Nog adres

Ничи ферох, ницы ферох

dudaev.jpg
Кæд абон Цхинвалы районы Дменисы хъæуы иу ветеран дæр удæгас нал ис, уæддæр сæ мах нæ рох кæнæм. Уыдон сæ сæртæ нывондæн æрхастой нæ рæсугъд Райгуырæн бæстæйы, нæ дидинæфтаугæ фидæны сæраппонд.
Дменис стыр хъæу у, хæсты ветерантæ дæр дзы тынг бирæ уыд. Мæнæн мæхи дада Дудайты Къоста Соломаны фырт дæр хæсты быдырæй нал æрыздæхт. Фæлæ мæ абон цы адæймаджы тыххæй фæнды радзурын, уый дæр къаддæр лæггад нæ бакодта Стыр Фыдыбæстæйон хæсты рæстæджы рай-гуырæн бæстæйæн.
Æгæрыстæмæй ма йæм бæстæйы сæргълæууæг Иосиф Виссарионы фырт Сталин дæр куы æрæрвыста арфæйы фыстæг.
Уый уыд Цхинвалы районы Дменисы хъæуы цæрæг Дудайты Симоны фырт Баграт. 2011 азы йæ нæ фыдгулы сыхæгтæ дæр рауагътой сæхирдыгонау газет «Леуахис хеоба», зæгъгæ, уым. Æвæццæгæн та уый дæр сæхицæй рахуыдтой.
Махмæ та кады аккаг чи у, уый кой хъуамæ нæхæдæг кæнæм.
Дудайты Баграты ном хаст у: «Ветераны колхозного строя Южной Осетии»-йы чиныгмæ.
Баграт райгуырдис 1906 азы Сталиниры районы, Гуры уезды Дменисы хъæуы. Йæ сабийы бонтæ дæр арвыста йæхи хъæуы. Уыдис ын бинонтæ æмæ æртæ сывæллоны. Йæ фырт Лева фæзиан гуырдзыйы агрессийы рæстæджы. Йæ дыууæ чызджы Таня æмæ Евгения абон дæр фæллой кæнынц горæт Цхинвалы. Уæды рæстæджы Дменисы колхозон арæзтады организацигæнджытæй сæ иу уыд Баграт. Уæд, Дменис егъау хъæу кæй у, уымæ гæсгæ дзы уыд дыууæ колхозы. Уæллаг Дменисæн дæр уыд хицæн колхоз æмæ Дæллаг Дменисæн дæр.
1938 азы дыууæ колхозы баиу сты, хъæуы адæм æмткæй хъæлæс радтой Дудайты Багратæн æмæ йæ сæвзæрстой Дменисы колхозы сæрдарæй.
Уыцы бынаты Баграт æнæраивгæйæ фæкуыста суанг 1950 азмæ, ома, дыууадæс азы.

Колхоз бонæй-бонмæ экономикон æгъдауæй фидардæр кодта æмæ тагъд рæстæджы ссис районы раззагондæр колхозтæй иу. Уыцы рæстæджы сарæзтой фосы фермæтæ, колхозы уагдоны бæстыхай, 42 гектары ныссагътой дыргъбæлæстæ æмæ 9 гектары та - сæндæттæ.
Стыр Фыдыбæстæйон хæсты зын азты Баграт, Сырх Æфсады хъæбатыр сгуыхтдзинæд-тæм кæсгæйæ, паддзахадон бангмæ бахаста 30 мин сомы, хæстон хæдтæхджыты арæзтад «Советская Грузия»-мæ.
Баграт йæ фæллойадон куысты тыххæй æнæхъусдард нæ баззад хицауады 'рдыгæй.
1944 азы хорзæхджын æрцыд «Кады орден»-æй. 1946 азы та йын лæвæрд æрцыд медаль «За доблестный труд в Великой Отечественной войне 1941-1945 гг.» имени Президиума верховного Совета СССР.
Баграт афтæ зæрдиагæй кæй æххуыс кодта фронты адæмæн, уый тыххæй йæм Иосиф Виссарионы фырт Сталин дæр æрæрвыста ахæм арфæйы кады фыстæг:
Село Верхнее Дмениси
Сталинирского района Юго-Осетинской
Автономной области Грузинской ССР, представителю колхоза товарищу Дудаеву Б. С.
Примите мой привет и благодарность Красной Армии, Баграт Семенович, за вашу заботу о воздушных силах Красной Армии
И. Сталин
Ныртæккæ ацы кады арфæйаг фыстæг ис Цхинвалы районы Дменисы астæуккаг скъолайы конд, хицæн къуым ын арæзт кæм ис, уым.
Ахуыргæнинæгтæ йæ кæсынц æмæ йын стыр кад кæнынц.
Ничи ферох æмæ ницы ферох. Дудайты Баграт дæр иу ран нæ бадт. Йæ тыхтыл æнæауæрдгæйæ, куыста колхозы æмæ стыр хайбавæрд бахаста куыд колхозы арæзтад-мæ, афтæ рæзгæ фæлтæры хъомыладмæ дæр. Уый тыххæй у уæлдай бузныджы аккаг.
Рухсаг уæд, æппæт Советон Цæдисы Стыр Фыдыбæстæйон хæсты ветерантæй не ‘хсæн чи нал ис, уыдон.
Абон ма сæрæгас чи сты, уыдон та сæ цард æрвитæд æнæниз æмæ хъæлдзæгæй.
Нæ сæртæй сын кувдзыстæм ныллæг .
ДУДАЙТЫ Земæ