Nog adres

Дзырдтой бæрæгбон æмæ куысты фæстиуджытыл

IMG_7191.JPG Уæрæсейы хæдбардзинады бæрæгбоны хæдразмæ Хуссар Ирыстоны Президент йæхимæ райста республикæйы скъолаты уырыссаг æвзаг æмæ литературæйы ахуыргæнджыты иу къорды. Фембæлдмæ ма Президент фæхуыдта Уæрæсейæ Хуссар Ирыстоны бæрнджын минæвар Къарджиаты Эльбрус æмæ «Россотрудничество»-йы разамонæг Михаил Степановы. Фембæлды ма хайад райстой Хуссар Ирыстоны дзыллон информацийы фæрæзты минæвæрттæ. Президент йæ раныхасы райдианы ’рхонгæ уазджытæн раарфæ кодта Уæрæсейы хæдбардзинады боны цытæн. Банысан кодта, зæгъгæ, уырыссаг æвзаг дардыл æмæ тыхджын у, йæ ахадындзинад уæрæх, бирæ бæстæтæ æмæ дзы адæмтæ пайда кæнынц. Ирыстонæн æнæ уырыссаг æвзаг цæрын æнцон нæ уыдзæнис. Уымæн æмæ æппæт нæ ахсджиаг æмæ аразинаг хæстæ аскъуыддзаг кæныны сæраппонд ныхас кæнæм уырысаг æвзагыл.
— Æз уе ’ппæтæй дæр сæрыстыр дæн, уырыссаг æвзаг æмæ литературæмæ хорз хъусдард кæй здахут, скъолаты йæ нæ сомбоны фæлтæртæн кæй амонут, уый тыххæй, зæгъын уын стыр бузныг.

Уырыссаг æвзаг зонын, уый фаг нæу, уырыссаг æвзаг хæсджын стæм æмæ йæ хъуамæ зонæм тынг хорз. Уырны ма мæ ацы ныхæстæ мын кæй фехъуыстат æмæ сæ уæ дарддæры куысты хатдзæгтæ дæр кæй араздзыстут, уый, — банысан кодта Президент.
Президент сæрмагондæй раарфæ кодта æмæ бузныджы ныхæстæ загъта Хуссар Ирыстоны Ахуырад æмæ зонады министр Гасситы Наталийæн, ахуыргæн-джытæн уавæртæ аразыныл æппынæдзух йæ иузæрдион архайд æмæ куыстыты тыххæй.
Президент бузныджы ныхæстæ загъта «Россотрудничество»-йы разамонæг Михаил Степановæн, æрвылаз дæр сæм алыгъуызон къордтæ æмæ кружоктæм ссæдзгай сывæллоны кæй цæуы, семæ æмбæлон æмæ æнувыд куыст кæй кæнынц уырыссаг æвзаг æмæ сæ литературæйыл кæй цайдагъ кæнынц, уый тыххæй.
Уырыссаг æвзаг цæрæнбонты нæ фыдæлтæн æмæ абон махæн дæр у уарзон æвзаг. Ныр та нын ноджы дæр садджын, æрбангомдæр нæм ис, уымæн æмæ ныр цалдæр азы нæ республикæйы нымад у паддзахадон æвзагыл, — банысан кодта Президент.
Æцæгдæр, уырыссаг æвзаг нæхи æвзагау кæй уарзæм, нæхи æвзагау ын стыр кад æмæ аргъ кæй кæнæм, уый ма бæрæг у уымæй дæр, æмæ ацы цытджын æмæ стыр бæрæгбон Уæрæсеимæ нысан кæнæм иумæ, иугъуызон.
Ир æмæ Уæрæсейы æмахастыты тыххæй «Россотрудничество»-йы разамонæг Михаил Степанов банысан кодта, зæгъгæ, «Россотрудничество» дунейы кусы 80 бæстæйæ фылдæры. Алкæцы бæстæйы дæр нæ куыст цæуы хорз. «Хъаст никæцы бæстæйæ кæнæм, фæлæ хуыздæр æмæ æппæтæй хъармдæр ахастытæ æнкъарæм Хуссар Ирыстоны», — уый тыххæй Михаил Степанов бузныджы ныхæстæ загъта, сæйраджыдæр, Президент æмæ Хицауады разамонджытæн, фембæлды хайадисджытæн æмæ Хуссар Ирыстоны цæрæг æппæт адæмæн дæр.
Фембæлды раныхас кодтой Хуссар Ирыстоны Уæрæсейы Федерацийы Уæлвæткон æмæ Æххæстбарджын минæвар Къарджиаты Эльбрус, Хуссар Ирыстоны Ахуырад æмæ зонады министр Гасситы Натали æмæ æндæртæ.
Уый фæстæ Президент йе ’рхонгæ уазджытæн радта хорзæхтæ, лæвæрттæ, дидинджытæ æмæ хæларадон ахастыты уавæрты семæ бацымдта цай. Цай цымыны рæстæджы ахуыргæнджытæ æмæ президенты ’хсæн бацайдагъ хъуыддагон ныхас. Дзырдтой, аразын сын цы бантыст æмæ ма аразинаг цы ис, сæ цухдзинæдтæ æмæ æнтыстытыл, сæ уавæртыл. Уыцы рæстæджы Президент фæндон бахаста, цæмæй æрвылаз дæр республикæйы уагъд цæуа уырыссаг æвзаг æмæ литературæйы ахуыргæнджыты республикон олимпиадæ. Уый уымæн нæ, æмæ фæбæрæг кæнæм хуыздæртæй хуыздæрты, фæлæ уымæн, цæмæй ноджыдæр фæхуыздæр уа уырыссаг æвзагмæ хъусдард. Фембæлды фæндоны тыххæй уазджытæ загътой сæ разыйы дзуапп æмæ ныр æнхъæлмæ кæсдзыстæм уырыссаг æвзаг æмæ литературæйы ахуыргæнджыты республикон фыццаг олимпиадæйы ауагъдмæ.
ГÆЗЗАТЫ Иван