Nog adres

Иммиграцион управлени кусы рæстæджы домæнтæм гæсгæ

2008 азы августы Гуырдзыстоны агрессийы рæстæджы Хуссар Ирыстоны социалон инфраструктурæ æмæ цæрæнуатон объекттæ кæй ныппырх сты æмæ сæ сæндидзын кæнын кæй хъуыд, фæлæ кусæгдых кæй нæ фаг кодта, уый тыххæй куыд Уæрæсейы регионтæй, афтæ раздæры Советон Цæдисы республикæтæй Цхинвалмæ кусынмæ цæуын райдыдтой мигранттæ. Кæд мигранттæн æндæр культурæ, æндæр æгъдæуттæ, æндæр уырнынад ис æмæ уымæй, гæнæн ис, бандавой нæ традицитыл æмæ æгъдæуттыл, уыимæ ма, се ’хсæн вæййы радикалон зондылхæст адæймæгтæ, кæцытæ, гæнæн ис, æппæрццагæй бандавой республикæйы криминогенон уавæрыл дæр, уæддæр фæллойадон миграци дунеон процесс у, æмæ Хуссар Ирыстон дæр нымад паддзахад кæй у, уыимæ ма йæ кусæгдых дæр кæй хъæуы, уый фæстиуæгæн фæллойадон фадыджы ссис дунеон миграцион змæлды хайадисæг.
Бæрæг куыд у, афтæмæй кусæгон мигранттимæ иумæ 2009 азы республикæмæ æрбацыд радикалон здæхты пысылмон уырнынады адæймæгты къорд, кæцытæ хъавыдысты æхсæнады сæ уырнынад апарахат кæныныл, фæлæ сын уымæй ницы рауад. Рæстæгыл æргом æрцыдысты æмæ сæ арвыстой республикæйæ.
РХИ-йы миграцион процессы æмæ Иммиграцион контролы управленийы куысты тыххæй Хуссар Ирыстоны Мидхъуыддæгты министрады Иммиграцион контролы сæргълæууæг, булкон Тыджыты Сослан куыд радзырдта, афтæмæй йæ дæлбар управленимæ хауы Хуссар Ирыстоны территоримæ æрбацæуæг, территорийыл уæвæг æмæ фæстæмæ ацæуæг фæсарæйнаг æмбæстæгтыл контроль кæнын.
Хуссар Ирыстоны Мидхъуыддæгты министрады Иммиграцион контролы кусджытæн фадат нæй, цæмæй арæны сæрты рахизæг фæсарæйнаг æмбæстæгты контроль кæной республикæмæ æрбацæуæны, РХИ-йы паддзахадон арæнгæрон пункт Ручъы сын контролон пост кæй нал ис, уый фæстиуæгæн. Сæ пост сын систой 2008 азы августы хæсты фæстæ.
Тыджыты Сослан куыд бамбарын кодта, афтæмæй хæсты фæстæ пырх республикæ сæндидзын кæнынмæ цы фæсарæйнаг æмбæстæгтæ цыдысты, уыдоны цæмæй ма хъыг дардтаиккой æмæ сæрибарæй цыдаиккой Хуссар Ирыстонмæ, уый тыххæй посттæ иууылдæр, уыцы нымæцы Иммиграцион контролы управленийы пост дæр, сисын кодта республикæйы уæды хицауад. Фæстæдæр арæнхъахъхъæнджыты пост фæстæмæ æвæрд æрцыд, фæлæ абоны онг дæр Иммиграцион контролы управленийы пост æвæрд нал æрцыд æмæ дзы сæ кусджытæй уыцы бынаты ничи лæууы.
