Nog adres

Сывæллæтты сфæлдыстады галуаны

-0477.jpgЕРЫС КОДТОЙ БРЕЙК-ДАНСÆЙ
17-æм декабры нæ горæты Сывæллæтты сфæлдыстады галуаны уагъд æрцыдысты ерыстæ брейк-дансæй. Ерыстæ ныр ауагътой æртыккаг хатт æмæ сæ дарддæр дæр уадзысты, æр-вылазон сæ кæй скодтой, уымæ гæсгæ. Галуаны стыр залмæ æрбамбырд сты уагдоны кусджытæ сæ директор Джиоты Арянæйы сæргълæудæй, сывæллæтты ныййарджытæ æмæ брэйк-дансæн табугæнджытæ. Брейк-дансы кафт сырæзт æндæр кæфтыты элементтæй æмæ цыбыр рæстæгмæ ссис рæзгæ фæлтæры уарзондæр кæфтытæй сæ иу. Уыдонæй бирæтæ кафты ацы хуызмæ рагæй бæллыдысты æмæ сын ныр цалдæр азы дæргъы фадат ис брейк-дансы архайынæн. Æгæрыстæмæй, 12-аздзыд Цхуырбаты Руслан ацы кафт сахуыр кæнынмæ цæуы Дзауæй.
Мадзал уагъта Сывæллæтты сфæлдыстады галуаны брэйк-дансы тренер Тедеты Андрей. Ерысты райдианы уал уый сывæллæтты фæхуыдта хæлттæ сисынмæ, ома, сæ чи кæимæ ерыс кæндзæн æмæ кæцы номыр уыдзæн, уый базоныны тыххæй. Æдæппæтæй ерысты хайад райстой 16 хайадисæджы, уы-доны нымæцы дыууæ чызджы.

Сывæллæтты арæхстдзинадæн аргъ кодта профессионалон жюри ахæм скондæй: Кокойты Сæрмæт, Джиоты Станислав æмæ Стамбулянц Михаил.
Ерысты размæ уал цалдæр номыры сæххæст кодтой жюрийы уæнгтæ сæхæдæг. Уый фæстæ мадзаламонæг фыццаг къайы фæхуыдта сценæмæ. Уыдонæй уал нырма сæ иу равдыста йæ арæхстдзинад æмæ уый фæстæ та иннæ. Афтæ æрæмбырдуæвджыты раз сæ номыртæ сæххæст кодтой аст къайы. 1-аг туры ерысты фæстæ дыккаг турмæ ахызтысты аст хайадисæджы, ома, цыппар къайы. Уыдонæй та æрдæгфинал-мæ ахызтысты дыууæ къайы, ома, цыппар хайадисæджы.
Фæлæ уал уæдмæ мадзаламонæг Тедеты Андрей сценæмæ фæхуыдта Сывæллæтты сфæлдыстады галуаны директор Джиоты Арянæйы. Уый зæрдæбын арфæтæ ракодта æрæмбырдуæвджытæн: «Мæнæ нæ абоны бæрæгбоны нæ хъомылгæнинæгты уын-дæй рухс кæнынц нæ зæрдæтæ. Уыдон нын алыхатт дæр сæ уындæй срæсугъд кæнынц нæ мадзæлтты. Тынг хорз цæттæ сты æмæ уый тыххæй бузныг зæгъын сæ ахуыргæнджытæ Тедеты Андрей æмæ Джиоты Станиславæн. Ерысты жюри раст тæрхон кæны æмæ уадз, æмæ фæуæлахиз уæд тыхджындæр.
Фæнды ма мæ банысан кæнын уый дæр, æмæ кæд брейк-дансæй ахæм ерыстæ бацæттæ кодтой æмæ ауагътой, уæд цæмæннæ ис гæнæн æмæ ахæм ерыстæ ауадзæм ирон кафтæй дæр. Ног, 2016 азы мах бацархайдзыстæм, цæмæй ауадзæм ирон кафты конкурс», — банысан кодта Джиоты Арянæ.
Уый фæстæ райдыдта ерысты æр-дæгфинал. Финалмæ ахызтысты дыууæ хайадисæджы. Жюрийы тæрхонмæ гæсгæ фыццаг бынат бацахста Хъуылымбегты Ацæмæз, дыккаг бынат фæцис Плиты Тимуры (дыууæ дæр Тедеты Андрейы хъомылгæнинæгтæ) æмæ æртыккаг бынат та рамбылдта Цхуырбаты Руслан (Джиоты Станиславы хъомылгæнинаг).
Ерысты ма уыд уæлахизмæ тырнындзинады приз дæр. Ацы приз та саккаг кодтой Пухаты Снежаннæйæн. Ерысты хайадисджытæ иууылдæр хорзæхджын æрцыдысты Сывæллæтты сфæлдыстады Кады грамотæтæй. Фæуæлахизуæвджыты та схорзæхджын кодтой Кады грамотæтæ æмæ зæрдылдарæн лæ-вæрттæй. Тедеты Андрейы ныхæстæм гæсгæ сын призон хорзæхтæ балхæныны финансон æххуыс бакодта Лохты Вадим æмæ йын уый тыххæй ерысты организатортæ зæгъынц бузныг.
Мадзаламонæг, брейк-дансы тренер Тедеты Андрей загъта: «Ацы ерыстæ сарæзтам æрвылазон. Сывæллæттæ кафты ацы хуызæй архайгæйæ физикон æгъдауæй кæнынц тыхджындæр. Сы-вæллон куы тыхджындæр кæна, уæд вæййы æнæниздæр. Иннæ ахæм та брейк-данс у аивад, æцæг аивад, кæй нæ уырны, уый æрбацæуæт æмæ сæм бакæсæт. Сывæллæттæ тырныдтой сæхи хорз равдисынмæ, иннæ ахæм сын стимул уыд сæ ныййарджытæ ерыстæм кæй æрбацыдысты, уый дæр. Бирæ курдиатджын сывæллæттæ ис Хуссар Ирыстоны».
Æмæ, æцæгæйдæр, ныр цалдæр хатты дæн æвдисæн нæ рæзгæ фæл-тæры арæхстдзинад æмæ курдиатæн. Уыдон ахæм æнахуыр фездæхтытæ æмæ спортивон элементтæ æххæст кодтой æмæ-иу сæм адæймаг дисгæнгæйæ каст. Æрæмбырдуæвджытæ сын кодтой тыхджын къухæмдзæгъд, уæлдайдæр та-иу сывæллæттæ сæ сæртыл цъилау куы ныззылдысты, уæд.
Тедеты Андрей ма куыд банысан кодта, уымæ гæсгæ ацы ерыстæ уыдысты куыд æвзарæн тур, афтæ. Йæ уæлахиздзаутæ хайад райсдзысты Цæгат Ирыстон-Аланийы уагъдцæуæг ерысты.

