Nog adres

Арæзтадон брæттæ чи нæ ласа горæтæй уыцы подрядонты ивар кæндзысты

Цхинвалы администраци исдзæн иварон санкцитæ подрядон арæзтадон организациты ныхмæ, кæцытæ сæ дæлбар уæвæг арæзтадон объекттæй афоныл нæ аласынц арæзтадон брæтты. Уый тыххæй фехъусын кодта горæты администрацийы сæргълæууæджы фыццаг хæдивæг Гæбæраты Вадим.
«Хъыгагæн, подрядон организацитæ, кæцытæ кусынц нæ горæты, куыд æмбæлы, афтæ сæ хъус нæ дардтой арæзтадон брæтты ласыны фарстмæ æмæ уый тыххæй ногæй арæзтцæуæг æмæ æндидзæн куыстытæ цы объектты цæуы, уыдонæй бирæты æрæмбырд тынг бирæ брон», - банысан кодта Гæбæраты Вадим.
Йæ ныхæстæм гæсгæ, Цхинвалы цы брон æртымбыл, уый æвзæрæрдæм æндавы горæты санитарон уавæрыл, афтæ ма йын халы йе 'ддаг бакаст дæр.
«Уый тыххæй Цхинвалы горæты администрацийы сæргълæууæг Хъотайты Алан лæмбынæг йæ хъус дарын райдыдта ацы проблемæ аскъуыддзаг кæнынмæ æмæ фæсидт цымыдисгæнæг фæрстæм алкæмæ дæр æмæ сæм æрсидт ацы згъуыд тагъд рæстæджы аиуварс кæнынмæ, - загъта Гæбæрайы фырт. - Сæрмагондæй, уый тыххæй ныхас цыд Республикæ Хуссар Ирыстоны æндидзынады проекттæ реализаци кæныны фæдыл Паддзахадон комитеты минæвæрттимæ æмæ паддзахадон унитарон куыстуат «Националон приоритетон проектты реализацийы фæдыл дирекцийы» минæвæрттимæ. Мэры хæдивæг куыд загъта, афтæмæй администрацийы сæргълæууæджы бахæсмæ гæсгæ горæты администрацийы кусджытæ Паддзахадон комитетимæ æмæ паддзахадон унитарон куыстуатимæ иумæ азылдысты горæты объекттыл се 'ппæтыл дæр, кæцыты кусынц, уæлдæр цы ведомствоты кой ракондчындæуыд, уыдоны подрядонтæ.

«Мах сын фенын кодтам арæзтадон брæтты рæдзæгъдтæ, сарæзтам акттæ æмæ сын сæ хъусдард аздæхтам рæстæгыл сæ аласыны æнæмæнгхъæуындзинадмæ, - йæ ныхасмæ бафтыдта горæты администрацийы сæргълæууæджы хæдивæг. - Подрядонтæн ма загътам уый тыххæй дæр, æмæ æмбæлон нормæтæ чи хала, уыдоны ныхмæ ист кæй цæудзæн иварон санкцитæ».
Гæбæраты Вадимы ныхæстæм гæсгæ, горæты хицауиуæгады райсгæ мадзæлттæн ныридæгæн ис бæрæг фæстиуджытæ, зæххыбын коммуникацитæ ивыныл чи кусы, уыцы арæзтадон организацитæ рæстæгыл ласын райдыдтой, цы сыджыт къахынц, уый, горæты скæсæнырдыгæй сæрмагондæй цы бынат рахицæн æрцыд, уырдæм.