Nog adres

Мах кæронмæ ацæудзыстæм вазыгджын, фæлæ цардамайæн фæндагыл, снысангонд бæрзæндтæм

_MG_2581_resize.jpgРеспубликæ Хуссар Ирыстоны Президент Тыбылты Леониды ногазон арфæ Хуссар Ирыстоны адæмæн
Зынаргъ æмбæстæгтæ!
Мах сымахимæ паддзахадон арæзтады азфысты афæлдæхтам ноджыдæр иу сыф. Æмбисæхсæв Кремлы курантты цавдимæ 2015 аз суыдзæн историйы уазæг. Цæимæ фæндараст кæнæм мах аивгъуыйгæ аз? Ног азы къæсæрыл алчидæр йæ уæхсчы сæрты акæсы аивгъуыйгæ азмæ, цæмæй сарæза цавæрдæр хатдзæгтæ, схизгæ бæрзæндтæ æмæ къухы цы нæ бафтыд, уыдонæн раст аргъ скæныны сæраппонд.
Махæн сымахимæ аивгъуыйгæ аз нæ уыди æвзæр. Сымах уæ намысджын куыстæй равдыстат, уæ бон у канд æдхæцæнгæрзтæ нæ сæрибардзинад æмæ паддзахадон хæдбардзинад хъахъхъæнын нæ, фæлæ ма фæллойадон фронты дæр уæ къухы æфты зынгæ æнтыстытæ. Акæсут ма, афæдзы дæргъы цас ног объекттæ сæндидзын кодтам æмæ сарæзтам ногæй сымах цæнгты фæрцы!
Æххæстæй сæ куынæ ранымайæм, уæддæр æвзæрын кæнынц сымахæй сæрыстырдзинад. Растдæр знон Къуайсайы горæты цытджын æгъдауæй эксплуатацимæ лæвæрд æрцыд скъолайы ног агъуыст, уымæй дыууæ боны раздæр райстæуыд рынчындоны ног бæстыхай. Арæзт æрцыдысты Хъорнисы скъола, сабиты рæвдауæндон Дменисы, Ленингоры культурæйы хæдзар æмæ интернат, Дзауы администрацийы бæстыхай; республикæйы территорийыл айгæрстæуыд дæсгай километрты дæргъæн хæрзарæзт фæндæгтæ æмæ æвæрд æрцыд цалдæр хиды. Нæ уарзон горæт Цхинвал йæ хуыз ивы нæ цæстыты раз. Ацы ран эксплуатацимæ лæвæрд æрцыд Национ музейы бæстыхай, æххæстæй арæзт æмæ æндидзыд æрцыдис 8 уынджы, Фæскомцæдисонты парк, арæзт æмæ æндидзыд æрцыдысты дæсгай цæрæн хæдзæрттæ æмæ æнæхъæн цæрæнуатон комплекстæ.
Æппæт адæттæ нын саразын бантыст сымах фæрцы, мæ зынаргъ æмбæстæгтæ! Æз зæрдиагæй цин кæнын, ацы бæрнджын дуджы мæм сымахимæ кусыны амонд кæй æрхауд, ууыл. Æз сæрыстыр дæн сымахæй. Фидарæй мæ уырны, æрцæуинаг азы махмæ ноджы фылдæр æнтыстытæ æмæ æфтиæгтæ кæй æнхъæлмæ кæсы. Мæ фидар æууæнк амад у, Уæрæсейы Федераци æмæ йæ политикон разамынад махæн цы стыр æмæ алыварсон æххуыс кæны, ууыл.
2015 аз махæн нысангонд уыди зынгæ политикон цауæй — Мæскуыйы Уæрæсейаг-Хуссарирыстойнаг æмцæдисад æмæ интеграцийы æхсæнпаддзахадон Бадзырдыл къух æрфыссынæй. Ацы документ махæн у, æцæг хъысмæтгæнæг нысаниуæг кæмæн ис, ахæм, æмæ æрцæуинаг азы мах бахъæудзæн уый бæлвырд мидисæй баххæст кæнын. Мæхицæн ратдзынæн уый бар, цæмæй уæ номæй зæрдиаг бузныджы ныхæстæ зæгъон бирæнационалон уæрæсейаг адæм æмæ йæ къухдариуæгадæн, ракæнон сын Ног азы арфæ, зæгъон сын æнæниздзинады æмæ амонды фæндиæгтæ, Стыр Уæрæсейæн та зæгъон фарн æмæ дидинæфтыды фæндиæгтæ.
Нæ ногдæр историйы æппæт азты дæргъы мах æнкъардтам Цæгат Ирыстоны æфсымæрон æххуыс. Мæн æхсызгонæй банысан кæнын фæнды, не ’хсæн хъарм æмæ хæларадон ахастытæ кæй сæвзæрд не ’фсымæрон республикæйы ног къухдариуæгадимæ дæр. Мах арæх фембæлæм, уынаффæ кæнæм нæ иудзинады сæраппонд бирæнымæц фарстытыл. Райгондæй мæ фæнды зæгъын, нæ куырдиæттæ æмæ фæндæттæ кæддæриддæр кæй вæййынц æмбæрстгонд æмæ æвæстиатæй лыг кæй æрцæуынц. Мах зæрдиаг арфæтæ кæнæм нæ цæгатирыстойнаг æфсымæртæн Ног Азы цытæн. Зонæм æй, æрцæуинаг азмæ уыдон куыд вазыгджын хæстæ снысан кодтой сæхицæн, æмæ нæ фидарæй уырны, уыдон аскъуыддзаг кæнын сын æххæстæй кæй бантысдзæн.
Зынаргъ æмбæстæгтæ! Никæцы материалон æмæ финансон фæсауæрцтæ æмæ æддейæ æххуыс сæхæдæг нæ аскъуыддзаг кæндзысты нæ бæстæйы сæндидзын кæныны сæраппонд нæ разы лæууæг хæстæ. Нæ фидæны æнтыстыты сæйраг æмæ бындурондæр фæрæз фыццаджыдæр сты нæ хорз æмæ куыстуарзаг адæм, уыдон стут сымах. Сымахимæ иумæ мах кæронмæ ацæудзыстæм вазыгджын, фæлæ цардамайæн фæндагыл æмæ бахæццæ уыдзыстæм 2016 азмæ снысангонд бæрзæндтæм. Æз мæ зæрдæ дарын сымахыл, уæ бæрзонд патриотизм æмæ тырнындзинадыл.
Мæ зынаргъ æмбæстæгтæ! Зæрдæбынæй уын арфæ кæнын Ног азы цытæн. 2016 аз нæ уарзон Ирыстоны алы хæдзармæ, алы бинонтæм фарнхæссæг фæуæд! Нæ уæздан куырыхонтæн æнæниздзинад раттæд! Нæ хъæбатыр ахуырмонц фæсивæдæн сæ разы ног уæрæх фæндæгтæ байгом кæнæд! Кусæг æмæ зæхкусæг адæм сæ куыстæй райгонд куыд уой, ахæм арфæ сын дунейы фарн балæвар кæнæд! Иумæ царды бæрзæндтæм æнæзивæгæй тырнæм, æмæ æрбалæугæ Ног азы ног стыр æнтыстытæ нæ къухты бафтæд!
Стыр Хуыцау æмæ Уастырджийы хорзæхтæй хайджын ут, æмæ уæ Ног азы хорзæх уæд, мæ зынаргъ æмбæстæгтæ!
Хуссар Ирыстоны Президент ТЫБЫЛТЫ Леонид