Nog adres

Провокацион архайдтытæн бынат ма хъуамæ уа

P7203102.JPG Знон 20-æм июлы гуырдзиаг-ирон паддзахадон арæнмæ æввахс цæрæн пункт Эргнетмæ хæстæг Инциденттæ ма æруадзын æмæ сæм хъусдард здахыны Механизмты фæлгæтты уагъд æрцыд æнæрадон рабадт. Йæ сæйраг аххосаг уыд, фæстаг дæс боны дæргъы гуырдзиаг-ирон паддзахадон арæны периметрыл цы цаутæ æрцыд, уыдоныл æруынаффæ кæнын.
Хуссар Ирыстоны ‘рдыгæй делегацийы сæргълæууæг, Постконфликтон фарстатæ æрбæстон кæныны фæдыл Президенты æххæстбарджын минæвары хæ-дивæг Гаглойты Хох рабадты хæдразмæ информацион минæвæрттæн куыд фехъусын кодта, уымæ гæсгæ ивгъуыд провокациты бындур у Гуырдзыстоны мидхъуыддæгты министрады аналитикон департаменты æдзæттæ хъусынгæнинаг, кæцы фехъусын кодта, ома, «хуссарирыстойнаг арæнхъахъхъæнджытæ хуссар здæхты фехæлдтой паддзахадон арæнтæ».
«Уыцы хъусынгæнинагмæ стыр хъусдард аздæхтой фылдæр политикон æгъдауæй активон цæрджытæ, — паддзахадон арæны периметрыл сарæзтой массон æгъдауæй провокацион архайдтытæ. Хынцыд æрцыд арæн халыны къорд цауы. Уыцы рæстæджы ма Хуссар Ирыстоны паддзахадон символтæм ахасты арæзт æрцыд æнæхсæст, æфхæрæн архайдтытæ дæр. Уыцы хъуыддæгтæ Хуссар Ирыстоны фарсæрдыгæй, кæй зæгъын æй хъæуы, æнæхъус-дардæй нæ баззадысты.

