Nog adres

Банысан кодтой бæрæгбон

Фыдыбæстæ хъахъхъæнæджы боны цытæн бæрæгбонон мадзал уагъд æрцыд Тъбеты хъæуы. Мадзал сорганизаци кодтой Цхинвалы районы администрацийы культурæйы хайад (йæ сæргълæууæг Гаглойты Ростик), æмæ Тъбеты хъæуы Культурæйы хæдзар.
Культурæйы хæдзармæ æрбацыдысты Тъбеты, Ногхъæу æмæ Бибылты хъæуты цæрджытæ.
Мадзалмæ æрбахуыдтой гуырдзыйы агрессийы фæстиуæгæн чи фæцæф, уыдонæй фондз лæппу: Бибылты Шалва, Джиоты Яник, Бекъойты Альберт, Икъаты Сæрмæт æмæ Кокойты Сæрмæты.
Тъбеты хъæуы администрацийы сæргълæууæг Кокойты Елиоз йæ раныхасы банысан кодта ирон хъайтар лæппуты хъæбатырдзинад, Фыдыбæстæ бахъахъхъæныны сæрвæлтау сæ удуæлдай тох æмæ сын ракодта бæрæгбонон арфæтæ.
Мадзалмæ хуынд цы лæппутæ æрцыдысты, уыдонæн Цхинвалы районы администрацийы культурæйы хайады хъæппæрисæй бакодтой зæрдылдарæн лæвæрттæ.
Мадзал сæ аивадæй барæсугъд кодтой районы культурæйы кусджытæ: Æлборты Шоренæ, Хуыгаты Дзамболат æмæ Мæдинæ æмæ Джиголаты Ларисæ. Сæ арæхстдзинад ма равдыстой Тъбеты культурæйы хæдзары хæдархайгæ къорд (йæ къухдариуæггæнæг Мæлдзыгаты Фатимæ), скъоладзаутæ. Сывæллæттæ зарыдысты, кафыдысты æмæ аив кастысты æмдзæвгæтæ.
Мадзалмæ æрбацæуæг адæм баззадысты райгондæй.
ДЗЕБЫСАТЫ Гуло