Nog adres

Аудынц сывæллæтты æнæниздзинадыл

DSCN3724.JPG

Хуссар Ирыстоны цæрджыты æнæниздзинад хъахъхъæнын у нæ республикæйы къухдариуæгады архайды приоритетон здæхтытæй сæ иу. Хус-сарирыстойнаг сæдæгай цæрæджы квотæтæм гæсгæ æрвыст цæуынц Уæрæсейы хуыздæр клиникæтæм, кæцытæн объективон аххосæгтæм гæсгæ схосгæнæн нæ вæййы бынаты.

Уæлдай хъусдард здæхт цæуы сабиты æнæниздзинадмæ, уымæн æмæ рæзгæ фæлтæр алы бæстæйæн дæр сты йæ фидæн. Сывæллæттæн хос кæныны æнтыстдзинад баст у æрмæст дохтыры профессионалондзинадимæ нæ, фæлæ сабитимæ иумиаг æвзаг куыд ссарынц, уыимæ дæр. Хъуамæ сын бауырнын кæной позитивон эмоцитæ, дохтыр сын йæхи хъуамæ бауарзын кæна. Ацы принципыл хæст сты Цхинвалы сывæллæтты поликлиникæйы кусджытæ, уагдоны сæйраг дохтыр Хæныкъаты Ларисæйы сæргълæудæй, цыран алыхатт дæр вæййы хъарм атмосферæ. Ацы хосгæнæн уагдоны кусынц сæ дæсныйады иттæг хорз специалисттæ.
Ныртæккæ Уæрæсейы хицæн регионты, уыцы нымæцы Цæгат Ирыстон-Аланийы дæр апарахат гриппы эпидеми, кæцыйы фæстиуæгæн Дзæуджыхъæуы карантинмæ æхгæд æрцыдысты ахуырадон уагдæттæ, сывæллæтты цæхæрадæттæ. Нæ горæты та уавæр куыд у, афтæ ма æндæр фарстатæн дзуапп райсыны тыххæй мах бахатыдыстæм горæт Цхинвалы сывæллæтты поликлиникæйы сæйраг дохтыр Хæныкъаты Ларисæмæ:
— Нæ республикæйы цæрджыты цардуагон уавæртæ бонæй-бон хуыздæр кæй кæнынц, уыцы нымæцы æнæниздзинад хъахъхъæныны фадыджы дæр, уымæн æвдисæн стæм иууылдæр. Кæй зæгъын æй хъæуы, фæстаг азты уавæр хуыз-дæрырдæм ивы уæ уагдоны дæр.
— Сывæллæтты æнæниздзинад хъахъхъæнын у нæ республикæйы ахсджиагдæр фарстатæй сæ иу. Ацы поликлиникæйы сæргъ слæууыдтæн 2008 азы æмæ дзы цахæм уавæр æрбаййæфтон, ууыл дзурын уæлдай у. Фæлæ, Хуыцауы фæрцы азæй азмæ æнæниздзинад хъахъхъæныны къабазы цæуы позитивон ивындзинæдтæ, уыцы нымæцы нæ уагдоны дæр. Кæй зæгъын æй хъæуы, нырма нын ис проблемæтæ, фæлæ нæ уырны, уыдон дæр æвæрццагæй скъуыддзаг кæй æрцæудзысты.
— Куыд зонæм, афтæмæй ныртæккæ Уæрæсейы хицæн регионты, уыцы нымæцы Цæгат Ирыстоны дæр регистраци æрцыдысты вирусон инфекци HINI-æй фæрынчыны цаутæ. Нæ горæты та уавæр куыд у?
— Абон нæ республикæйы эпидемиологон уавæр у стабилон. 2015 азы сентябрь-октябры мæйты нæ республикæйы уагъд цыд сабитæн æмæ астæуккаг скъолаты ахуыргæнинæгтæн профилактикон вакцинаци. Вакцинаци уагъд цыд сывæллæтты ныййарджыты барвæндæй. Ивгъуыд аз сывæллæтты поликлиникæйы базæйы вакцинæтæ арæзт æрцыд 2 мин адæймагæн. Уый у 31 проценты сывæллæтты иумиаг нымæцæй, фæлæ æппынкъаддæр йæ фæстиуæг хъуамæ уыдаид 50 проценты. Кæй зæгъын æй хъæуы, уый цъус у, хуыздæр уаид æмæ фылдæр сывæллæттæ куы цæуиккой вакцинацигонд, уый сæ бахизит вирусон инфекцийæ. Банысан кæнæн хъæуы уый дæр æмæ 2014 азимæ абаргæйæ 2015 азы гриппы ныхмæ вакцинацигонд кæй æрцыдысты фылдæр сывæллæттæ. Хорз уаид æмæ 2016 азы вакцинацигонд сывæллæтты нымæц ноджыдæр куы фæфылдæр уаид. Ис нæм гъæдджын вакцинæтæ æмæ нæ хъæуы тæрсын гриппы ныхмæ вакцинæ саразынæй, кæцы нын æрвылаз дæр вæййы планон мадзал. Вакцинæ арæзт цæуы æнæ аргъæй.
