Nog adres

Спорт | Турнир рог атлетикæйы кубок рамбулыны сæраппонд

Ныр 3-аг аз фæд-фæдыл Цхинвалы стадионы уагъд æрцыд Хуссар Ирыстоны Рог атлетикæйы федерацийы кубок рамбулыны сæраппонд турнир. Ерысты та активон хайад райстой республикæйы скъолатæ. Ныр та призтыл тох кодтой 13 командæйы. Скъоладзаутæ архайдтой рог атлетикæйы 6 дисциплинæйы.
Ерысты байгом кæныны церемонийы хайад райстой спорты ветерантæ Наниты Лев, Хæбæлаты Алексей, Александр Джалалов æмæ Тедеты Æхсар.
100 метрмæ згъорынæй лæппуты ’хсæн фæуæлахиз Æрсойты Лаврент, чызджыты ’хсæн та — Елойты Маринæ. Æрсойты Лаврент ма фæуæлахиз 400 метрмæ лидзынæй дæр. Ацы дисциплинæйы чызджыты ’хсæн та фыццаг уыд Къобесты Мария. 800 метры дистанцийы та аккаг ныхмæлæуджытæ нæ разынд Тыджыты Владислав æмæ Джиголаты Аланæйæн. Дæргъмæ гæппкæнынæй лæппуты ’хсæн турниры уæлахиздзау ссис Козаты Давид, чызджыты ’хсæн та иууыл дарддæр агæпп кодта Елойты Маринæ. Ядро æппарыны ерысты та иууыл цæттæдæр уыд Тедеты Азæмæт, чызджыты ’хсæн та — æфсæйнаг къори иууыл дарддæр аппæрста Æлборты Аланæ.
Ерысты уæлахиздзаутæн раарфæ кæнынмæ æмæ сæ схорзæхджын кæнынмæ æрбацыд РХИ-йы Хицауады Сæрдары хæдивæг Пухаты Эрик. Уæлахиздзауты æмæ призерты схорзæхджын кæныны церемонийы ма хайад райстой РХИ-йы Фæсивæдон политикæ, спорт æмæ туризмы комитеты сæр-дары хæдивæг Кокойты Георги, республикон спортивон скъолайы директор Бибылты Руслан æмæ фæсивæды ’хсæн Европæйы чемпион Кокойты Валери.
Турниры ма сæрмагонд призтæй хорзæхджын æрцыдысты Къобесты Вадим, Сланты Анастасия, Багаты Арсен æмæ Дзабиты Элинæ.
Кæронбæттæны та фæбæрæг сæйраг призы хицау. Ныр æртыккаг хатт Хуссар Ирыстоны Рог атлетикæйы федерацийы кубок рамбылдта гимнази «Альбион»-ы командæ.
Командон хыгъды дыккаг бынатыл та ацыд 12-æм скъола æмæ 3-аг бынат та фæци 6-æм скъолайы.
ХУРИТЫ Батрадз