Nog adres

Фембæлд Цхинвалы «Спартак»-ы футболисттимæ

IMG_3262.JPG 7-æм июлы Республикæ Хуссар Ирыстоны Президент Тыбылты Леонид фембæлд нæ республикæйы футболон командæ «Спартак-Цхинвал»-ы футболисттæ æмæ сæ тренертимæ. Фембæлды ма хайад райстой РХИ-йы Фæсивæдон политикæ, спорт æмæ туризмы фæдыл комитеты сæрдар Зассеты Сергей, РХИ-йы футболы Федерацийы президент Джиоты Алан, «Спартак»-ы раздæры футболон командæйы хъазджытæй сæ иу — Тедеты Æхсар æмæ тренер Джиджджойты Алан.
Паддзахады сæргълæууæг йæ раныхасы банысан кодта, зæгъгæ йæ рагæй фæндыдис фембæлын футболисттимæ æмæ йын тынг æхсызгон у ацы фембæлд.
«Мæнæн тынг æхсызгон уыдис, знон Дзæуджыхъæуы футболон командæ „Алания“ æмæ нæ командæ „Спартак“-æн цы хæларадон хъазт уыдис, уырдæм æрбацæуын æмæ хъазтмæ бакæсын. Æз бузныг зæгъын уыцы лæппутæн, кæцытæн сæ хъуыдыйы æрцыдис, цæмæй иу уысм æмырæй алæугæйæ, ссардтаиккой хæларзæрдæ æмæ йæ райгуырæн бæстæйы патриот Бестауты Василийы (Хабейы) рухс ном», — банысан кодта Тыбылты Леонид.
Фембæлды хайадисджытæм бæстæйы сæргълæууæг бахатыд, цæмæй ныр дæр, иу уысм æмырæй алæугæйæ, ссарой Бестауты Василийы (Хабейы) рухс ном.
Уый фæстæ Зассеты Сергей радзырдта, абон нæ футболисттæн цы проблемæтæ ис æмæ сын сæйрагдæр цы хъæуы саразын, æппæт уыдæттыл.
«Абон ацы æвзонг лæппуты фæрцы махæн ис футболон командæ. Уыдон сæ чысылæй фæстæмæ хъазынц футболæй æмæ афтæ зæгъæн ис, футбол кæй у сæ цард. Кæй зæгъын æй хъæуы, спорты ацы хуызы ис проблемæтæ. Иууыл сæйрагдæр проблемæ сын ныртæккæ у, штаттæ сын кæй нæй æмæ уымæ гæсгæ куыстмыздтæ дæр кæй нæ исынц. Абон ацы футболисттæн сæ фылдæр сты æгуыст æмæ мызд никуыцæй нæ исынц, уымæ гæсгæ тыхсынц, зындзинæдтæ æвзарынц. Иннæ проблемæ та сын у се ‘нæниздзинады фарст. Футбол ахæм хъазт у, æмæ дзы арæх хъазджытæ райсынц травмæтæ æмæ сын фæхъæуы медицинон æххуыс бакæнын. Мах ацы хъуыддаджы тыххæй ныхас кодтам РХИ-йы Æнæниздзинад хъахъхъæныны министримæ дæр, æмæ нын загъта, зæгъгæ, нырма сæ тыхы кæй нæй ацы фарст аскъуыддзаг кæнын æмæ йыл кæй хъæуы бакусын. Фæлæ мæнмæ гæсгæ фыццаджыдæр уал хъæуы скъуыддзаг кæнын æгуыст кæй сты æмæ куыстмызд кæй нæ исынц, уыцы фарст», — загъта Зассеты Сергей.

