Nog adres

Нæ хъысмæт æмбаст у Уæрæсейы хъысмæтимæ

Цалдæр боны ма баззад Уæрæсейы Федерацийы президентон æвзæрстытæм. Куыд зонæм, афтæмæй æвзарæн фадгуытæ бакондæуыдзæн Хуссар Ирыстоны дæр, цæмæй мах дæр, Хуссар Ирыстоны цæрæг Уæрæсейы Федерацийы æмбæстæгтæ, спайда кæнæм нæ Конституцион бартæй æмæ хайад райсæм уыцы æвзæрстыты.
Ирыстоны истори дзыккубыдау быд у Уæрæсейы историимæ, йемæ нæ фыдæлтæ сæ хъысмæт фидар сбастой. Фыдæбойнаджы бонтæ æмæ нын цины бонтæ иу уыдысты æмæ сты, куыд фæзæгъынц - нæ цин дæр æмæ нæ хъыг дæр иу у. Нæ фыдæлты разагътадæртæ-иу Уырысы æфсады службæ кодтой, бирæтæ дзы инæлæрттæ дæр систы. Уыдонæй Ирыстон кæддæриддæр сæрбæрзонд уыд. Алы хæсты дæр уырыссаг салдат æмæ ирон салдат уæхски-уæхск тох кодтой. Цæвиттонæн фаг у Стыр Фыдыбæстæйон хæст дæр. Нацийы бæрцмæ гæсгæ ирæттæй фылдæр Советон Цæдисы Хъайтартæ никæцы адæмæй уыд. Уымæй зæгъæн ис - Уæрæсеимæ нæ фæндаг иу уыд æмæ йыл иумæ æмдзу кодтам æмæ дарддæр дæр æмдзу кæнæм. Мах хъуамæ бацархайæм, цæмæй нæ кæстæртæ уыцы фæндагæй ма фæиппæрд уой, æндæр фæндаг нæ сæрсæфæнмæ кæны.

Хъыгагæн, не 'хсæнады фæзынд иуæй-иу адæймæгтæ, кæцыты нæ фæнды, цæмæй нæ адæм хайад райсой Уæрæсейы президентон æвзæрстыты. Кæй зæгъын æй хъæуы, уыдоны фæндон нæ бандавдзæн нæ адæмыл, фæлæ кæ-мæдæрты æвзæрын кæны куыдфæндыйы ахаст, ома, хъæлæс куынæ радтон, уæддæр ын ницы у. Уый раст хъуыды нæу. Мах хъуамæ фенын кæнæм нæ ахаст Уæрæсейы Федерацимæ, хъуамæ йын бауырнын кæнæм, Уæрæсейы хъысмæтмæ куыдфæндыйы цæстæй кæй нæ кæсæм. Хорздзинадæн аргъ кæнын нæ бон кæддæриддæр хъуамæ уа. Уымæй саргъ кæндзыстæм нæхицæн дæр æмæ нæ фы-дæлтæн дæр.
Уый кæуылты хъуыддаг уыд æмæ 2008 азы 26 августы Уæрæсейы Президент Дмитри Медведев, æнæхъæн дуне йæ ныхмæ суыдзысты, уый зонгæйæ, равдыста фидардзинад æмæ банымадта Хуссар Ирыстоны хæдбардзинад. Уымæй æрурæдта хуссайраг ирæтты геноцид, кæрон скодта Хуссар Ирыстоны адæмы хъизæмæрттæн.
Махæй рох ма хъуамæ уа, 20 азы дæргъы кæй ныфсæй баззадыстæм удæгас, кæй тасæй нæ нæ аныхъуырдтой нæ сыхаг «кæфхъуындартæ», 2008 азы августы Хуссар Ирыстонæй кæй фæрцы нæ сарæзтæуыд «тыгъд быдыр». Нæ цæст ахæссæм нæ ивгъуыдыл, нæ фидæныл дæр ахъуыды кæнæм, нæ цæстытыл ауайын кæнæм, æнæ Уæрæсейæ нæм цы æнхъæлмæ кæсы, уый. Мæнмæ гæсгæ ничи дызæрдыг кæны, æнæ Уæрæсейы æххуысæй махæн ам цæрын тынг кæй фæзын уыдзæн, нæ фыдбоны сыхæгтыл æндзыгниз куы схæца æмæ нæ куы ныхъуыдты кæной, уæддæр.
Мæн уырны, ирон адæм никуы ферох кæндзысты Уæрæсейы хорздзинæдтæ æмæ уый нысанæн 4 марты, хъæлæс дæттыны бар кæмæн ис, уыдон иууылдæр хъæлæс ратдзысты, нæ тыхсты рæстæджы нæ фарсмæ чи балæууыд æмæ нæ фыдбылызæй чи бахызта, чи ныл ауды æмæ нæ республикæ кæй фæцы æндидзы, уыцы Уæрæсейы рухс фидæны тыххæй. Уымæй мах фæахъаз уыдзыстæм нæ республикæйы размæцыдæн дæр.
ОСИАТЫ И.