Nog adres

Ардауæн миты бæсты…

Дунейы ногдæр историйы зонæнтæй куыд бæрæг у, афтæмæй гуырдзиаг æфсады хæстон архайдтытæм америкæйаг кæнæ НАТО-йы структурæтæ куы фæцæттæ кæнынц, уæд ын Хуссар Кавказы кæддæриддæр вæййы æппæрццаг фæстиуджытæ. Уæдæ æндæр цæуыл дзурæг у 2008 азы августы Гуырдзыстоны радон гадзрахатæй æрбабырст Хуссар Ирыстонмæ, йæ хæдразмæ уым америкæйаг-гуырдзиаг хæстон ахуыртæ уагъд куы 'рцыдысты, уыцы хъуыддаг?
Гъе, æмæ та ацы аз, 5 майы, ГФР æмæ Гуырдзыстоны фæсарæйнаг хъуыддæгты министрты фембæлд дæр Фæскавказы сабырад æмæ стабилондзинадæн тæссагдзинад кæй хæссы, уый дызæрдыггаг нæу. Ацы хатт дæр та Франк-Вальтер Штанмайер рахæцыд «Гуырдзыстоны территориалон æнæхъæндзинады» фарс. Йæ аххосаг Хуссар Ирыстон æмæ Уæрæсейы Федераци Æмцæдисады æмæ интеграцийы фæдыл сæ къухтæ цы бадзырдыл бафыстой, уый. Æниу ацы хъуыддаджы Германы позици кæддæриддæр уыдис æнæивгæ.

