Nog adres

Фембæлд Мамсыраты Таймуразимæ

РХИ-йы Президент Тыбылты Леонид фембæлд Цæгат Ирыстон-Аланийы раздæры Сæргълæууæг Мамсыраты Таймуразимæ, кæцы уыд Хуссар Ирыстоны уазæг.
Фембæлды рæстæджы бæстæйы сæргълæууæг дзырдта Мамсыраты Таймуразы бирæ лæггæдты тыххæй æмæ банысан кодта, зæгъгæ, уый Хуссар Ирыстоны уæззау дуджы, 2008 азы августы æдзух уыд нæ адæмы фарсмæ.
«Цæгат Ирыстоны Сæргълæууæджы бæрнон бынаты кусгæйæ, ды уыдтæ цытджын разамонæг, кад дын кодтой де ’мкусджытæ», — загъта Президент.
Тыбылты Леонид загъта, зæгъгæ, Мамсыраты Таймураз цы стыр фæлтæрддзинады хицау у, уый абон дæр тынг кæй фæпайда уыдзæн нæ райгуырæн къуымы, Уæрæсейы хæрзиуæгæн нæ куысты.
Йæхирдыгæй Мамсыраты Таймураз дæр банысан кодта, зæгъгæ, «кæддæриддæр райзæрдæйæ æрцæуы Хуссар Ирыстонмæ, йе ’мтуг æмæ йе ‘мыстæг æфсымæрон адæммæ».
«Мæ алы æрцыды рæстæджы дæр æз уынын ног хæрзиуæгон ивындзинæдтæ. Уый уæлдай тынгдæр зыны, пырх хæдзарад куыд æндидзы, ууыл. Бæрæг у, куыд тагъд рæзынц бæстыхæйттæ, Цхинвал хæрзвадат куыд кæны», — банысан кодта уый.