Nog adres

«Чермен»- ы лæггæдтæ

DSCF5210.JPG Алы ногдзинады фæзындыл дæр æмбæстæгтæ фæцин кæнынц, сæ зæрдæмæ йæ арф айсынц. Кæй зæгъын æй хъæуы, хæрзиуæг тауæг сын куы уа, уæд. Ахæм цины æнкъарæнтæ нæ республикæйы æмбæстæгтæн бавзарын кодта киноконцертон бæстыхай «Чермен» нæм арæзт куы æрцыд, уæд уый дæр. Цæмæй бæстондæр базонгæ уæм йæ куыст æмæ архайдимæ, уый тыххæй æрæджы фембæлдтæн йæ директор Саулохты Константинимæ æмæ уый афтæ радзырдта:
— «Чермен»-ы бæстыхай йæ дуæрттæ байгом кодта ивгъуыд аз октябры мæйы æмæ уал сындæггай нæхи тыхтæй лæггад кæнын райдыдтам нæ цæрджытæн. Бындуронæй та Уæрæсеимæ кусын райдыдтам ацы аз анвары мæйæ фæстæмæ. Сæйраджыдæр, Мæскуыйæ исæм, цы кинонывтæ сæм вæййы, уыдон. Цæвиттон, ног кинонывы премьерæ æвдисынц Мæскуыйы, уæд нæ киноуарзджытæн фадат вæййы, уыцы бон йæ фенынæн. Афтæ æмæ Уæрæсейы куыд кусынц, мах дæр ныр уыцы хаххыл кæнæм нæ куыст, ома сæ прокаты цыдæриддæр кинонывтæ рацæуы, уыдон вæййынц махмæ дæр.

— Æмæ уыцы прокат кæцæй сфæрæз кæнут?
— Мæскуыйы ис «Киноэксперт»-ы компани, растæндæр уый кусы кинонывтæ дих кæныныл. Ацы компани йæхæдæг та кусы, прокат чи уадзы, уыдонимæ, уымæй сæ исы æмæ сæ æндæртæн, уыцы нымæцы махæн дæр æрвиты.
— Тагъд сæ райсут æви уын исты къуылымпытæ сæвзæры уыцы хъуыддаджы?
— Амæйразмæ нын сæрмагонд фæлындзынад æрæрвыстой æмæ йæ хъуамæ рæхджы сæвæрæм. Уыцы хъуыддаг куы срæвдз уа, уæд нын-иу Мæскуыйæ комкоммæ кинонывтæ радæтдзæн, афтæ хуыйнæг Сервер, зæгъгæ, уый. Нырмæ уал та сæ æрвыстой Дзæуджыхъæуы «Терек»-мæ, уыдон та нæм сæ уырдыгæй хæццæ кодтой. Кæй зæгъын æй хъæуы, æрвитæггагæн ницы фыстам, нæ къухы-иу бафтыдысты зонгæтæ æмæ хиуæтты фæрцы. Зæгъын ма мæ фæнды кинонывты æргъты тыххæй дæр, уыдон дæр сты алыгъуызон. Зæгъæм, ис ахæм компани, «Wold Disney», зæгъгæ, уымæн йæ кинойы аргъ у 50 мин сомы, ома йын уый бæрц хъуамæ бафидай, куы йæ æрæрвитой, уæд. Компани «XX æнус»-æн та йæ кинонывы аргъ у 30 мин сомы. Кинодзау дæм æрбацыд æви не рбацыд, уымæ нæ кæсгæйæ, фидын хъæуы алы кинойæн дæр. Киноныв нæм экраныл фæцæуы дыууæ къуырийæ æртæ къуыримæ, бирæ хатт суанг мæйы дæргъы дæр.
— Прокат ам, бынаты баззайы, æви йæ фæстæмæ арвитут?
— Сæхи дисктæ æрæрвитынц чемоданы, мах æй ам Сервермæ ракæнæм æмæ сын æй уый фæстæ æрвитæм сæхимæ. Мах нæхицæн «Чермен»-ы сарæзтам пост æмæ нын уырдæм æрвитдзысты киноныв. Зæгъын хъæуы уый, кинонывæн кæй хъæуы йæхи дæгъæл æмæ йæ кæныс уымæй, кæннод дын æй нæ равдисдзæн. Алы кинотеатрæн æмæ алы кинонывæн дæр ис сæхи дæгъæлтæ.
— Кинонывтæ боны дæргъы цал хатты равдисут?
— Уый кæнгæ у, киноныв цас рæстæг фæцæуы, уымæй, уымæ гæсгæ сты сеансты нымæцтæ дæр. Боны дæргъы кинодзауæн равдисæм 5-6 сеансы. Билеты аргъ дæр æвæры Мæскуы. Махмæ иу сеансы аргъ къаддæр у — 200 сомы, иууыл фылдæр та — 250 сомы, Дзæуджыхъæуы та у 350 сомы. Ног киноныв куы вæййы, уæд нæм бон æрбацæуы 100-150 адæймаджы. Фылдæр адæм нæм фæцæуы хуыцаубонты, уымæн æмæ уæд Уæрæсейы æфсæддонтæн вæййы улæфт. Киноконцертон залы æдæппæт ис 326 бынаты.
— Кинонывтæй дарддæр ма цахæм лæггæдтæ кæнут æмбæстæгтæн?
— Зæгъын хъæуы, фылдæр кæй кусæм кинойы хаххыл, фæлæ ма дзы уыимæ иумæ æндæр æмæ æндæр коллективтæ, афтæ ма хицæн зарæггæнджытæ дæр кæй февдисынц концерттæ дæр.
— Концерты хицау уын бынаты тыххæй исты проценттæ ныууадзы?
— Амæйразмæ Культурæйы министрады коллегийы аскъуыддзаг кодтой, цæмæй æрцæуæггаг коллектив концерты тыххæй махмæ фида иу бонæн 30 мин сомы. Бынæттон коллектив кæнæ хицæн зарæггæнæгæн та хонæн билеттæй куы æрбацæуой, уæд иу бонæн уадзы 5 мин сомы, билеттæ куы ауæй кæна, уæд та «Чермен»-æн хъуамæ бафида 20 %, ома, цы æхцайы фæрæзтæ æрбацæуой, уыдонæн сæ 20%.
Æнæуи та нæ кусджыты нымæц у 22 адæймаджы, сты техникон кусджытæ. Алчи дæр сæ йæ куыстмæ кæсы бæрндзинады цæстæй æмæ йæ æххæст дæр кæны цæсгомджынæй. Кусы нæм хъæрмадон системæ, ифтонг стæм донæй, у нæм райдзаст æмæ хæрзæфснайд, кусы нæм кафе дæр. Иудзырдæй, «Чермен»-ы культурон лæггæдтæ бирæ сты æмæ уымæ гæсгæ сси не ’мбæстæгты уарзон бынат.
ХУЫБИАТЫ Н.