Nog adres

Музыкæйы зæлтæй сын тавынц сæ зæрдæтæ

Кад æмæ ном скæнын азтæй нымайгæйæ нæу, уымæн чысыл рæстæджы дæр ис райсæн. Фæлæ райсгæ дæсныйадыл дæргъвæтин рæстæджы æнæфæцудгæйæ размæ куы цæуай, дæ къухты иу æнтыст иннæйы фæдыл куы æфта, уæд та уымæн æмбал дæр нæй. Уыцы арфæйаг фæндагыл 1981 азæй фæстæмæ цæуы Битеты Павелы номыл Цхинвалы № 2 музыкалон скъола æмæ фидæнмæ нысан кæндзæн йæ 35 азы кадджын юбилей. Йæ фыццаг бонтæй фæстæмæ ацы уагдоны хъомылгæнджыты нысан у рæзгæ фæлтæры музыкæйы кæлæнтæгæнæг мыртæй батавын, сæ зæрдæйы сын æгæрон цæхæр банордын æмæ сын уыцы арфæйаг куыст æнтысгæ дæр кодта. Скъолайы коллективы раздæры хъомылгæнджытæ-ахуыргæнджыты зæрдиаг æмæ нысанмæздæхт архайд дарддæр кæнынц, абон дзы цы куыстуарзаг æмæ æвзыгъд коллектив кусы, уыдон дæр.
Цыфæнды уагдон, куыстуаты размæцыд фылдæр кæнгæ у разамонæджы æвæллайгæ æмæ хъæрмуд куысты фæрцы. Ахæм разамонæгыл нымад цæуы йæ хъуыддаджы дæсны Æлборты Дианæ, уый ацы уагдоны ахуыргæнæгæй кусын райдыдта 1992 азæй, 2003 азы та йæ равзæрстой скъолайы директорæй. Йæ бирæазон æмæ æнæзæрдæхудт куысты тыххæй йын 2006 азы лæвæрд æрцыд Республикæ Хуссар Ирыстоны сгуыхт ахуыргæнæджы кадджын ном. Æлборты чызг нын скъолайы куысты æнтыстытæ æмæ цухдзинæдты тыххæй радзырдта, зæгъгæ, райдианæй фæстæмæ ацы уагдон уæвынад кæны кæйдæрты дæлбазыр. Райдианы æрбынат кодта нæ горæты № 5 астæуккаг скъолайы æмæ дзы фесты дæргъвæтин рæстæг. Уырдыгæй хуыздæр æнхъæл рахызтысты паддзахадон телеуынынады бæстыхаймæ æмæ сæ куыст кодтой 3-аг æмæ 4-æм уæладзгуыты. 1994 азæй абоны онг та сты, Хъайтарты уынджы раздæры профтехахуыргæнæндон кæм уыд, уыцы хæдзары. Зæгъын хъæуы, ацы бæстыхай дæр сæхи кæй нæу, кæцыдæр организаци йæ йæхи бакæнынмæ хъавы, иннæмæй та у цалцæгкæнинаг, нæй сын фаг кълæстæ дæр. Цалдæр азы размæ дæр ма зымæгон бонты пайда кодтой пецтæй, ныр сын уыцы проблемæ иуварс æрцыд, хъæрмадон системæ сæм кæй æрбауагътой, уый тыххæй æмæ бузныгæй баззадысты администрацийы сæргълæууæг Æлборты Аланæй. Сæрмагонд бæстыхай саразыны тыххæй хъуамæ фыстæг ныффыссой нæ республикæйы Президент Тыбылты Леонидмæ, цæмæй Инвестпрограммæмæ бахауа арæзтад.
Куысты æнтыстыты тыххæй Æлборты чызг куыд загъта, афтæмæй сæм ахуыртæ цæуынц 7 хайады: фортепиано, аккордеон, ирон фæндыр, скрипкæ, доули, гитарæ æмæ вокал. Рæзгæ фæлтæрæн аккордеоны ахуыргæнджытæ сты Бекъойты Марфæ æмæ Усович Маринæ, ирон фæндыры сусæгдзинæдтæ сын амоны Хъуызилты Ноннæ, гитарæ — Гуыцмæзты Иннæ, зарын — Сиукъаты Тамерлан, гуымсæг — Хъазиты Гоча æмæ æндæртæ. Скъола сæрыстыр у, цы рæзгæ фæлтæр сæм ахуыр кодта, уыдонæй бирæтæ музыкæйы дæсныйад кæй равзæрстой, аивадæн табугæнджыты зæрдæтæ кæй рухс кæнынц, уымæй. Ахæмтæ сты оперон зынгæ зарæггæнæг Джиоты Вероникæ, фæндырдзæгъдæг Дудайты Сæрмæт, йе ‘фсымæр Къоста. Ныртæккæ дæр скъолайы ис, хорз фидæн кæмæ æнхъæлмæ кæсы, музыкæйы æхцон зæлтæн йæхи чи снывонд кодта, ахæм фæлтæр. Уыдон сты Ходты Арсен, Цхуырбаты Майа, Хуыгаты Миленæ, Яралов Алыксандр, Икъоты Марат, Зассеты Сослан, Тыджыты Сергей æмæ иннæтæ.
Музыкалон скъолайы ахуыргæнджытæ бацæттæ кæнынц сæ ахуыргæнинæгты æмæ кæддæриддæр ауадзынц бæрæгбонон мадзæлттæ канд скъолайы нæ, фæлæ ма республикæйы фæлгæтты дæр. Зæгъæм, зынгæ композитор Æлборты Феликсы номыл æрвылаз дæр вæййы конкурс æмæ дзы активон хайад райсынц ацы скъолайы ахуыргæнинæгтæ дæр. Сæ зæрдæмæдзæугæ аивадон ралæудтæй сын разыйæ баззайынц аивадуарзджытæ.
Музыкалон скъолайæн йæ сæйрагдæр авналæнтæ сты йæ инструменттæ, Æлборты чызг куыд банысан кодта, афтæмæй æххæст сты уыдонæй, æрмæст сæ пианинотæ нал сты æмбæлон уавæры. Хъуыддаг уый мидæг ис, æмæ скъола йæ кусæн бынæттæ куы раив-баив кодта, уæд уый мæгуырауæрдæм бандæвта сæ гъæдыл, афтæ ма нал у рæстмæ сæ рояль дæр. Горæты мэр сын ныфс бавæрдта электрон пианино самал кæнынæй, уый дæр хорз у, иугæндзон æлхæнын дæр къух нæ амоны, уымæн æмæ сæ аргъ чысыл нæу — 60-70 мин сомы. Æртæ азы размæ сын Культурæйы министрад та самал кодта 10 гуымсæджы.
ХУЫБИАТЫ Н.