Nog adres

Цæгат Ирыстоны

ФÆСИВÆДМÆ — ФЫЛДÆР ÆРГОМ
РЦИ-Аланийы Парламенты фæсивæды хъуыддæгты фæдыл æмæ национ политикæйы комитет цы æмбырд ауагътой, уым ныхас цыд, муниципалон зылдты фæси-вæдимæ цы куыст цæуы, ууыл.
Æмбырды архайдтой нæ республикæйы Парламенты Сæрдары хæдивджытæ Къесаты Станислав æмæ Токаты Людмилæ, Парламенты депутат Тедеты Руслан, Юстицийы управлени, Физикон культурæ, спорт æмæ фæсивæды хъуыддæгты фæдыл министрады, муниципалон зылдты æмæ Æхсæнадон палатæйы минæвæрттæ.
Æмбырды Къесаты Станислав бæлвырд æрдзырдта, ныры царды уавæрты куыд кусын хъæуы æрыгон фæсивæдимæ, ууыл, æмæ æрсидт, цæмæй муни-ципалон зылдты мидæг æрыгон фæлтæримæ цы куыст цæуы, уый уа биноныгдæр.
Районы куысты фæдыл æрдзырдта Горæтгæрон районы бынæттон хиуынаффæйады администрацийы сæргълæууæг Есиаты Руслан. Уый куыд загъта, афтæмæй районы стыр æргом здæхт цæуы фæсивæдмæ. Арæзт сын цæуынц алыгъуызон мадзæлттæ. Уый ба-фиппайдта, ныры фæсивæд хицаудзинады бынæттæм кæй тырнынц, цыбыр рæстæгмæ сæ стыр æхцатæ акусын кæй фæнды, фæлæ сæм уый тыххæй фаг зонындзинæдтæ æмæ фæлтæрддзинад кæй нæй. Æрыгæттæй йæхи ничи тыхсын кæны, цæмæй искæцы куыстуатмæ бацæуа æмæ йæхи куысты бафæлвара, куысты политикæ бамбара, исты дæсныйад райса...
Æмбырды архайджытæ æрдзырдтой æрыгон фæсивæды фылдæр æргом хъæутæм здахыны тыххæй. Бæлвырддæр ныхас цыд фæсивæдон парламентыл, цæмæй фылдæр куса хъæутимæ. Фæлæ æмбырды архайджыты хъуыдымæ гæсгæ, цæмæй фæсивæд хъæутæм се ’ргом аздахой, уый тыххæй дзы хъæугæ уавæртæ скæнын хъæуы.

АМАЛХЪОМТÆН ÆХХУЫСÆН
Республикæйы бизнес-æхсæнады ныхас рагæй цæуы, цæмæй дзы чысыл амалхъомадæн цæдис арæзт æрцæуа. Ууыл уыд ныр дæр сæ ныхас æмбырды архайджытæ — Цæгат Ирыстоны чысыл бизнесы минæвæрттæ, Базарадон-сæудæджерадон палатæйы президент Тугъанаты Хъазыбег, Амалхъомады, туризм æмæ инвестицион политикæйы министры фыццаг хæдивæг Гæдзауты Феликс, æнæххæст бæрндзинады æхсæнад «Мега»-йы директор Гаглойты Алан æмæ иннæтæн.
Æмбырды фидæны цæдисы куыстæн рагацау æвзæрст æрцыдысты президиумы фараст уæнджы, сæрдар æмæ æмсæрдæрттæ. Уымæй уæлдай ма æрныхас кодтой æмгуыстады фарстатыл. Цæдис бизнесы архайджытæн æххуыс кæндзæн хицаудзинады органтимæ æмгуыст кæнынæн. Цæдисæн йæхицæн та æххуыс кæндзæн бизнесы уæрæсейаг фонд.
Гаглойты Алан куыд банысан кодта, афтæмæй кæцыфæнды амалхъомæн дæр уыдзæн цæдисмæ бацæуыны бар. Архайдзысты сæ куысты хæстæ æнæлазæй æххæст кæныныл.

Нæ уацх.