Nog adres

Номарæн турнир уæгъдибар хъæбысхæстæй

KVAISA.jpg Стыр спортивон бæрæгбон уыд горæт Къуайсайы. Уым Ирыстоны зынгхуыст хъайтар Тедеты Владимиры (Вла) рухс номыл уагъд æрцыд æхсæнадæмон турнир уæгъдибар хъæбысхæстæй. Къуайсамæ æрцыдысты дагъыстайнаг, кæсæг-балхъайраг, цæгатирыстойнаг, Цхинвал æмæ республикæйы районты богалтæ. Горæты уыд бæрæгбонон атмосферæ. Уæлдайдæр та центры, цыран ис Тедеты Владимиры номыл уынг.
Ерыстæ уагъд цыдысты дыууæ боны дæргъы — 26-27 сентябры.
Фыццаг бон турнир байгом кæныны церемонийы хайад райстой горæт Къуайсайы администрацийы сæргълæууæг Æлборты Леонид, Владимиры æмгар Челехсаты Хъазбег, депутат Джиоты Инал æмæ спорты фарстаты фæдыл РХИ-йы Президенты æххуысгæнæг Джиоты Руфин. Уыдон банысан кодтой, зынгхуыст хъайтары номыл ахæм турнир уадзыны хъуыддагæн кæй ис стыр нысаниуæг. Иу уысм æмырæй алæу-гæйæ æрæмбырдуæвджытæ ссардтой Тедеты Владимиры рухс ном.
Тедеты Владимир уыд уыцы хъайтарты рæнхъыты, кæцытæ аккаг ных-къуырд лæвæрдтой гуырдзиаг агрессор-тæн. Ирыстоны цæгат хай дæр уæззау уавæры куы бахауд, уæд ацыд уырдæм æмæ ирон-мæхъæлон хæсты хъæбатырæй фæмард.
Турниры призтыл тох кодтой 140 спортсменæй фылдæр.
Хъайтары номыл ерыстæ ныр уагъд æрцыдысты дыккаг хатт. Дагъыстайнаг богалты тренер Гасан Магомедов куыд загъта, афтæмæй уый ныр дыккаг хатт æрцыд Къуайсамæ.

kvaisa1_2.jpg «Тынг хорз та нæ райстой. Турниры ныр бирæ тыхджын богалтæ исынц хайад. Сæйраджыдæр мæ фæнды банысан кæнын, æмæ ивгъуыд аз мæ хъомылгæнинæгтæй ерысты хайад чи райста, уыдон-иу мæ арæх афарстой, зæгъгæ, та кæд ацæудзыстæм ерыстæм Къуайсамæ. Уыцы ныхас-иу фехъуыстой иннæ богалтæ дæр, уыдон дæр тынг фæндыд ардæм», — загъта Гасан Магомедов.
Цæгатирыстойнаг тренер Биазырты Марик та куыд банысан кодта, афтæмæй ивгъуыд азимæ абаргæйæ, ацы аз турнир ацыд бæрзонддæр æмвæзадыл.
«Турнир организацигонд у бæрæг хуыздæр. Куыд æрвылхатт, афтæ та нæ райстой тынг хорз. Хъæбысæйхæцджытæ сæхи хатынц, куыд сæхи хæдзары, афтæ. Æвæццæгæн, дунейы стæм разындзæн ахæм диссаджы бынат», — йе ’нкъарæнтæ раргом кодта Биазырты Марик.
Ерысты дыккаг бон уагъд цыдысты финалон тохтæ. Турниры хайадисджытæн раарфæ кæнын æмæ уæлахиздзауты схорзæхджын кæныны тыххæй Къуайсамæ æрбацыд республикæйы къухдариуæгад Президент Тыбылты Леониды сæргълæудæй.
«Ацы турниры нæй ахæм, кæцы фæхæрд. Уымæн æмæ ахæм хъайтар, куыд Тедеты Владимиры номыл ерысты хайад чи фæисы, уыдон иууылдæр уæлахиздзаутæ сты. Республикæйы боны цытæн бирæ адæмы схорзæхджын кодтам юбилейон майдантæй. Ахæм майдан фыццаг нымæцы райстаит Тедеты Владимир. Уымæ гæсгæ юбилейон майданæй хорзæхджын кæнын йæ фырт Роберты, кæцы у хорзæхы аккаг», — банысан кодта Президент æмæ майдан бакодта Тедеты Роберты риуыл.
Паддзахады сæргълæууæг ма банысан кодта, юбилейон майдантæй хор-зæхджын кæй æрцæудзысты ерыстæм æрцæуæг зындгонд адæймæгтæ, кæ-цытæ сты нæ республикæйы хæлæрттæ. Афтæ ма бузныг загъта Къуайсайы цæрæг адæмæн, ахæм турнир кæй ауагътой, уый тыххæй.
Ерысты хайадисджытæн ма раарфæ кодта РХИ-йы Хицауады Сæрдар Хъуылымбегты Доменти.
«Мæн ныфс ис, æмæ ацы зал кæй суыдзæн фидæны стыр спортсменты уæлахизты райдиан. Бузныг ма мæ фæнды зæгъын ерыстæм æрбацæуæг зындгонд спортсментæн, кæцыты нæмт-тæ хаст æрцыдысты дунейы спортивон историмæ», — загъта Хъуылымбегты Доменти.
Ерыстæм ма сæ хъус дардтой РХИ-йы Фæсивæдон политикæ, спорт æмæ туризмы фæдыл комитеты сæрдар Зассеты Сергей, РЦИ-Аланийы национ ахастыты фарстыты фæдыл министры хæс-тæ æххæстгæнæг Фрайты Сослан æмæ иууыл уæзаудæр уæзы категорийы дунейы Кубокы уæлахиздзау Хъайсынты Георги.
Сæрмагондæй ма турниры тыххæй Къуайсамæ æрцыд легендарон штангист, Олимпион хъæзтыты уæлахиздзау Таймæзты Тимур.