Республикæмæ æрцæуæг фæсарæйнаг æмбæстæгтыл эффективондæрæй контроль кæныны фæстиуæгæн Иммиграцион управлени æмæ Паддзахадон æдасдзинады комитет иумæ сорганизаци кодтой, цæмæй Уæллаг Рукъы арæнхъахъхъæнджытæ миграцион картæтæ дæттой фæсарæйнаг æмбæстæгтæн. Арæны сæрты рахизæг фæсарæйнаг æмбæстæгтæй миграцион картæтæ чи райсы, уыдон хæсджын сты, цæмæй æртæ боны æмгъуыдмæ бацæуой Миграцион контролы управленимæ, хыгъды слæууыны тыххæй, дарддæр хъуамæ рацæуой медицинон басгæрст, райсой медицинон бæлвырдгæнæн. Уый фæстæ миграцион картæ æмæ медицинон бæрæггæххæттимæ уыдон хъуамæ бацæуой паспортон-визæйон службæмæ рæстæгмæ регистраци саразыны тыххæй.
Цæмæй фæсарæйнаг æмбæстæгтæ республикæйы территорийыл рæстæгмæ кусой, уый тыххæй сæ миграцион управленийæ райсын хъæуы бардæттæн документ, РХИ-йы Хицауады 2011 азты 26 январы сфидаргонд уынаффæмæ гæсгæ.
Тыджыты Сослан куыд радзырдта, афтæмæй ацы азы 10 августæй РХИ-йы Паддзахадон æдасдзинады комитетимæ иумæ миграцион службæйы кусджытæ республикæйы æппæт территорийыл уагътой рейдон мадзæлттæ. Уыдон куыд сбæрæг кодтой, афтæмæй 277 фæсарæйнаг æмбæстагæй 23 адæймаджы арæны сæрты рахызтысты закъон фехалгæйæ, ома, республикæмæ æрбацыдысты æнæ фæхонгæйæ. Уыцы æмбæстæгты Паддзахадон æдасдзинады комитет арвыста республикæйæ.
Абоны бон Хуссар Ирыстоны территорийыл ис 254 фæсарæйнаг æмбæстаджы. Уыдон сты Таджикистан, Узбекистан, Сомихстон, Азербайджаны, Туркы æмбæстæгтæ. Ацы паддзахадтимæ Хуссар Ирыстонæн дипломатон ахастытæ нæй, фæлæ уыдон рæстæгмæ регистраци сты Уæрæсейы Федерацийы æмæ нæ республикæйы уæвæг арæзтадон фирмæты фæхуындмæ гæсгæ, кусынмæ æрцыдысты Хуссар Ирыстонмæ. Уæрæсейы Федерацийы регионтæй цы æмбæстæгтæ ис нæ республикæйы, уыдон дæр сты уыйас. Уыдонæн срегистраци кæнын фæндонæй у, ома, æнæмæнгхъæуæг нæу.
Управленийы сæргълæууæджы ныхæстæм гæсгæ, иууыл проблемондæр мигранттæ сты, Гуырдзыстонæй æрбацæуæг азербайджанæгтæ. Уыдон цалдæргай æзты дæргъы кусынц Хуссар Ирыстоны территорийыл æнæ закъонæй, нæй сын регистраци.
«Цалдæр хатты ацы мигрантты тыххæй алы инстанциты æмбырдты раразмæ кодтам фарст, фæлæ йыл кæд куыст цæуы, уæддæр нырма сæ фарст скъуыддзаг нæу», — загъта уый.
Тыджыты Сослан куыд загъта, афтæмæй ныридæгæн «Республикæ Хуссар Ирыстоны территоримæ кусæгон мигрантты æрбацæуын, территорийыл уæвын, территорийæ ацæуын æмæ кусæгон архайды тыххæй» закъоны проект райстой РХИ-йы Хицауад. Фæлæ цæмæй йæ тыхы бацæуа, уый тыххæй йæ хъуамæ райса Парламент дæр. Ацы закъон йæ тыхы куы бацæуа, уæд кусын дæр æнцондæр уыдзæн. Уымæн æмæ ныр цы уынаффæтæм гæсгæ кусæм, уыдон дзуапп нæ дæттынц кусæгон мигранттæм хауæг æппæт фарстатæн.
Цæмæй РХИ-йы Иммиграцион контролы управлени æххæстхъомысæй куса, уый тыххæй, мæнмæ гæсгæ, хуыздæр уаит Уæрæсейы Федерацийы фæлтæрддзинад куы райсиккой, æмæ йæ хицæн структурæ куы саразиккой.
ОСИАТЫ Индирæ