Nog adres

/Блиц-æрфарст/ Уæрæсейы руаджы æндидзы æмæ рæзы нæ паддзахад

12 июнь — Уæрæсейы Федераци расидыны бон Хуссар Ирыстонæн дæр у ахсджиаг æмæ нысаниуæгджын бон. Ацы бæрæгбон кадимæ нысан цæуы нæ бæстæйы дæр. Уæрæсейы Федерацийы къухдариуæгады хъаруты æмæ бæстæйы фæрæзты руаджы абон нæ республикæ рæзы æмæ хизы царды къæпхæнтыл размæ.
Ацы боны фæдыл нын сæ хъуыдытæ, арфæтæ æмæ фæндиæгтæ дзурынц блиц-æрфарсты не ‘мбæстæгтæ.
Къæбулты Аринæ:
— Уæрæсе — нæ хъахъхъæнæг, нæ ирвæзынгæнæг — ацы ныхæстæ сты æдзух мæ хъуыдыйы, мæ сæры магъзы. Æмæ абон, Уæрæсейы Федерацийы сырæзты бон, мæнæн дæр, хуссарирыстойнаг æмбæстагæн, у стыр бæрæгбон, уымæн æмæ рæстæг æмæ дуг куыд уынын кæнынц, уымæй ацы егъау бæстæ стыр ахъаз у нæ чысыл республикæйы рæзт æмæ сæндидзын кæнынæн.
Бирæ æмæ бирæ арфæйаг ныхæстæ ис дзурæн Стыр Уæрæсейы номыл, фæлæ уæддæр мах æрæздæхæм 2008 азмæ — уæрæхмасштабон хæст нын Гуырдзыстон куы расидт, уæд фидарæй лæууыдысты нæ хæстхъом фæсивæд. Алыгъуызон нырыккон хæстон гæрзифтонг æфсады ныхмæ лæууын хуымæтæг нæ уыд æмæ нæм уæд уæрæсейаг æфсад фæзынд æххуысмæ — нæ ирвæзынгæнæг æмæ нæ хъахъхъæнæг.
Уæд, уал азы дæргъы хъизæмæрттæ æвзарæг Ирыстон сыхаг Гуырдзыстоны ’рдыгæй сулæфыд знаджы æрбабырстытæй. Сулæфыд, кæд нæ горæт æмæ хъæутæ знаджы нæмыгæй пырх æмæ дæрæн æрцыдысты, уæддæр. Æмæ ма ноджы иу — историйы стыр дамгъæтæй фыст чи æрцыд, нæ уыцы паддзахадон хæдбардзинад нымад кæй æрцыд 2008 азы 26 августы Уæрæсейы Федерацийы ’рдыгæй, уыцы егъау цау. Уæдæй абоны онг нæ бæстæ рæзы æмæ æндидзы Стыр Уæрæсейы хъаруты руаджы.
Æмцæдисад æмæ интеграцийы фæдыл Уæрæсейы Федерациимæ цы бадзырд æрцыд бафыст, уый ноджыдæр бангом кæндзæн нæ бæстæты æмæ нæ æмгуыстады хъуыддаг фæарфдæр æмæ фæмидисджындæр уыдзæн, мæ хъуыдымæ гæсгæ.
Абон, Уæрæсейы Федерацийы сырæзты бон, арфæ кæнын æппæт уæрæсейаг адæмæн, уыцы нымæцы Хуссар Ирыстоны адæмæн дæр, уымæн æмæ иу тæгтæй баст стæм.
Хуыгаты Миленæ:
— Абон нæ республикæ нысан кæны æппæты кадджын-дæр æмæ вазыгджындæр бæрæгбонтæй сæ иу — Уæрæсейы бон. Кадджын уый тыххæй у, æмæ Уæрæсе Ирыстоны æмбæстæгтæн кæддæриддæр у кадджын æмæ нын ис кæрæдзиимæ тынг хъарм ахастытæ. Уæрæсе Ирыстонæн кæддæриддæр у ныфсы æмгар, нæ дыууæ бæстæйы æрмæст абонæй не сты иумæ, уыдон иу кæнынц нæ рагон историон уидæгтæ. Абон махæн, Ирыстоны адæмæн, Уæрæсейы боны бæрæгбон у сæйраг æмæ рæсугъд бæрæгбон, æмæ йæ хъуамæ банысан кæнæм хуыздæр уавæрты бæрзонд æмвæзадыл.
Уадз, нæ дыууæ бæстæты ’хсæн ахастытæ рæзæд, кæнæд æнгомдæр æнусон фидæнмæ.
Арфæ кæнын, куыд Уæрæсейы адæмтæн, афтæ Ирыстоны æмбæстæгтæн дæр æмæ нæ царды фылдæр уæд бæрæгбонтæ.
Тедеты Асиат:
— Нæ республикæйы цæр-джытæй алчи дæр, æвæццæгæн, Уæрæсейы боны бæрæгбоныл æмбæлы стыр цины æнкъарæнтимæ. Уымæн æмæ мах, ирон адæм, уыдоны ныфсæй стæм ныфсджын. Нæ историйыл нæ цæст куы ахæссæм, уæд фенæн ис, кæддæриддæр нын Уæрæсеимæ æнгом ахастытæ кæй уыдис. Уыдон æвдыст æрцæуынц бирæ хъуыддæгты. Уæлдайдæр махæй алчи дæр æвдисæн уыдис, бирæ азты дæргъы цы хъизæмайраджы цард кодтам, уы-мæй дæр Стыр Уæрæсейы архайды фæрцы кæй фервæзтыстæм æмæ абоны онг дæр се ’ххуысы руаджы кæй цæрæм. Нæ республикæйы размæцыдмæ дæр нын Уæрæсейы æмбæстæгтæ стыр хъусдард кæй здахынц, уый тыххæй махæй алчидæр хæсджын у, цæмæй сын мах бузныг дзурæм.
Уымæ гæсгæ ноджыдæр нæ бафæнддзæнис ацы рæсугъд бæрæгбоны, цæмæй Стыр Уæрæсе кæддæриддæр уа хъару-джын æмæ дидинкалгæ бæстæ!