Ныртæккæ кæд уавæр стабилон у, уæддæр гæнæн ис æмæ вирусон низ нæ республикæйы фæзына февралы æмбисты. Махмæ ис æппæт æнæмæнгхъæуæг хосгæнæн препараттæ. Вирусон инфекцийы рæстæджы афойнадыл хос кæнын у æнæмæнгхъæуæг. Курæг дæн ныййарджытæй, цæмæй куыддæр сæ сывæллæттæ фæрынчын сты, уый фæхатой, афтæ æрбацæуой нæ поликлиникæмæ сæ фадыгон педиатрмæ. Афтæ куы уа, уæд инфекцион низæн хос æрцæудзæн рæстæгыл æнæ æвзæр фæстиуджытæй. Банысан кæнын мæ фæнды уый дæр, æмæ æрæджы УФ-йы регионты сæвзæргæ уавæры фæдыл уагъд кæй æрцыд æнæрадон рабадт РХИ-йы Хицауады Сæрдары хæдивæг Пухаты Эрикы сæргълæудæй. Афтæ ма РХИ-йы Æнæниздзинад хъахъхъæныны министр радта бардзырд профилактикон мадзæлттæ фæтыхджындæр кæныны тыххæй.
— Абон дæ дæлбар медицинон уагдоны хыгъды цал сывæллоны ис. Цал фадыджы æмæ уæм цал педиатры ис?
Нæ уагдоны хыгъды абоны онг ис 9143 сывæллоны 18 азы онг кæуыл цæуы, ахæмтæ. Æдæппæтæй нæм ис 13 педиатрон фадыджы. Алкæцы фадыджы дæр ис 800 сывæллоны бæрц. Номхыгъдтæ регулярон æгъдауæй бæлвырдгонд цæуынц, уымæн æмæ цæуы бæрæг миграци. Æгæрыстæмæй, мах лæггад кæнæм «Хурзæрин» æмæ Мæскуыйаг" ног микрорайонтæн дæр кæд нын ацы фады-джы штатон иуæг нæй, уæддæр. Æдæппæтæй нæ поликлиникæйы ис 13 педиатры, уыдоны сты сæ дæсныйады иттæг хорз специалисттæ, уыцы нымæцы æвзонг дохтыртæ Елбачиты Екатеринæ, Æлборты Ленæ, Гаглойты Заринæ. Ис нæм хъуырыты дохтыр дæр, уый та у æвзонг специалист Уалыты Фатимæ, кæцы ахуыр кодта Санкт-Петербурджы, афтæ ма аллерголог-иммунолог Мæргъиты Маринæ.
— Флюрографи арæзт æрцæуы нæ республикæйы скъолаты ахуыргæнинæгтæн?
— 2015 азы ноябрь-декабры мæйты скъолаты уагъд æрцыд флюрографи 14 азæй уæлæмæ кæуыл цæуы, ахæм 940 ахуыргæнинагæн. Æхсызгонæй мæ банысан кæнын фæнды уый, æмæ уыдоны ’хсæн кæй нæ разынд рæуджыты низæй рынчынтæ. Афтæ ма ахуыргæнинæгтæн арæзт æрцыд манту дæр. Манту саразыны фæстиуæгæн зæрдæ кæмæ фехсайдта, уыцы ахуыргæнинæгтæм сæ хъус дарынц туберкулезон диспансеры специалисттæ.
— Сывæллæтты поликлиникæйы лæггæдтæ иууылдæр æнæ аргъæй сты? Ис уæм льготон категорийы пациенттæ?
— Поликлиникæйы æппæт лæггæдтæ дæр сты æнæ аргъæй. Кæй зæгъын æй хъæуы, ис нæм льготон категорийы пациенттæ дæр. Куыд зæгъæм, ДЦП, сæкæрниз, бронхиалон астмæ, зæрдæнизтæй рынчын сывæллæттæ лæууынц хыгъды нæ поликлиникæйы æмæ ифтонг цæуынц лæвар хосгæнæн препараттæй. Уый æддейæ ма лæвар хостæй ифтонг цæуынц сывæллæттæ сæ райгуырдæй æртæ азы онг се ’ппæт дæр. Фадыгон педиатртæ рафыссынц рецепт специалон бланкыл, кæцы сын фадат дæтты паддзахадон афтиаджы хостæ æнæ аргъæй райсынæн.
Банысан кæнын ма фæнды уый дæр, æмæ нæ поликлиникæйы кæй кусы бæрзонд æмвæзады УЗИ-диагностикæ, кæцыйыл кусы специалист Гасситы Иринæ. Ацы аппарты ’руаджы арæзт цæуынц эхокардиограммæтæ, афтæ ма дзы басгарæн ис хуылфыдзаумæ, сины æрхджыты. Ис нæм цæстыты дохтыр дæр. Иу дзырдæй нæ хъуыддæгтæ æвзæр нæ цæуынц нæ республикæйы къухдариуæгады æмæ æнæниздзинад хъахъхæныны министрады ’руаджы.
— Бузныг.
ДЖИОТЫ Екатеринæ