Nog adres

Президент фембæлд парламенты æппæт партиты минæвæрттимæ

edinya_osetiya.jpgРХИ-йы Президент Тыбылты Леонид фембæлд «Иугонд Ирыстон»-ы партийы минæвæрттимæ фембæлды рæстæджы Президент банысан кодта, зæгъгæ, фæнд кæны парламентон партитæ æмæ фракциты лидертимæ регуляронæй æмбæлын.
«Мæнæн цалдæр фембæлд уыд Парламенты æндæр политикон партиты фракциты минæвæрттимæ. Æз бахахх кодтон, цæттæ кæй дæн семæ регуляронæй æмбæлынмæ, цæмæй кæрæдзийæн дзурæм нæ хъуыдытæ æмæ фæндæттæ. Æз кæддæридæр цæттæ дæн сæвзæргæ проблемæтыл уынаффæ кæнынмæ æмæ цыфæнды фæндæттæм æркæсынмæ, кæцытæ здæхт сты мæ адæмы царды уаг фæхуыздæр кæнынмæ æмæ республикæйы рæзтмæ», — загъта паддзахады сæргълæууæг.
Ахæм хъусинаг ма Тыбылты Леонид сарæзта ацы сæвзæрст Парламенты фыццаг сессийы дæр.
«Æз уæд загътон, зæгъын мах — хицауиуæгады закъондæттынад æмæ æххæсткæнынады къабæзтæ, иумæ хъуамæ кусæм. Мæнмæ афтæ кæсы, æмæ æрмæстдæр афтæмæй нæ къухы бафтдзæн хорз фæстиуæг», — загъта Президент.

Тыбылты Леониды ныхæстæм гæсгæ, хорз фæстиуджыты тыххæй Хуссар Ирыстон фæстаг азты исы æвæрццаг аргъ йе стратегион партнеры æрдыгæй. Ууыл дзырд цæуы бæрзонд æмвæзадыл фембæлдтыты рæстæджы дæр.
«Уæрæсейы Федерацийы Президент Владимир Путин стыр аргъ кæны республикæйы стабилон уавæрæн. Уый нысан æрцыд йемæ фембæлды рæстæджы. Мах иумæ хъуамæ цæуæм размæ, уымæй дæр не ‘нтыстытæ хъахъхъæнгæйæ æмæ фылдæр кæнгæйæ», — банысан кодта уый.
Президент ма дзырдта уыцы уавæры тыххæй дæр, кæцы æркодта уымæ, æмæ Парламенты сесси нæ ауагъдæуыд, кæцыйы боны фæткы уыд бирæ ахсджиаг фарстатæ.
«Абон уый тыххæй нал дзурдзыстæм, уымæн æмæ вæййы ахæм кусæгон моменттæ дæр. Æз фембæлдтæн Парламенты иннæ партиты минæвæрттимæ, кæцытæ радзырдтой, сессийы цæй тыххæй нæ уыдысты, уый аххосæгты тыххæй. Сæрмагондæй уый хауд боны фæткы иуæй-иу фарстатæм. Фæлæ мæ фæнды зæгъон уын, уыдон, куыд цъусдæртæ, афтæ сæхимæ домынц цыты ахаст. Номхуындæй уый нымайынц сессийы къуыхцыйы æцæг аххосагыл», — загъта Тыбылты Леонид.
Паддзахады сæргълæууæг радзырдта, æртæ партийы лидертæ фембæлды рæстæджы кæй банысан кодтой, зæгъгæ, æрмæстдæр алкæйы хъуыдытæ бахынцгæйæ ис райсæн конструктивон уынаффæтæн, æмæ ма йæ ныхасмæ бафтыдта, зæгъгæ, ацы уавæрмæ куыдфæндыйы цæстæй нæ кæсы æмæ æрсидт æппæт политикон партиты тыхтæм куыст адарддæр кæнынмæ æмæ хъæуæг компромисс ссаргæйæ.
«Мах дунейæн хъуамæ æвдисæм, цивилизацион паддзахад кæй стæм, цыран хицауиуæгады æппæт къабæзтæ дæр æмгуыст кæнынц. Абон уæ æз æрæмбырд кодтон, цæмæй адзурæм, сабыр куыстæн нæ цы хъыгдары, уыдоныл. Парламентæн ис куысты план, кæцымæ гæсгæ хъуамæ архайа депутатон корпус», — бахахх кодта Президент.
Тыбылты Леонид ма йæ ныхасмæ бафтыдта, зæгъгæ, закъоны проекттыл Парламент хъуамæ куса активондæрæй, закъондæттынады инициативæтæ размæ кæнгæйæ æмæ банысан кодта, зæгъгæ, уый тыххæй дзырдта æрæджы Парламенты Сæрдар æмæ йæ хæдивæгимæ фембæлды рæстæджы.
