Nog adres

Республикæ Хуссар Ирыстоны Хицауады Сæрдар Хъуылымбегты Доментийы раныхас Стыр Фыдыбæстæйон хæсты уæлахизы 70 азы боны цытæн парады

Стыр Фыдыбæстæйон хæсты цытджын ветерантæ!
Æмбæлтæ инæлартæ, афицертæ, салдаттæ!
Цытджын æмбæстæйонтæ!
Республикæ Хуссар Ирыстоны Президент Тыбылты Леонид Харитоны фырты номæй æмæ нæ бæстæйы къухдариуæгады номæй уын зæрдиаг арфæ кæнын Стыр Уæлахизы æвдай азы бæрæгбоны цытæн.
Дæс æмæ æртиссæдз азы аивгъуыдта уыцы зæрдылдарæн бонæй, Берлины, састуæвæг Рейхстагы сæрмæ Уæлахизы Сырх Тырыса куы сфæйлыдта, уæдæй. 1945 азы 9 майы бон ссис, адæймаджы историйы иууыл æгъатырдæр æмæ тугкалæндæр чи уыд, советон адæмæн дæс милуангай уды зиæнттæ чи æрхаста, уыцы Стыр Фыдыбæстæйон хæсты 1418 зынгарыд бонтæ æмæ æхсæвтæй фæстаг. Хæсты алы бон дæр йедзаг уыд нæ хистæр æфсымæрты æмæ хоты, мæдтæ æмæ фыдты лæджыгъæд æмæ хъæбатырдзинады цаутæй. Уыдон æвдыстой стыр хъайтардзинад хæсты быдыры æмæ æгæрон фæллойадон сгуыхтдзинад фæсчъылдым. Уыдон фæстæ нæ лæууыдысты Уæлахизы аргъ бафидыныл. Уыцы Уæлахизмæ фæндагыл сæйраг хъомысдæттæг уыдысты бирæнацион советон адæм. Гъе, уый тыххæй хуыйны иунæг иумæйаг Уæлахиз дæр.
Стыр Уæлахизы хъуыддагмæ йæ хайба-вæрд бахастой чысылнымæц, фæлæ хъæбатыр ирон адæм дæр. Куыд зонæм, афтæмæй Хуссар Ирыстон не ссис хæстон архайдтыты бынат. Уый хыгъд, йæ алы цыппæрæм цæрæг дæр ацыд хæсты быдырмæ, æмæ уыдонæй алы дыккаг та йæ хæдзарыл нал сæмбæлд. Чысыл Хуссар Ирыстон нæ Райгуырæн бæстæйæн радта Советон Цæдисы 8 Хъайтары, æмæ мах уымæй сæрыстыр æнæхъуаджы не стæм. Не ’мзæххонтæй фондз мин æмæ æрдæгæй фылдæр хорзæхджын æрцыдысты Советон Цæдисы хæстон ордентæ æмæ майдантæй. Æгъуыстаг цыт ссардтой Хуссар Ирыстоны минæвæрттæ Стыр Фыдыбæстæйон хæсты æппæт сæйрагдæр тохты æмæ иумæйагæй Дыккаг дунеон хæсты дæр. Уыдон æвдыстой лæджыгъæд æмæ хъæбатырдзинады цæвиттонтæ арвы хъæбысы судзгæ хæстыты, денджызты ихджын дæтты æмæ сур зæххыл дæр.
Кавказмæ фронты арæн куыд хæстæг кодта, афтæ Хуссар Ирыстон расидт æрцыд фронтгæ-рон областæй. Уымæ гæсгæ Цхинвалы расидт æрцыд хæстон уавæр, арæзт дзы æрцыд Хъахъхъæнынады комитет. Автономон областы цæрджытæй арæзт æрцыд фондз куынæггæнæг батальоны æмæ сын хæсгонд уыд хохæфцгуытæ хъахъхъæнын. Цæрджытæй æххæст кары чи уыд, уыдон се ’ппæт дæр рацыдысты уæлдæфон æмæ химион хъахъхъæнынады ахуырдзинад. Областы адæмон хæдзарад æваст раконд æрцыд хæстон уагмæ. Хуссар Ирыстоны кондадон уагдæттæ æмæ аграрон сектор куыстой фронты хъуагдзинæдтæ ифтонг кæныныл. Областы цæрджытæ стырæй-чысылæй слæууыдысты æп-пæтадæмон патриотон змæлды рæнхъы «Æп-пæтдæр — фронтæн! Æппæтдæр — уæлахизæн», зæгъгæ, ахæм лозунгимæ.
Мæ зынаргъ æмбæстæйонтæ!
Азтæ цæуынц, ветеранты нымæц къаддæр кæны. Фæнды мæ 41-æм азы уæлахизы салдаттæм мæ ныхас фæхæццæ кæнон. Сымахæй мах стæм сæрыстыр, нæй нын сымахæй зынаргъдæр. Бирæ нын фæцæрут. Мах хорз æмбарæм, нæ сæрибардзинады тыххæй, стæй нæ царды тыххæй дæр сымахæй хæсджын кæй стæм.
Мах уæ фырттæ, бузныг стæм сымахæй уе сгуыхтдзинады тыххæй!
Цытджын хæлæрттæ!
