Nog adres

Гуырдзыстон æрымысыд фантастикон радзырд

DSC00503.JPGГуырдзыстонимæ арæнгæрон хъæу Эргнеты ауагъдæуыд 20-æм фембæлд инциденттæ ма æруадзыны æмæ аиуварс кæныны механизмы фæлгæтты архайджытæн. Хуссар Ирыстоны фарсæрдыгæй къорды сæргъ уыд нæ республикæйы фæсхъаугъайон уавæртæ æрнывыл кæныны фæдыл президенты цур æххæстбарджыны хæдивæг Цгъойты Мераб. Бадзырдты ма хайад райстой Уæрæсе, Гуырдзыстон, Евроцæдис æмæ ЕÆÆО-йы минæвæрттæ. Фембæлд ацыд æхгæд режимы. Фембæлды фæстæ нæ республикæ æмæ Гуырдзыстоны фарсæрдыгæй минæвæрттæ куыд фехъусын кодтой, афтæмæй фембæлд ацыд конструктивон атмосферæйы. Гуырдзыстоны мидхъуыддæгты министры официалон минæвар Шота Утиашвилийы ныхæстæм гæсгæ инциденттæ ма æруадзын æмæ аиуварс кæныны механизмты фæлгæтты фембæлдтытæ кæд æмæ бындуронæй нæ лыг кæнынц фарстатæ, уæддæр арæнгæрон районты уавæры стабилондзинадмæ хæссынц стыр хайбавæрд.