Ам Германы Фæсарæйнаг хъуыддæгты министры ахъуыды кæнын хъуыдис, ахæм æртыккаг бæстæты ныхмæ кæй нæу æмæ йæ нысанмæ гæсгæ кæй у социалон æмæ экономикон проблемæтæ æмæ æдасдзинады фарстатæ скъуыддзаг кæныны амал. Рох дзы ма хъуамæ уыдаид, Гуырдзыстон Хуссар Ирыстонмæ æмæ Абхазмæ кæддæриддæр знагиуæгон ахаст кæй дары æмæ агрессоры роль кæй æххæст кæны, уый дæр. Стæй ма уый дæр æмæ ацы дыууæ бæрзонд чины адæймæгты фембæлды боны Гуырдзыстонæн Батуммæ кæй æрластой америкæйаг хæстон техникæ. Уый дæр та цæуыл дзурæг у? Регионы дестабилизацийы ситуаци аразын, хæстон архайдтытæм цæттæ кæнын.
Зæрдæхудт ми ма уыдис, Европæйы Цæдисы Министрты комитеты нымæрдартæ сæ боны фæткы фарстаты æвзæрыл кæй банымадтой Республикæ Хуссар Ирыстоны æмæ Уæрæсейы Федерацийы æмкуысткæнынад æмæ интеграцийы фæдыл къухтæ цы бадзырдыл бафыстой, уый, цыма йын нæй юридикон тых æмæ гуымир æгъдауæй халы Гуырдзыстоны суверенитет æмæ территориалон æнæхъæндзинад. Ацы документмæ ма сæ негативон цæстæнгас равдыстой Республикæ Хуссар Ирыстонæн йæ арæнтæ фидаргонд кæй цæуынц, уый тыххæй дæр. Æмæ сæ уæдæ куыд фæнды, арæнтæ сын байгом кæной æмæ та Гуырдзыстон сæрибарæй радон агресси сараза, æнæаххос ирон туг та ныккала?!
Арæнты ахæм арæзтад у сабырдзинад хъахъхъæнын æмæ йæ Уæрæсе æмæ Хуссар Ирыстон кæй аразынц, уый та - арфæйаджы хъуыддаг. Хуссар Ирыстон у хæдбар, нымадгонд паддзахад æмæ йæ арæнтæ кæй фидар кæны, уымæй раст кæны æмæ æрмæстдæр хауы йæ хицауады компетенцимæ.
Немыцаг министр хъуамæ бацымыдис кодтаид уымæ дæр æмæ цымæ Республикæ Хуссар Ирыстон æфхæры, уым чи цæрынц, уыцы гуырдзиæгтæн нæй сæрибарæй иу ранæй иннæ ранмæ цæуынæн æмæ мадæлон æвзагыл ахуырдзинад райсыны фадат. Ахуырад райсыны хъуыддаджы дæр немыцаг министрæн ницы бындур ис æмæ аххосджын кæна РХИ-йы хицауады ахуырады системæйы. Республикæ Хуссар Ирыстоны Конституцимæ гæсгæ гуырдзиаг æвзаг, гуырдзиаг цæрджытæ компетентонæй кæм цæрынц, уым нымад цæуы официалоныл. Ау, Республикæйы фондз скъолайы ахуыр гуырдзиаг æвзагыл куы цæуы, уæд ма мысæггаг ныхæстæ кæй цæмæн хъæуынц? Гуырдзыстоны ахæм скъолатæ цал ис? Иунæг дæр нæ.
Цыма ацы министры хъустыл никæцæй æрцыдис, 23 азы размæ нын нæ лигъдонтæй 36 тыхст æмæ æнæбон зæрæдты æмæ æвзонг фæсивæды Гуырдзыстоны тугмондагæй ссонтуæвæг национал-шовинисттæ Зары фæндагыл, нæхи зæххыл цы гадзрахат æмæ æбуалгъ мардæй амардтой, уый. Æмæ цæмæн? Æрмæстдæр уымæн æмæ ирæттæ кæй уыдысты, æрмæстдæр уымæн æмæ сын рагæй фæстæмæ сæ тугæй дойны кæй уыдис.
Кæнæ Ереды хъæуы цур удæгасæй цы 12 лигъдоны баныгæдтой, уыдон кой дæр никуы фехъуыста ацы, афтæхуыйнæг политик?
Кæнæ æфсæйнаг хæтæлты цы цардбæллон саглæппуты сфыхтой, уыдон кой дæр никуы фехъуыста?
Кæнæ…
Кæнæ…
Фехъуыста, фехъуыста! Æнæхъæн дуне сæ базыдта æмæ ма уымæн йæ хъусты къæрмæджытæ уыдис?
Нæ! Гуырдзыстоны 'вварс чи хæцы, уый у циник, æнæаххос адæймæгты тугкалд чи ницæмæ дары, ахæм. Оккупацигонд территори кæй хонынц, уый тыххæй та мæ уый зæгъын фæнды æмæ ирон адæм, сæ рагфыдæлтæй фæстæмæ цæрынц сæхи зæххыл æмæ йæм йæ гæрзтæ мачи бæттæт!
Уæрæсейы Федерацимæ кæй сидынц, Европæйы Цæдисы органтæн Хуссар Ирыстоны территоримæ кæдфæнды цæуыны бар кæй нæй. Европæйы Цæдисы министрты хæдивджытæ хъуамæ зониккой, кæцыфæнды бæстæйы территоримæ бацæуын дæр регуляци кæй цæуы йæ мидæггагон закъондæттынадæй.
Республикæ Хуссар Ирыстоны Фæсарæйнаг хъуыддæгты министрад кæддæриддæр цæттæ у æппæт дунеон организацитимæ æмæ Ирыстоны адæммæ, сæ закъондæттынадмæ адæймагадон ахаст кæмæн ис, уыдонимæ хæлар æмкуысткæнынадмæ.
Алы паддзахады рæзт æмæ размæцыды, æдасдзинадæн хъæуы ныфсджын патриоттæ. Фæлæ, куыд уынæм, афтæмæй Гуырдзыстоны 'рдыгæй фарс рæзы тæссагдзинад æмæ Республикæ Хуссар Ирыстон дæр йæ хъахъхъæныны ратæдзæн уыны Уæрæсеимæ уæрæх æмкуысткæнынады рæзты.
Æмæ кæд Гуырдзыстоны ныгуылæйнаг партнерты фæнды, цæмæй регионы уа сабырад, уæд мауал хъуамæ кæной йæ амбициты 'вварс, мауал ын уырнын кæной, раст чи нæу, уыцы ардауæн ныхæстæ æмæ митæ, сæйраджыдæр та йæ территориалон æнæхъæндзинады тыххæй. Хъуамæ йын бауырнын кæной, цы иунæг раст фæндагыл сæ хъæуы ныллæууын, уый. Æмæ уый та у уæвæг реалитæ бахынцын, цæмæй йæ къух æрфысса ты-хæй ма спайда кæныны фæдыл юридикон æгъдауæй хæсджынгæнæг документыл æмæ сæ Республикæ Хуссар Ирыстонимæ конструктивон бадзырдтæ аразын кæй хъæуы, уый.
Фаг у ардауæн, æнæхъола зондамындтæн æмæ фарсхæцынадæн!
Æрмæг бацæттæ
кодта ТУАТЫ Шота