Nog adres

Зонындзинæдты бон — скъола-интернаты

1441129718_img_6293.jpg Куыд æппæт нæ республикæйы скъолаты, афтæ Зонындзинæдты бон банысан кодтой Цхинвалы скъола-интернаты дæр. 1-æм сентябрмæ ацы скъола йæхи бацæттæ кодта æмбæлонæй. Скъола-интернаты бæстыхайы раздæр уæвынад кодта РХИ-йы Ахуырад æмæ зонады министрад рæстæгмæ, фæлæ уыдон ахызтысты сæ раздæры бæстыхаймæ, кæцы æрцыд капиталон цалцæг.
Хатæнтæ кæй ссæрибар сты, уымæ гæсгæ скъола-интернатæн фæуæрæхдæр сты йæ авналæнтæ. Иумиагæй сисгæйæ кълæстæ æрцыдысты цалцæг. Ацы ахуыры азы райдианæй скъола-интернаты кусдзысты коррекцион кълæстæ фæкъуындæгдæргонд гæнæнтимæ сывæллæттæн.
1-æм сентябры ацы скъолайы къæсæрæй фыццаг хатт бахызтысты 14 фыццагкъласоны. Цытджын линейкæйы уыдон ныридæгæн равдыстой сæ арæхстдзинад, кастысты æмдзæвгæтæ, зарыдысты зарджытæ. Цытджын линейкæйы фыццагкъласонтæн «Иугонд Ирыстон»-ы минæвæрттæ балæвар кодтой скъолайы хызынтæ.
Цхинвалы скъола-интернаты цытджын линейкæмæ фæуазæг РХИ-йы Хицауады Сæрдар Хъуылымбегты Доменти, кæцы йæхæдæг дæр у ацы скъолайы рауагъдон. Уый зæрдæбын арфæ ракодта æрæмбырдуæвджытæн Зонындзинæдты боны цытæн. «Арфæ уын кæнын ног ахуыры азы фæдыл. Абон фыццаг хатт зонындзинæдты диссаджы дунемæ æрбакъахдзæф кодтой фыццагкъласонтæ æмæ мæ уæлдай арфæйы ныхæстæ зæгъын фæнды, уыдонæн, уымæн æмæ уыдон сты абоны бæрæгбоны сæйраг хъайтартæ. Абон кæд Октябры уынг змæст у, цалцæггæнæн куыстытæ дзы кæй цæуынц, уый аххосæй, уæддæр æввахс рæстæджы æрцæудзæн капиталон цалцæг, ныридæгæн уынджы иу хайыл æвæрд æрцыд асфальт. Сæйраг уый у æмæ абон нæ сывæллæттæ кæй рæзынц сабыр арвы бын Стыр Уæрæсейы руаджы. Абон нæ республикæйы арæзт цæуынц скъолатæ, сывæллæтты цæхæрадæттæ æмæ социалон нысаниуæджы æндæр объекттæ. Банысан кæнын хъæуы уый дæр æмæ абон нæ сывæллæттимæ иумæ кæй ахуыр кæнынц уæрæсейаг æфсæддон службæгæнджыты сывæллæттæ дæр. Мæ зæрдæ уын зæгъы, цæмæй ахуыр кæнат хорз. Хорз куы ахуыр кæнат, уæд уæ радтæг Ирыстоны никуы фæхудинаг кæндзыстут æмæ уый та махæн у нæ иууыл стырдæр хæрзиуæг», — загъта Хъуылымбегты Доменти.
Кæй зæгъын æй хъæуы, цытджын линейкæйы ракодтой скъолайы ахуыргæнджыты фæрныг куысты кой дæр. Ахуыргæнæджы куыст вазыгджын у, уымæн æмæ сывæллæттæ вæййынц алыгъуызон характертимæ æмæ сæ алкæйы зæрдæмæ дæр фæхъæуы фæндаг ссарын.

* * *
Хицауады Сæрдар Хъуылымегты Доменти скъола-интернатæй йæ фæндаг акодта 11-æм астæуккаг скъоламæ. Куыд скъоладзаутæ, афтæ ахуырадон уагдон дæр уыд бæ-рæгбонвæлыст, хъуыстысты дзы музыкæйы æхцон зæлтæ. Ацы скъолайы дæр æнæхъæн сæрд дæргъы цыдысты цалцæггæнæн-æндидзынгæнæн куыстытæ. Хуссар Ирыстоны рæзтæн ахъазгæнæг Инвестицион программæйы фæлгæтты цалцæг æрцыдысты скъолайы фасад, спортивон æмæ актон залтæ, кабинеттæ, уый æддейæ ма профилон кабинеттæ ифтонг æрцыдысты нырыккон домæнтæн дзуапп чи дæтты, ахæм ифтонггæрзтæй.
11-æм скъолайы къæсæрæй ацы ахуыры азы æрбакъахдзæф кодтой 15 фыццагкъласоны. Æввахс бонты уыдонæн æвæрд æрцæудзæн интерактивон фæйнæг, ахуырадон процесс дзы уагъд цæудзæн нырыккон стандарттæм гæсгæ. Æмæ уал нырма ахуыры фыццаг бон та ахуыргæнинæгтæ базонгæ сты сæ ахуыргæнæгимæ. Фыццагкъласонтæ кастысты æмдзæвгæтæ, бирæтæ сæ ныридæгæн зонынц кæсын æмæ фыссын.
Хъуылымбегты Доменти зæрдæбын арфæтæ ракодта æрæмбырдуæвджытæн. Ахуыргæнинæгтæ æмæ йæ ахуыргæнджытæн бафæндыд хорз æнтыстытæ сæ ахуыры хъуыддаджы. «Абоны фыццагкъласонтæ сты уыцы фæлтæр, кæцытæ райгуырдысты хæдбар æмæ нымад Хуссар Ирыстоны, рæзтысты сабыр арвы бын æмæ сын мæ зæрдæ зæгъы сæ дарддæры царды æрмæстдæр сабыр паддзахады цы цæрой. Абоны бон уыдон бахъуыды кæндзысты цæрæнбонтæм. Æгæрыстæмæй нæ Ирыстонæн иууыл уæззаудæр рæстæджыты дæр нæ республикæйы ахуыргæнджытæ никуы æрурæдтой сæ хæрзиуæгон хъомыладон архайд», — банысан кодта уый.
ДЖИОТЫ Е.