«Иугонд Ирыстон»-ы партийы минæвæртты инициативæмæ гæсгæ, дарддæр дзырд цыд æнæ прессæйæ.
***
«Адæмон парти» æмæ парти «Адæмы иудзинад»-ы минæвæрттимæ фембæлгæйæ, Тыбылты Леонид байхъуыста фракциты уæнгты хъуыдытæм. «Адæмон парти»-йы лидер Плиты Алыксандры ныхæстæм гæсгæ, цы сесси нæ ауагъдæуыд, уый у, закъондæттынадон органы æнæлаз куыст кæй нæй, уымæн йæ кульминаци.
edinstvo_naroda.jpg«Хъыгагæн, къаддæрбæрц депутатты, ома, æртæ политикон партийы — „Ныхас“, „Адæмы иудзинад“ æмæ нæ партийы хъуыды афæдзы дæргъы хынцыд нæ цыд уынаффæтæ исгæйæ. Ацы факт æркодта сæвзæргæ ситуацимæ. Мах кæддæриддæр кæй нæ фехъусынц, уымæй дарддæр ма депутатон корпусы адресыл æдзух хъуысынц æфхæрæн ныхæстæ, кæцытæ нæ хауынц „Иугонд Ирыстон“-ы партимæ», — загъта Плиты Алыксандр.
Партийы минæвæрттæ куыд банысан кодтой, афтæмæй Парламенты раздæры æрсидты куысты уыдис бирæ быцæуаг фарстытæ, уыдис дзы карз дискусситæ, фæлæ хъуыддаг уый онг никуы бахæццæ.
«Адæмы иудзинад»-ы фракцийы минæвæрттимæ æндæр фембæлды Парламенты Сæрдары хæдивæг, парти «Адæмы иудзинад»-æй депутат Тедеты Руслан загъта ахæм хъуыды, зæгъгæ, «нæ республикæйы бындурæвæрджытæ Хуссар Ирыстоны Констиутуцимæ æнæхъуаджы нæ бахастой бирæпартион парламентон системæ, уымæн æмæ закъондæттынадон хицауиуæгады хъуамæ уа æмуæздзинад».
Партийы æндæр минæвар, Социалон политикæ æмæ æнæниздзинад хъахъхъæныны фæдыл Парламенты комитеты сæрдар Къозонты Алан бузныг загъта Тыбылты Леонидæн фембæлды тыххæй æмæ банысан кодта, зæгъгæ, нæй ахæм проблемæтæ, кæцытæн нæй скъуыддзаггæнæн, политикæ кæй у компромисстæ агурын.
«Цахæмфæнды фарстытæ скуъыддзаггæнгæйæ дæр, алчидæр хъуамæ разамынд кæна йæ намысæй æмæ хъуыды кæна, цæмæй ма разиан кæна йæ адæмæн», — загъта уый.
Ацы партийæ æндæр депутат — Плиты Агуындæ фехъусын кодта, зæгъгæ, цы сесси нæ ауагъдæуыд, уымæ æнæууæнкдзинады вотумы тыххæй фрстæй дарддæр хаст æрцыдысты бирæ æндæр ахсджиаг фарстытæ, фæлæ уыдонмæ дæр нырма закъондæттынадон орган не ‘ркаст, фылдæр чи у, уыцы парти «Иууон Ирыстон»-ы аххосæй. — Нæ инициативæмæ гæсгæ сессийы агъоммæ фембæлд уыдис Парламенты Сæрдаримæ, цыран мах нæ фæндон загътам, цæмæй аргъæвд æрцæуа Фæсарæйнаг хъуыддæгты министрмæ æнæууæнчы вотум равдисыны тыххæй фарст æмæ Парламент йæ куыст дарддæр кæна иннæ ахсджиаг фарстаты фæдыл. Мах райстам дзуапп, зæгъгæ, ацы фарст у йæ партийы принципиалон позици. Æмæ ма дарддæр цæуыл дзырдтаиккам? Афтæ цæуы, цыма иннæ фарстытæ ахæм ахсджиаг не сты«.
Парти «Адæмы иудзинад»-ы лидер Чилæхсаты Владимир дæр банысан кодта, зæгъгæ, йæ партийы, куыд иннæты, афтæ нæ фехъуыстæуыд.
«Мах дæр сæвзæрстой адæм æмæ сæ хъуыдытæ хъуамæ хынцыд цæуой, Парламент уынаффæтæ куы иса, уæд», — загъта уый.
