Nog adres

Университеты комплекс эксплуатацимæ лæвæрд æрцæудзæн 2017 азы

Хуссар Ирыстоны Паддзахадон университеты бæстыхай, куыд нæ республикæйы сæйраг горæт Цхинвалы иумæйаг архитектурон композицийы иу хай, афтæ кæддæриддæр нымад уыди нæ историон цыртдзæвæнтæй иуыл, æмæ уый æнæхъуаджы нæ уыд. Уый ноджы ахъаззагдæр фæкодта Хуссар Ирыстоны цæрджыты хъыг, гуырдзиаг тыхæйисджыты къухтæй йæ сыгъдонæй куы федтой, уæд.
Ныртæккæ ХИПУ-йы цæуы арæзтадон-æндидзынгæнæн цæттæгæнæн куыстытæ. Арæзтады, архитектурæ æмæ цæрæнуатон коммуналон хæдзарады министры хæдивæг Гаглойты Сергей банысан кодта, зæгъгæ, экспертон къамисы хатдзæгмæ гæсгæ бæстыхайы сыгъдоны бындур æмæ йæ иумæйаг конструкци нымад æрцыд лæмæгъыл, æндидзын кæнынæн чи нæ бæззы, ахæмыл. Уымæ гæсгæ университетон комплексы территори æгасæйдæр, иу корпусæй дарддæр, æрцæудзæн пырхгонд æмæ йæ бацæттæ кæндзысты фæстæдæр дзы æххæст гуырахстджын куыстытæ райдайынмæ.

Гаглойты Сергей ма фехъусын кодта, зæгъгæ, сыгъд бæстыхай ногæй æндидзыд æрцæудзæн, фæлæ ма уымæй дарддæр арæзт æрцæудзæн ног универститетон комплекс 700 студенты бынатимæ, ныртæккæйы æртæуæладзыгон ахуыргæнæн бæстыхайæ арæзт æрцæудзæн æмдзæрæндон, хæрзарæзт скæндзысты йæ алыварс территори дæр. Ног проект афтæ арæзт у, цæмæй дзы цы фæзуат ис, уым куыд гæнæн ис, афтæ хæрзвадатдæрæй æрбынат кæной комплексы æппæт хæйттæ дæр. Уыимæ иумæ бахынцыд æрцыд университеты профессортæ æмæ ахуыргæнджыты хъуыды дæр. Нысангонд куыд у, афтæмæй комплекс уыдзæн раздæрæй стырдæр æмæ дзы бынат ссардзысты студенттæ æмæ ахуыргæнджытæн ахуыр кæнын æмæ кусынæн æнæмæнгхъæуæг цы у, æппæт уыдон.
Сыгъд бæстыхайы æндидзын æмæ университеты ног корпус аразыны куыстытæ цæ-уынц Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты. Объект хъуамæ эксплуатацимæ лæвæрд æрцæуа 2017 азы.