«Ныр уавæр у сабыр. Рагæй нал фехъуыстам «кæйдæр амардæуыд», гъе «чидæр фæцæф». Ахстуæвджыты нымæц дæр дзæвгар фæкъаддæр. Æз нæ зонын, нæ фембæлдтытæ цас ахъаз сты ацы хъуыддæгтæн, фæлæ уæддæр уавæры стабилондзинадæн сты ахъаз», - банысан кодта Утиашвили.
Нæ республикæйы делегацийы къухдариуæггæнæг Цгъойты Мераб куыд фехъусын кодта, афтæмæй боны фæткы уыд 8 фарстайы æмæ сын сæ фылдæры бадзырдтæм рахаста Хуссар Ирыстоны фарс.
«Мах, сæйраджыдæр архайæм арæнгæрон хъæуты цæрджытæн баххуыс кæнын. Уый у тынг ахсджиаг фарст», - банысан кодта Мераб.
Йæ ныхæстæм гæсгæ, фембæлды банысангонд æрцыд, паддзахадон арæ-ныл фæткхалыны цауты нымæц кæй фæкъаддæр.
«Ныр паддзахадон арæны фæтк хæлд нал цæуы æнæнхъæлæджы, фæлæ зонгæзонын. Дæнцæгæн сисæм, æрæджы Гуырдзыстоны æмбæстæгтæ æхсæзæй ахст кæй æрцыдысты Хуссар Ирыстоны территорийыл. Уыдонæй иу загъта, паддзахадон арæны сæрты кæй рахызт, Гуырдзыстоны цы фыдракæнд сарæзта, уый фæстиуæгæн æфхæрд ма баййафыны тыххæй. Иннæ фондз æмбæстаджы та загътой, нæ республикæйы арæнмæ кæй æрбацыдысты суг самал кæныны тыххæй», - банысан кодта Мераб.
Уый ма куыд загъта, афтæмæй Гуырдзыстон æмæ Евроцæдисы цæстдарджыты раз сæвæрдæуыд фарст æнæмæнгхъæуæг профилактикон куысты тыххæй, цæмæй, кæрон скæной, гъе та фæкъаддæргонд уой арæны фæткхалыны цаутæ.
«Кæд æмæ абон адæм хæдзарадон къабазмæ хауæг хъуыддæгты тыххæй халынц паддзахадон арæны фæтк, уæд фæстæдæр та серьезон цауты тыххæй райдайдзысты фæтк халын. Ацы æхсæз адæймаджы рахызтысты Евроцæдис æмæ Гуырдзыстоны цæстдарджыты рæзты, фæлæ сæ уыдон нæ бакъуылымпы кодтой», - фехъусын кодта Цгъойты Мераб.
Фембæлды ма дзырд цыд, куыд æрвылхатт, афтæ ныр дæр, нæ республикæйы æмбæстæгтæй æбæрæгæй сæфт нымад чи цæуы, уыдон хъысмæтыл дæр. Цгъойты Мераб куыд загъта, афтæмæй Къæбысты Тамаз æбæрæгæй фесæфт 2008 азы 8 августы хæсты тæмæны.
«Абон нæ фарстæн райстам фантастикон дзуапп, ома, Къæбысы фырт хæсты тæмæны Никозы хъæуы йæхицæн сабырæй фæцæйцыд фæндагыл. Бынæттон цæрджытæ фæдзырдтой Гурмæ æмæ сæм æрбацыд милици, кæцытæ æнæнхъæлæджы семæ ракодтой ирон тæлмацгæнæджы. Къæбысты Тамазы æрцахстой æмæ йæ акодтой Гурмæ. Иу чысыл афæрсбафæрсы фæстæ йæ уыцы бон рауагътой æмæ йæм бахатыдысты, цæмæй сæм æртæ боны фæстæ æрбацæуа æмæ йыл стæрхон кæной. Ацы радзырд ахæм фантастикон у, æмæ, мæ хъуыдымæ гæсгæ, сæхицæн дæр зын уыд йæ радзурын. Зæгъгæ, Утиашвили йæхæдæг милицийы кусæг нæ уыд, уæд, æвæццæгæн, ныссырх уыдаид», - банысан кодта Мераб.
Афтæ ма фембæлды Хуссар Ирыстоны фарс бахатыд Гуырдзыстоны къухдариуæгадмæ, цæмæй не 'мбæстæгтæй тæрхондон цæрæнбонтæм ахæстоны фæбадыны тæрхон кæмæн рахаста, уыдонæн лæвæрд æрцæуа ахæстоны къаддæр æмгъуыд.
«Цалдæр азы размæ не 'мбæстæгтæй æртæйæн Гуырдзыстоны Уæлдæр тæрхондон скъуыддзаг рахаста цæрæнбонтæм ахæстоны фæбадын, ома, Гуры теракт кæй сарæзтой, уый тыххæй. Мах сын фехъусын кодтам, кæй нæ зонæм ацы хъуыддаг, фæлæ йæ нымайæм æнæзакъононыл. Хъыгагæн, Гуырдзыстоны фарс не сразы нæ фæндыл æмæ нын загътой, ацы цауы фæдыл кæй нæ бахатдзысты нæдæр сæ бæстæйы президентмæ, нæдæр Уæлдæр тæрхондонмæ. Ахæм архайдтытæ адæмы 'хсæн рæзын кæнынц æууæнк, фæлæ, стыр хъыгагæн, не 'рсидт нæ бандæвта Гуырдзыстоны фарсыл», - фехъусын кодта Цгъойты Мераб.
Уый ма куыд загъта, афтæмæй сын бантыст арæнгæрон хъæууонхæдзарадон куыстытæ æдасæй æххæст кæныны тыххæй мобилон къорд саразыныл бадзырд.
Мераб ма куыд загъта, афтæмæй ахæм хуызы фембæлдтытæн Ергнеты хъæуы ма ауадзынæн раздæр уыд аххосæгтæ, фæлæ ныр иуварсгонд æрцыдысты æмæ нырæй фæстæмæ уагъд цæудзысты ацы бынаты. Ергнеты сæ фембæлдтæн нæ уадзыны аххосаг уыд, Гуырдзыстоны фарс Ергнеты НАТО-йы зонæ кæй хуыдта, мæ гæсгæ.
КОКАЙТЫ Зæринæ