Ацы проблемæтимæ Президент Тыбылты Леонид хорз зонгæ у æмæ сæм уымæ гæсгæ аздæхта серьезон хъусдард. Уый банысан кодта, зæгъгæ, къухдариуæггæнджытæ хъуамæ лæмбынæг хъусдард здахой, æхсæнады цы фарстатæ сæвзæрынц, æппæт уыдонмæ. Уыдоны æмрæнхъ, спортивон царды цы проблемæтæ уæвынц, уыдонмæ дæр.
«Мах, кæй зæгъын æй хъæуы, хъуамæ саразæм æппæт дæр, цæмæй ацы æвзонг лæппутæ исой куыстмызд. Æз, куыд бæстæйы сæргълæууæг, афтæ ныфс æвæрын, ацы мæйы æмгъуыдмæ скъуыддзаг кæй æрцæудзысты уæлдæр банысангонд фарстатæ æмæ сын кæрон кæй скæндзыстæм», — загъта Тыбылты Леонид.
Фембæлды рæстæджы спортсментæ бузныджы ныхæстæ загътой Тыбылты Леонидæн, йæхимæ сæ кæй райста æмæ сын сæ хъазты рæстæджы сæ командæйы фарс кæй хæцыд, афтæ ма сын сæ фарстатæ скъуыддзаг кæнынмæ лæмбынæг хъусдард кæй здахы, æппæт уыдоны тыххæй.
Командæйы тренер Пухаты Руслан та фæндон бахаста, цæмæй нæ республикæйы цы бирæ сывæллæттæ хъазынц футболæй, уыдонæн фидой стипендитæ, уымæн æмæ ахæм хæрзиуæгон хъуыддаг ахъаз фæуыдзæнис фидæны футболы размæцыдæн. Пухаты Руслан ма куыд банысан кодта, уымæ гæсгæ нæ футболисттæ республикæйæ æдтæмæ куы ацæуынц, уæд сыл бандавы, финансон æххуыс сын кæй не ’рцæуы, уый æмæ уымæ гæсгæ зындзинæдтæ бавзарынц.
Тренеры фæндонимæ сразы ис Президент Тыбылты Леонид æмæ банысан кодта ацы спорты размæцыды нысаниуæг.
«Мах ацы хъуыддагмæ æркæсдзыстæм æмæ агурдзыстæм фæрæзтæ, цæмæй сывæллæттæ ноджы тынгдæр цымыдис кæной футболмæ æмæ йæм тырной. Афтæ куы уа, уæд сын фидæны та уыдзæнис æнтыстытæ», — загъта кодта Тыбылты Леонид.
Фембæлды рæстæджы ма сæ хъуыдытæ дзырдтой иннæ тренертæ дæр. Джиджджойты Алан загъта, зæгъгæ, сæ машинæ фехæлд æмæ кæйдæр машинæтыл сæ хъуыддæгтæ фæаразынц. Ацы проблемæ аскъуыддзаг кæныны тыххæй та сын Президент банынфсæвæрдта, цæмæй фыстæг æрбар-витой æмæ йын уæд йæ финансон хæрдзтæ йæхимæ кæй райсдзæн.
Дарддæр фембæлды футболы тыххæй йæ хъуыдытæ загъта Джиоты Алан дæр. Уый, фыццаджыдæр, бузныг загъта фембæлды тыххæй æмæ банысан кодта, бирæ азты дæргъы футболмæ хъус лæмбынæг кæй дары æмæ йын йæ проблемæтимæ дæр хорз зонгæ кæй у. Мах, зæгъгæ, абон хъæуы лæмбынæг хъусдард аздахын ацы спортмæ, уымæн æмæ у тынг популярон æмæ йæм нæ сывæллæттæ дæр тынг цымыдис кæнынц.
Джиоты Алан ма фæндон бахаста, цæмæй нæ республикæйы ауадзой лотерея æмæ дзы цы æхцайы фæрæзтæ æртымбыл уой, уыдон нысанмæздæхтæй бахардз æрцæуой ацы спорт райтынг кæныны сæраппонд. Тыбылты Леонид ацы хъуыдыйы фæдыл сразы ис æмæ ма сын ныфс дæр бавæрдта, лотерейон билеттæн сын æхцайы фæрæзтæ дæр кæй ссардзæнис.
Фембæлды рæстæджы ма дзырд цыдис бирæ æндæр актуалон фарстаты фæдыл æмæ кæронбæттæны та футболисттæ зæрдылдарынæн Президент Тыбылты Леонидимæ систой сæ къамтæ.
ЦХУЫРБАТЫ Ларисæ