Арæнхъахъхъæнæг дæлхæйттæ уавæрмæ сæ хъус дардтой, цæмæй сабырдзинад æмæ стабилондзинад хъахъхъæд цыдаид», — банысан кодта Гаглойты Хох.
Гуырдзыстоны радон къахдзæф дзурæг у ууыл, æмæ дзы бирæ пропагандистон архайдтытæн ис бынат. Уымæй саразæн ис бирæ хатдзæгтæ. Уымæн æмæ, ома, Гуырдзыстон цы территоритæ фесæфта, уыдон фæстæмæ хъуамæ раздаха. Гаглойты Хох гуырдзиаг æхсæнад æмæ информацион фæрæзтæн куыд фехъусын кодта, уымæ гæсгæ уый у мæнг дзæнгæда æмæ йын æппындæр ницы бындур ис. Уыцы мæнг дзæнгæдайæ пайда кæнынц хæц-цæ гуырдзиаг политикон класс, æмæ сæ æнæхъола ныхæстæй эксплуатаци кæнынц се ’хсæнады конкретон политикон здæхты.
Дарддæр Гаглойты Хох банысан кодта, фæстаг рæстæджы цауты фæдыл АИШ-ы минæвар Гуырдзыстоны Нулланд æмæ Паддзахадон Департаменты минæвар Кирбийы æнæкомпетентон хъусынгæнинæгтæ. Уыцы хъусынгæнинæгты, сæйраджыдæр, дзырд цæуы ууыл, ома, уыцы территори (Хуссар Ирыстон) у Гуырдзыстоны суверенон территори.
Ацы адæм æмæ се ’мхъуыдыгæнджытæм лæвæрд цæуы фарст — суверенон территорийыл дзырд куы цæуа, уæд сæ хъуыдыйы ис, Советон Цæдисы ныппырхæй фæстæмæ Хуссар Ирыстон æмæ йæ цæрджытæ кæй нæ райстой ног сæвзæргæ Гуырдзыстоны æмбæстагдзинад? Кæнæ та Гуырдзыстон «уæрæх дунеон банымад» райста 92-æм азы кæрон, Советон Цæдис куы ныппырх, уымæй афæдз æмæ æрдæджы фæстæ. Уый арæзт æрцыд, Гуырдзыстоны къухдариуæгадмæ Эдуард Шеварднадзе куы æрцыд æмæ афтæхуыйнæг «дунеон æмæхсæнад» Шеварднадзейы имидж, фидауынгæнæг æмæ æнтыстджын дунеон архайæгыл цæмæй банымадтаиккой, уый тыххæй. Уымæ гæсгæ Гуырдзыстоны паддзахаддзинад уæд нымад æрцыд авансæй.
«Господин Кирби, Нулланд æмæ æндæртæн ныр дæр сæ зæрдыл лæууы, Гуырдзыстон уæрæх банымад кæй райста, йæ территорийыл дыууæ этникон хъаугъайы куы уыд, уæд. Уыцы дунеон банымад уыд дунеон стандарттæ алыварсонæй фехалыны рæстæджы. Адæмты ’хсæн ахастыты историйы ис рæдыдтытæ, фæлæ стæм хатт бæстон цыдысты бадзырдтыты руаджы. Уый фæстиуæгæн. 1992 аз, 2004, 2008 азтæ уыдысты æдзæттæ, æнæкомпетентон, æнæбацæттæгонд позициæвдисæг, кæцы равдыста дунеон æмæхсæнад 1992 азы.
***
Механизмты куыстæн фæстиуджытæ аразгæйæ, Гаглойты Хох банысан кодта, зæгъгæ, фембæлды рæстæджы хайадисджыты зæрдыл æрлæууын кодтой, арæнгæрон нысæнттæ арæх нысанмæздæхтæй æхст кæй цæуынц æхсæнгæрзтæй. Фæстаг дæс боны дæргъы цы провокацион цаутæн уыд бынат, уыдонæн хуссарирыстойнаг фарс аргъ кæны куыд æфхæрæн, æнæраны архайдтытæ. Хайадисджытæн, сæйраджыдæр, гуырдзиаг фарсæн бамбарынчындæуыд: ахæм архайдтытæн ма бынат куы уа, уæд сæм здæхт æрцæудзæн æмбæлон хъусдард.
«Дунеон организациты æмсæрдæрттæ дæр равдыстой цæттæдзинад, кæй кусдзысты регионы сабырдзинадыл.
Бадзырдты рæстæджы ма дунеон организациты иу минæвар цы хатдзæг сарæзта, уымæ дæр мах аздæхтам серьезон хъусдард, ома, Хуссар Ирыстоны территорийыл гуырдзиаг цæрæг адæм равдыстой фæндондзинад, цæмæй æнгæс æмбæстагон активисттæ сæ территоримæ ахæм провокацитимæ мауал цæуой», — банысан кодта Гаглойты Хох.
Тыллæг æфснайыны фæстиуæгæн арæх хæлд æрцæуынц паддзахадон арæнтæ. Уый фæдыл дæр дзырд цыд Механизмты куысты. Хуссарирыстойнаг делегацийы сæргълæууæг куыд банысан кодта, уымæ гæсгæ уыцы Механизмтыл куыст цæуы æмæ æввахс рæстæжы скъуыддзаг æрцæудзæн.
Хуссар Ирыстоны Ленингоры районы Орчъосаны хъæуы нефтуадзæн хаххы тыххæй фарст гуырдзиаг информацион фæрæзты æгæр карзæй æвдыст у. Гаглойты Хохы ныхæстæм гæсгæ уыдон сты гуырдзиаг адæмы мæнг хъуыдытæ. Уыцы фадыджы рагæй фæстæмæ дæр уыд нефтуадзæн хахх.
Хуссар Ирыстоны Арæнгæрон территорийыл амонæн нысæнттæ гуырдзиаг фарсы ’рдыгæй хæлд куы цыдысты, уæд дзы хайад райстой информацион фæрæзты минæвæрттæ дæр — ахæм информаци дæр ис. Уый фæдыл Хох радзырдта, зæгъгæ, Æфсæддон прокуратурæ архайы ацы фарстыл æмæ рахæсдзысты конкретон хатдзæгтæ.
КЪÆБУЛТЫ Маринæ