Nog adres

Не ’мзæххонтæ | Козаты Ушанг — академийы уæнг-уацхæссæг

Уæрæсейы аивæдты академийы цы æртæ ирон уæнгуацхæссæджы ис, уыдонмæ ма бафтыд иу ирон зындгонд нывгæнæг. Уый у Козаты Ушанг. Ацы академийы уæнгуацхæсджыты ’хсæн ныры онг Ирыстонæй уыдысты Абысалты Юри, Басаты Олег æмæ Калманты Алан.
Нырма иу азы размæ мах Козайы фыртæн арфæтæ кодтам, Уæрæсейы Федерацийы Нывгæнджыты Цæдисы æвзист медаль æмæ «Аивадæн лæггад кæныны тыххæй» орден кæй райста, уый фæдыл. Ныр та йын ног, кадджын ном.
Уæрæсейы Федераци æмæ Цæгат Ирыстон-Аланийы сгуыхт нывгæнæг, Республикæ Хуссар Ирыстоны адæмон нывгæнæг Козаты Ушангы экспресси аивадиртасджытæ уайтагъд схуыдтой вулканон. Йæ куыстыты йын уыцы-иу рæстæджы арынц авангардизм дæр æмæ арф философи дæр, царды райдиан æмæ царды драматизм дæр.
Козаты Ушангы куыстытимæ аивадуарзджытæ бирæ бæстæты базонгæ сты алыгъуызон музейты æмæ равдыстыты: Уæрæсейы æмæ Германы, Францы æмæ Испанийы, Болгари æмæ Китайы, куыд Ази, афтæ бирæ ныгуылæйнаг бæстæты дæр.
Дыууæ хатты хайад иста дунеон симпозиум «Аланика»-йы. Абон нæ уарзон нывгæнæг ахæм кадджын ном райсыныл райы йæ юбилейон равдыстытæм цæттæ кæнгæйæ. Уыдон нысан цæуынц фæззæгмæ. Уыдзысты Дзæуджыхъæуы, Цхинвалы, Мæскуыйы.