Фæнды мæ æнæмæнг зæгъын уый, æмæ канд Стыр Фыдыбæстæйон хæст нæ, фæлæ Хуссар Ирыстоны рацарæзты фæстæ трагикон цаутæ дæр æвзæрырдæм кæй бандæвтой нæ ветеранты æнæниздзинадыл. Уыдон, Дыккаг дунеон хæсты быдыры чи бахсыст, никуы ахъуыды кодтаиккой, искуы сæ уарзон Фыдызæххыл ахæм рæстæг скæндзæн, æмæ сæ ныгæнын бахъæудзæн, сæрибардзинад æмæ хæдбардзинады сæрыл фæмардуæвæг сæ фыртты æмæ уыдон фыртты. Бирæ ветеранты æнкъараг зæрдæтæ не схастой сæ раттæг адæмы ныхмæ геноцид. Уымæ гæсгæ мах абон нæ сæртæ къул кæнæм, тохы тугæвдылд быдырты ныгæд чи æрцыдысты, æрмæст уыдоны раз нæ, фæлæ ацы Уæлахизы бонмæ чи нал рацарди, уыдоны рухс нæмтты раз дæр.
Советон адæм XX-æм æнусы сæйраг тæссагдзинад — дунеон фашизмыл æмæ йæ раздзог гитлерон Германыл цы уæлахиз рамбылдтой, уый ссис уый фæстæ дæсгай азты размæцыды удызмæлды хос дæр. Нæ Фыдыбæстæйы хъæдгæмттæ цыбыр рæстæгмæ байгас сты, æмæ йæ социалон-экономикон рæзтæй æрцахста дунейы раззагдæр бынæттæ. Бæстæимæ иумæ рæзыд Хуссар Ирыстон дæр.
Гъе, фæлæ ивгъуыд æнусы нæуæдзæм азты фæуды, Уæрæсе кæй бангом кодта, республикæты уыцы цæдис иттæг фидар нæ разынд. Ра-царæзт æмæ æргомдзинады иударон лозунгтимæ, кæддæры цæдисон республикæтæ, Уæрæсеимæ æнусон æмæ æнæфехæлгæ хæлардзинады дзырд ферохгæнгæйæ, асхуыстой сæхи сепаратизмы гуылфæнмæ. Хуссар Ирыстон равзæрста æндæр фæндаг. Абон сæрыстырæй зæгъæм, мах æнæкъуыхцыйæ цæуæм нæ куырыхон фыдæлты æвзæрст фæндагыл, 1774 азы Уæрæсейы империйы скондмæ бархийæ чи бацыд, уыдон. Дыууæ æнус æмæ æрдæджы бæрц ирон адæм æнæаивгæ иудзинады сты се ’муырнон уырыссаг адæмимæ. Нæй ахæм тых, нæ адæмты æцæг æфсымæрдзинады баст чи атона. Нæ хæлардзинад тыхджын фæлтæрд æрцыд рæстæджы фæрцы æмæ хæсты. Ирон адæм сæ зæрдыл дарынц кæддæриддæр, сæ ирвæзындзинад Стыр Уæрæсейы фæрцы кæй æрцыд, уый.
Абон, Уæрæсейы æххуысы фæрцы, мах æнтысгæйæ æндидзын кæнæм хæсты аххосæй нæ пырх хæдзарад. Не ’мгуыстадæн ног цардызмæлд радта Республикæ Хуссар Ирыстон æмæ Уæрæсейы Федерацийы æхсæн Æмцæдисдзинад æмæ интеграцийы фæдыл цы бадзырдыл æрфыстæуыд къухтæ, уый. Уæрæсейы Федераци лæууы нæ æдасдзинады, территориалон æнæхъæндзинад æмæ нæ бæстæйы хæдбардзинады фидар гарантæй. Республикæ Хуссар Ирыстоны Стыр Фыдыбæстæйон хæсты ветеранты, нæ адæмы æмæ нæ къухдариуæгады номæй зæрдиаг арфæ кæнын æфсымæрон Уæрæсейы Федерацийы адæмæн Уæлахизы боны цытæн. Цхинвалы Театралон фæзуат æрвиты иууыл хуыздæр фæндиæгтæ Мæскуыйы Сырх Фæзуатæн, Уæлахизы парады æппæт хайадисджытæн.
Республикæ Хуссар Ирыстоны Гарзджын тыхтæм арфæйы ныхæстимæ сидын, цæмæй уой Стыр Фыдыбæстæйон хæсты хъайтарты рухс номы аккаг.
Бæрæгбонон сæрмагонд арфæтæ зæгъын Уæрæсейы Федерацийы Хъахъхъæнынады министрады 4-æм æфсæддон базæ æмæ Хуссар Ирыстоны уæвæг УФ Федералон Æдасдзинады службæйы Арæнгæрон управленийæн. Нæ бæстæйы адæм æмæ нæ къухдариуæгад стыр аргъ кæнынц, нæ тохвæллад республикæйы фарн æмæ æдасдзинад бахъахъхъæныны сæраппонд уе ’фсæддон архайдæн.
Æвдай азы агъоммæ нæ къухы чи бафтыд, Стыр Фыдыбæстæйон хæсты уыцы Стыр Уæлахиз, стæй фæстаг азты дæргъы цаутæ ирдæй равдыстой, адæм æмæ æфсад иу кæй сты. Уый та у æнæмæнгхъæуæг, цæмæй йæ кæрон уа æнтыстджын. Æмæ абон хæсты ветерантæ æмæ æфсæддон службæгæнджытимæ иумæ ацы рухс бæрæгбон нысан кæнынц нæ республикæйы æппæт цæрджытæ дæр. Мæ зæрдæ уын зæгъы, мæ зынаргъ æмбæстæйонтæ, фарн, амонд æмæ хæрзиуджытæ. Фидарæй мæ уырны, мах иумæйаг хъаруты фæрцы кæронмæ кæй акæндзыстæм нæ уарзон райгуырæн бæстæйы сæндидзыны æмæ дарддæры рæзты куыст.
Уæлахизы боны хорзæх уæ уæд, зынаргъ æмбæлттæ!