Nog adres

Фæтагъддæр хъæуы арæзтадон куыстытыл

_GLB7863_0.JPG 16-æм майы уыдис 2015-2017 азтæн Республикæ Хуссар Ирыстоны социалон-экономи-кон рæзтæн ахъазгæнæг Инвестпрограммæйы реализацийыл контролы фæдыл штабы оперативон рабадт. Рабадт уагъта РХИ-йы Хицауады Сæрдар Хъуылымбегты Доменти. Хайад дзы райстой министрадтæ æмæ ведомствоты, подрядон æмæ проектон организациты къухдариуæггæнджытæ, горæтон æмæ районон администрациты сæргълæуджытæ, афтæ ма Хæдбар Паддзахадты Æмхæларады, Республикæ Абхазы æмæ Республикæ Хуссар Ирыстоны паддзахадтимæ социалон-экономикон æмгуыстады фæдыл Уæрæсейы Федерацийы Президенты управленийы сæйраг уынаффæгæнæг Витали Мельников - нæ республикæйы уыд кусæгон визитимæ.
Штабы рабадты сæйраджыдæр дзырд цыдис уымæй размæ цы уынаффæтæ райстой, уыдон куыд æххæст цæуынц, ууыл.
Райдианы Хицауады Сæрдар æрдзырдта нæ горæты Мæскуыйы уынджы кæронмæ схæрзарæзт кæныны фæдыл куыстытæ куыд цæуынц, уый тыххæй. Зындгонд куыд у, афтæмæй ацы уынгыл асфальты фыццаг цъар æвæрд æрцыдис ивгъуыд азы. Ацы аз дæр æрæвнæлдтой куыстытæ кæронмæ фæуынмæ. Фæбæрзонддæр кодтой канализацион люктæ, æрбæстон кодтой къæвдадæтты цæуæн хæтæлты, асфальты дыккаг цъар сæвæрдтой уынгæн йæ иу хайыл дæр. Ацы куыстытæ æххæст æрцыдысты Стыр Уæлахизы 70 азы бæрæгбон - 9-æм маймæ. Фæлæ уæдæй фæстæмæ фæндагарзджытæ ацы уынгмæ нал фæзындысты. Хицауады Сæрдар карзæй бафæдзæхста, рæстæг цæуы æмæ цæмæй батындзой ацы куыстытыл. Стæй æрмæст уыцы уынджы нæ, фæлæ æндæр уынгты арæзтадыл дæр. Уыдон ма фæдзæхст æрцыдысты, цæмæй ивгъуыд аз цы куыстытæ сæххæст кодтой æмæ сæ цы цухдзинæдтæ раргом сты, уыдон æвæстиатæй аиуварс æрцæуой. Уыцы ныхас хаудта æндæр уынгты хæрзарæзтадыл чи куыста, уыцы арæзтадон организацитæй алæкæмæ дæр.

Штабы ивгъуыд рабадты ма РХИ-йы Арæзтад æмæ архитектурæйы министрадæн бахæс æрцыд, цæмæй горæты администраци æмæ паддзахадон унитарон куыстат «Водоканал»-имæ сбæлвырд кæной, ацы аз цы уынгтæ хъуамæ арæзт æрцæуой, уыдоны къæвдадæтты цæуæнты арæзтады уавæр. Ацы фарсты фæдыл информаци радта РХИ-йы арæзтады министр Зæгъойты Эдуард æмæ банысан кодта кæцы уынгтыл сæ куыд араздзысты, уый.
Октябры уынг дæр ацы аз кæй цæудзæн арæзт æмæ дзы бирæ цъæхдарæн бæлæстæ кæй ис, уымæ гæсгæ Хицауады Сæрдар бафæдзæхста, цæмæй зæхкъахæн куыстытæ æххæст цæуой афтæ, æмæ уыдонæн сæ уидæгтæ ма бахъыгдард уой. Уый у ацы уынджы цæрджыты домæн дæр. Уый тыххæй та уынгаразджытæ хъуамæ бадзурой æмбæлон службæтимæ, специалисттимæ.
Хæслæвæрдтæ ма лæвæрд æрцыдис, Аивæдты лицейы спортивон фæзуаты арæзтады цы цухдзинæдтæ уыдис, уыдон аиуварс кæныны тыххæй. Фæлæ ам дæр ницыуал арæзт æрцыд.
Къуайсайы скъолайы арæзтадыл дзургæйæ Хицауцады Сæрдар бацымыдис кодта арæзтадон куыстытæ дзы куыд цæуынц, уымæ. Ныридæгæн зæронд бæстыхайы арæзтад пырх æрцыд, фæлæ йæ арæзтады райдайыны фæзынд проблемæ. Арæзтадон органи-зацийы сæргълæууæг Гæззаты Владимир куыд загъта, афтæмæй скъоламæ хæстæг хицæн цæрджытæ сарæзтой æнæзакъонон арæзтæдтæ æмæ нæ разы кæнынц уыдон сисыныл.
РХИ-йы Президенты Администрацийы бæстыхайы арæзтады тыххæй арæзтады министр куыд загъта, афтæмæй фыццаг этапы проект цæттæ у арæзтадон куыстытæ дзы æххæст цæуынц. Хъуылымбегты Доменти йын бахæс кодта, цæмæй ацы объекты проектон-сметæйон документаци цæттæ уа 20 маймæ æмæ лæвæрд æрцæуа экспертизæмæ.
Инвестпрограммæйы фæлгæтты ацы азмæ цы объекттæ хаст æрцыдысты, уыдонæй сæ иу у сывæллæтты реабилитацион центры арæзтад дæр. Ацы объекты куыстытæ урæд æрцыдысты ивгъуыд азы æмæ абоны онг дæр бæстонæй нæма æрæвнæлдтой йæ арæзтадмæ. Йæ аххосаг та, Хицауады Сæрдар куыд загъта, афтæмæй у проектон-сметæйон документаци йын арæзт кæй нæй, уый, афтæмæй та хъуамæ цæттæ уыдаид марты мæймæ. Хицауады Сæрдар æрсидт, цæмæй алчидæр йæ хæстæ æххæст кæнынмæ кæса бæрнондæр цæстæй, къуылымпыдзинæдтæ ма æвзарой, арæзтадон куыстытæ æххæст кæнгæйæ, рæстæгыл эксплуатацимæ лæвæрд æрцæуой, Инвестпрограммæйы фæлгæтты ацы азмæ цы объекттæ хаст æрцыдысты, уыдон. Йæ хæстæ æмбæлонæй чи не 'ххæст кæна, уыдон ныхмæ та хъуамæ ист цæуа æмбæлон мадзæттæ, - бафидар кодта йæ хъуыды Хицауады сæрдар.
Рабадты ма дзырд цыд æндæр ахсджиаг фарстытыл дæр.
БЕСТАУТЫ Валя