Nog adres

Хъайтарты сгуыхтдзинæдтæ рох не сты

DSC_0326.jpg30 сентябры Республикæ Абхаз банысан кодта йæ сæрибардзинады 22 азы бон. Куыд хуссарирыстойнаг æмбæстæгтæ, афтæ Абхазы æмбæстæгтæ дæр сæ уæлахизы бонмæ æрцыдысты хæстон архайдтыты фæстæ. 1993 азы сентябры республикæйы столицæ Сухумы сæрыл цыдис карз тохтæ, абхазæгтæ æппæт дæр арæзтой, цæмæй Сухумы Гуырдзыстоны æфсадæй ссæрибар кæной. Абхазагты уæззау уавæрмæ, кæй зæгъын æй хъæуы, хуссарирыстойнаг фæсивæд куыдфæндыйы цæстæй нæ кастысты, уымæн æмæ уыдон уæды рæстæджы сæхиуыл банкъардтой Гуырдзыстоны фашистон архайдтыты æмæ уымæ гæсгæ æфсымæрон æххуысы къух фæдаргъ кодтой сæ абхазаг æфсымæртæм. Хуссарирыстойнаг æвзонг лæппутæ Абхазы хæстон архайдтыты рæстæджы сæхи равдыстой æцæг хæстонтæй, уымæ гæсгæ абоны онг дæр Абхазы къухдариуæгадæй рох не сты хуссарирыстойнаг хъæбатыр лæппуты сгуыхтдзинæдтæ.
2 октябры нæ республикæйы Профцæдисты хæдзары уагъд æрцыд Абхазы хæсты хайадисæг хуссарирыстойнаг ветеранты æнæрадон съезд.

Съезды хайад райстой РХИ-йы Хицауады уæнгтæ Президент Тыбылты Леониды сæргълæудæй, Абхазы хæстон архайдтыты хайадисджытæ æмæ нæ республикæйы æхсæнады минæвæрттæ.
Съезды райдианы нæ республикæйы Абхазы хæсты хайадисæг ветеранты æхсæнадон организацийы сæрдар Санахъоты Морис бузныджы ныхæстæ загъта мадзалмæ æрбацæуæг адæмæн æмæ съезды куыст банымадта гомыл. Айхъуыст Хуссар Ирыстоны Паддзахадон гимны зæлтæ.
Уый фæстæ сценæйы уæрæх экраныл æвдыст æрцыд киноныв Хуссар Ирыстон æмæ Абхазы хæстон архайдтытæй скъуыддзæгтæ.
Цытджын мадзалы раныхас кодтой Республикæ Хуссар Ирыстоны Президент Тыбылты Леонид, Республикæ Абхазы æххæстбарджын минæвар Хуссар Ирыстоны Елбачиты Алан, Хуссар Ирыстоны хæстон архайдтыты рæстæджы фæцæфуæвджытæн æххуысы фонды сæрдар Плиты Мадинæ æмæ Санахъоты Морис.
Абхазы сæрибардзинады сæрыл тохты хуссарирыстойнаг бархионтæй хайад чи райста, уыдон Республикæ Абхазы Президент Рауль Хаджимбайы Указмæ гæсгæ хорзæхджын æрцыдысты паддзахадон хорзæхтæй.
Съезды дарддæры цыдимæ уæ бæстондæр базонгæ кæндзыстæм нæ газеты радон номыры.

Нæ уацх.