Ныртæккæ архайæг спортсментæй ма турниры хайадисджытæн раарфæ кæнынмæ æрбацыдысты Олимпион хъæзтыты æвзист призер Тыджыты Таймураз æмæ дунейы дыууæ хатты чемпион Æлдаттаты Ибрагим.
«Мах нæхæдæг дæр ахæм спортзалтæй райдыдтам не спортивон карьерæ æмæ мæ ныфс ис, ам кæй фæзындзысты олимпион чемпионтæ», — банысан кодта Æлдат-таты Ибрагим.
«Сывæллæттæ турниры хайад кæй исынц, уый сын ахъаз у сæ арæхстдзинадæн. Чи фæхæрд уыдзæн, чи та — рамбулдзæн. Уый та сæ разæнгард кæндзæн сæхиуыл кусынмæ», — йæ хъуыдытæ загъта Тыджыты Таймураз.
Турниры хайадисджытæ ерыс кодтой 12 уæзы категорийы. Тохтæ иууылдæр акæныны фæстæ ерысты уæлахиздзаутæ систы: Къелеты Азæмæт (29 кг, Цхинвал), Багаты Руслан (32 кг, Дзæуджыхъæу), Дзеранты Арик (35 кг, Цхинвал), Шамиль Муртазалиев (46 кг, Хасавюрт (Дагъыстан), Джыгкайты Игорь (50 кг, Цхинвал), Гæджиты Гæмæт (54 кг, Къуайса), Дзæгъиаты Сослан (58 кг, Цхинвал), Бикойты Олег (63 кг, Цхинвал), Зассеты Азæмæт (69 кг, Къуайса) æмæ Теблойты Давид (+69 кг, Горæтгæроны район (РЦИ-Алани).
Уыдон се ’ппæт дæр хорзæхджын æрцыдысты кубоктæ, майдантæ æмæ зынаргъ лæвæрттæй, афтæ ма сын лæвæрд æрцыд æхцайы преми фæйнæ 10 мин сомы дæр. Ерысты дыккаг бынæттæ бацахсæг спортсментæн дæр лæвæрд æрцыдысты кубоктæ, майдантæ, зынаргъ лæвæрттæ æмæ фæйнæ 5 мин сомы. Бронзæйон призертæ та хорзæхджын æрцы-дысты кубоктæ, майдантæ æмæ фæйнæ 3 мин сомæй.
Президент Тыбылты Леонид ма зынаргъ лæварæй схорзæхджын кодта турниры иууыл хуыздæр богал Бикойты Олегы. «Хуыздæр техникæйы» тыххæй сæрмагонд призæй хорзæхджын æрцыд Дзеранты Арик, «Уæлахизмæ тырнындзинад»-ы тыххæй приз та лæвæрд æрцыд Хъулаты Арсенæн.
Турниры организаторты номæй ма хорзæхджын æрцыдысты ерыстæм æрбацæуæг æвзæнгты ’хсæн дунейы чемпион Лæууойты Сослан æмæ Европæйы чемпион Хуыгаты Хох.
Ерысты уæлахиздзауты æмæ призерты хорзæхджын кæныны церемонийы бузныджы ныхæстæ загъдæуыд йæ организатортæ Тедеты Владимиры фырт Робертæн æмæ сæ хæстæг Хуыгаты Владиславæн. Афтæ ма банысан æрцыд ерыстæм Къуайсайы хъæбысхæсты тренер Битеты Сæрмæты хайбавæрд дæр.
Æрæмбырдуæвджытæн ма бузныг загъта Тедеты Владимиры хистæр æфсымæр Валик.
Кæронбæттæны ерысты хайадисджытæ æмæ уазджытæ хуынд æрцыдысты дзаджджын фынгтæм, кæцытæ æвæрд æрцыдысты горæты центры. Изæры та зындгонд за-рæггæнджыты хайадистæй уагъд æрцыд бæрæгбонон концерт.
ХУРИТЫ Батрадз