æнæхынцыд объекттæ, бæстыхæйтты арендæйы радтыны æмæ зæххы фадгуытæй раст пайда кæнынимæ баст фæткхалæнтæ.
Зæгъæм, Контролон-нымайæн палатæ Ленингоры районмæ ацæугæйæ, рафæлгъуыдта, паддзахадон исады цы 202 объекты ис, уыдонæй 180 æнæбахынцыд кæй уыдысты. Уыцы хъуыддаг хауы зæххы фадгуытæй нысанмæздæхтæй пайда кæнынмæ дæр.
Пæррæстаты Сергейы ныхæстæм гæсгæ, æдæппæтæй хъæууонхæдзарадон зæххытæ: хуымгæндтæ, сæрвæттæ, уыгæрдæнтæ сты 127 678 гектары. Уыдонæй ныртæккæ арендæйы лæвæрд ис 1270 гектары. Республикæйы æппæт районты дæр бафиппайдæуыд зæххытæй æнæнысанмæздæхтæй пайда кæныны цаутæ, кæнæ та сæ бынтондæр ничи пайда кæны.
Тъехты Алан банысан кодта, зæгъгæ, æппæт фæткахæлæнтæ дæр хынцыд æрцæудзысты æмæ сæм æркастæуы-дзæн æмбæлон инстанциты.
Пæррæстаты Сергейы ныхæстæм гæсгæ, ис бæлвырд размæцыд. Хицауады исад æнæркастæй сфыссыны цаутæн счындæуыд кæрон. «Ныр ацы процесс цæуы махыл. Паддзахадон исад хынцыны руаджы æрмæст 2015 азы мах æфтиаг райстам 704 мин сомы.
Махмæ ис цæттæ фæндæттæ, æмæ нæ фæнды Хицауады рабадтмæ сæ рахæссын. Уыдон баст сты паддзахадон исадæн разамынады оптимизаци сифтонг кæныны нормативон-барадон базæ фæивынимæ», — загъта уый.
Комитеты куысты проблемон фарстытæй иу у, республикæйы районты администрацитæ Комитеты бацамындтытæ лæмæгъæй кæй æххæст кæнынц, уый. Уыдоныл æвæрд у æнæхынцыд объекттæ æмæ хъæууон хæдзарадæн бæззон зæххытæ, арендон бадзырдтæ ревизи кæныны хæс.
Фембæлды кæронбæттæны Хъуылымбегты Доменти ныфс бавæрдта, Комитеты цавæрфæнды фæндæттæм дæр байхъусынæй æмæ паддзахадон исадæн разамынады системæйы куыст фæхуыздæр кæнынæн æппæт амæлт-тæй дæр æххуыс бакæнынæй.
«Паддзахадон зæххытæй пайда кæныны, арендон ахастытæ, разамынадон амæлтты ахадындзинад куы фæфылдæр уа, уæд уый ратдзæн паддзахадон бюджеты æфтиагджын хай фæфылдæр кæныны фадат. Уый та нысан кæны, махæн нæ бон кæй бауыдзæн фылдæр социалон проекттæ сæххæст кæнын, республикæйы хъуагæййафæг æмбæстæгтæн баххуыс кæнын».
РХИ-йы Президент æмæ Хицауады пресс-службæ