Nog adres

Фембæлд РЦИ-Аланийы Парламенты фыццаг хæдивæгимæ

IMG_5229.JPG Хуссар Ирыстоны Президент Тыбылты Леонид фембæлд РЦИ-Аланийы Парламенты Фыццаг хæдивæг Хъесаты Станиславимæ. Уый нæ республикæмæ æрцыд кусæгон балцы.
Фембæлды рæстæджы дзырд цыди Хуссар æмæ Цæгат Ирыстоны парламентты хаххыл æмгуыстады фарстыты фæдыл. Уымæй дарддæр ма Хъесаты Станислав æмæ фембæлды хайадисæг РХИ-йы Парламенты Сæрдары Фыццаг хæдивæг Мамиты Инал бæстæйы сæргълæууæгæн радзырдтой дыууæ республикæйы æхсæн æмгустады фæдыл æхсæнпарламентон бадзырдыл цæттæгæнæн куысты тыххæй.
«Разыйы гæххæттыл мах кусын райдыдтам РХИ-йы Парламенты V-æм æрсидты депутатты куысты рæстæджы, æмæ у цæттæ. Абоны бон ма мах хъæуы йе ппæт пункттыл дæр цæст ахæссын, йæ формалон хайыл ын бакусын. Æрбацыд нæм тынг цымыдисон фæндон, цæмæй йыл къух æрфыссæм Республикæйы 25 азы нысан кæныны бон», — загъта Хъесаты Станислав.
Тыбылты Леонид банысан кодта, ацы бадзырд райсынæн ахсджиаг нысаниуæг кæй ис, æмæ бахæс кодта æмбæлон службæтæн, цæмæй ныридæгæн цæттæ мадзæлтты нывæстмæ ба-хæссой бадзырд райсыны хъуыддаг дæр.
«Не ’хсæн ахастыты рæзт æмæ размæцыдыл дзурæг цыдæриддæр хъуыддаг у, уый мах зæрдиагæй исæм. Махæн алыхатт дæр æхсызгон у нæ цæгаттаг хæлæртты фенд. Фæнды мæ банысан кæнын, Ды Хуссар Ирыстоны æцæг хæлар кæй дæ. Нæ фарсмæ уыдтæ нæ уæззау азты дæргъы, æмæ абон дæр нæ уадзыс дæ куыст нæ иумæйаг фарстытыл», — загъта Президент.
Фембæлды ма хайад райста РХИ-йы Хицауады Сæрдар Хъуылымбегты Доменти.