Nog adres

Рæхджы арæзт фæуыдзæн

DSCF5145.JPG Фæндагаразæджы куыст æнцон нæу, судзгæ тæвд хуры тынты дæр ницæмæ фæдарынц, афтæмæй фæтагъд кæнынц сæ куыстыл. Уыцы бон дæр хур йæ тæвдæй нæ «фæхъыг» кодта, Абайты Васойы уынджы хæрзарæзтадыл чи куыста, уыдон. Сæ фезмæлдæй бæрæг уыд, ахæм тæвд бон мурмæ дæр кæй нæ дарынц, уый. Кусджыты уæлхъус баййæфтон «Сыгъзæрин кæсаджы» генералон директор Бибылты Дауыты, йæ хъус дардта куыстыты цыдмæ æмæ йæ цæстæнгасыл бæрæг уыд, сæ арæхстджын фезмæлдæй кæй рухс кодта йæ зæрдæ.
Уынджы арæзтадон куыстытæ æххæст кæныныл амæйразмæ архайдта æндæр организаци æмæ уымæн дæр зæххы бын коммуникацитæ банывыл кæныны хъуыддаджы бантыст дзæвгар саразын. Фæлæ, уымæ нæ кæсгæйæ, уæддæр кусджытæ ныр дæр сæ хъус дарынц æмæ бæрæг кæнынц, цæмæй дзы мацы згъуыдтæ аивæрза.

Фæндаджы дæргъ Сталины уынгæй Джиоты Аланы проспектмæ у 225 метры æмæ йæ фæтæн та-6 метры. Нарæг кæй у, уымæ гæсгæ дзы автотранспорт цæудзæн æрмæстдæр иуæрдæм. Уыцы бон кусджыты иу хай лыг кодта, цæрæн хæдзæртты фæрсты æддейæ цы æрдзон газы хæтæлтæ цыд, уыдон, иннæтæ та техникæйы фæрцы къахтой зæхх. Хъуыддаг уый мидæг ис, æмæ ацы бынаты дæр нырæй фæстæмæ æрдзон газ цæудзæн зæххы бынты.
Ацы бонты кусджытæ æвæрынц бордюртæ, уынг кæронмæ сраст кæндзысты æмæ уый фæстæ цæттæ уыдзæн асфальты цъар æвæрынмæ. Дыууæрдыгæй фарс дæр уыдзæн тротуартæ, уыдон та рафидауын кæндзысты плиткæтæй. Фæндагаразджытæй алчи дæр тындзы йæ куыст рæстæгыл æмæ гъæдджынæй ахицæн кæныныл. Райсом бавналынц 6 сахатыл æмæ фæкусынц суанг æхсæвы 11-12 сахаттæм. Цæмæй уынг æмбæлон гъæдыл арæзт æрцæуа, уый тыххæй йыл уæззау техникæ дыууæрдæм ацæуы 8-10 хатты. Ифтонг сты, кусы-нæн сæ цы техникæ хъæуы, æппæт уыдонæй. Кусгæ та дзы кæны 16 адæймаджы, се ппæт дæр бындуронæй сты бынæттон кусджытæ.
ХУЫБИАТЫ Н.