НЫВТЫ РАВДЫСТ — «ЗЫМÆГОН АРГЪАУ»
Сывæллæтты сфæлдыстады галуан ныридæгæн йæхи цæттæ кæны Ног азы æрбалуæдмæ. Галуаны дыккаг уæла-дзыджы байгом сывæллæтты нывты равдыст «Зымæгон аргъау», зæгъгæ.
Уагдоны хъомылгæнинæгты къухтæй конд нывтæм кæсгæйæ цыма адæй-маг сывæллæтты миддунемæ ныккæсы, афтæ йæм фæкæсы. Галуаны нывгæнæн кружокы архайæг сывæллæттæ сæ нывты равдыстой зымæгон пейзажы рæсугъддзинад. Сныв кодтой Митын Дада æмæ Митын Чызджы, æгæрыстæмæй ма Митын Чызджы къухты ис урс малусджыты букет дæр, афтæ зымæгон хъæды аргъауы хъайтарты. Равдысты ма ис алыгъуызон мидисимæ нывтæ, æдæппæтæй равдысты ис 50 нывæй фылдæр.
Сывæллæтты сфæлдыстады галуаны кусджытæ ныридæгæн æрластой Ногазон назбæлас дæр. Ног къуырийы галуаны скæндзысты бæрæгбонон ногазон фæлыст. Сывæллæтты ногазон равдыстытæ галуаны уагъд цæудзысты 2-9 январы. Уым хайад райсдзысты республикæйы скъолаты 1-4-æм кълæсты ахуыргæнинæгтæ. Сценари фыст у ирон æвзагыл. Уагдоны коллектив цæттæ кæны хонæн билеттæ, кæцыты арвитдзысты республикæйы скъолатæм, уыцы нымæцы районты скъолатæм дæр. Ногазон бæрæгбоны организаторты ныхæстæм гæсгæ, сывæллæттæм æн-хъæлмæ кæсы æхсызгон ногазон сюрприз, кæцы фæцæудзæн алы сывæллоны зæрдæмæ дæр.
Сæйраг ногазон бæрæгбон — Президентон назбæлас уыдзæн 3-æм январы. Уырдæм хуынд æрцæудзысты, фæндзтыл чи ахуыр кæнынц, уыцы ахуыргæ-нинæгтæ.
ДЖИОТЫ Екатеринæ