Президент фембæлды кæрон ноджыдæр банысан кодта, кæй йæ фæнды байхъусын хицæн депутатты æмæ фракциты лидерты хъуыдытæм дæр æмæ ма йæ ныхасмæ бафтыдта, зæгъгæ, алкæмæн дæр йæ куст хъуамæ здæхт уа рæзт æмæ стабилондзинадмæ, цæй тыххæй махæй абон бузныг у не стратегион партнер — Уæрæсейы Федераци.
Мах бирæ бавзæрстам, фæлæ нын уæддæр бантыст 2011 азы кæрон æмæ 2012 азы райдианы кризис аиуварс кæнын æмæ æппæт цæрджыты æрбангом кæнын. Мах кæддæриддæр хъуамæ хъуыды кæнæм адæмы интересты тыххæй æмæ ма дих кæнæм æхсæнады«, — загъта уый.
Тыбылты Леонид ма банысан кодта, зæгъгæ, æнæмæнгхъæуæг у алкæй хъуыды дæр хынцын æмæ æрмæстдæр уæд уынаффæтæ дзуапп дæтдзысты адæмы интерестæн. Уый æрсидт Парламенты æппæт политикон тыхтæм, цæмæй ссарой компромисс, кæцы æнæмæнгхъæуæг у Парламенты гъæдджын куыстæн.
«Æнæмæнгхъæуæг у иумæ компромисс агурын æмæ разылæууæг хæстæ скъуыддзаг кæнын. Парламенты куыст ма хъуамæ фескъуыйа, хицауиуæгады алы къабаз дæр дзуапп дæтты, Конституци йыл цы хæстæ æвæры, уыдоны тыххæй. Мах хъуамæ кусæм куыд иу æнæхъæн механизм», — кæронбæттæны загъта паддзахады сæргълæууæг.
***
РХИ-йы Президент Тыбылты Леонид парламентон парти «Ныхас»-ы минæвæрттимæ фембæлды банысан кодта, зæгъгæ, РХИ-йы Парламентæн цы сесси ауагъд не ‘рцыд, уымæн рахонæн нæй республикæйы æхсæнадон-политикон ситуацийы кризис.
«Æз афтæ нæ нымайын æмæ республикæйы æхсæнадон-политикон ситуацийы ис кризис, фæлæ уый у серьезон сигнал Хуссар Ирыстоны Парламенты куысты, кæцыйы кæддæриддæр хъуамæ уа æрмæстдæр конструктивизм. Афтæ куынæ уа, уæд бæрндзинад æвæрд цæуы Парламенты къухдариуæггæнджытыл», — загъта паддзахады сæргълæууæг.
Паддзахады сæргълæууæджы ныхæстæм гæсгæ алы къухдариуæггæнæг дæр хъуамæ йæ зæрдыл дара уыцы бæрндзинады тыххæй, кæцы йыл сæвæрдтой йæ адæм.
partiya_nyhas.jpg«Разамынады махæй алчи дæр абон бæрнджын у нæ æмбæстæгты стабилондзинад æмæ æнцойады тыххæй. Æмæ куыд президент, кæцы у Конституцийы гарант, кæцы дзуапп дæтты адæмы домæнтæн, фадат нæ ратдзынæн сабырад æмæ æнцойад фехалынæн, кæцы махæн нæ къухты бафтыд зынтæй нæ республикæйы», — банысан кодта Президент.
Тыбылты Леонид банысан кодта, кæй фæнд кæны фембæлдтытæ ауадзын, Парламенты чи сты, уыцы партитимæ, афтæ ма радзырдта æрæмбырдуæвджытæн Парламенты Сæрдар Бибылты Анатоли æмæ йæ хæдивæг Мамиты Иналимæ йын раздæр цы фембæлд уыдис, уый тыххæй.
«Уыдис стыр æмæ серьезон ныхас, кæцыйы рæстæджы æз æрсидтæн Парламентмæ конструктивон куыстмæ. Кæй зæгъын æй хъæуы, дзырд цыдис, цы сесси нæ ауагъдæуыд, уый тыххæй дæр. Ам æз ногæй сфæлхатт кæндзынæн, кæй бацамыдтон, уым кæй ницы „трагеди“ ис, фæлæ уый у серьезон сигнал Парламенты куысты, кæцымæ йæ хъусдард хъуамæ аздаха закъондæттынадон органы разамынад æмæ куыст æрбæстон кæна», — банысан кодта паддзахады сæргълæууæг.
Тыбылты Леонид куыд загъта, афтæмæй хицауиуæгады æххæсткæнынадон æмæ закъондæттынадон къабæзты куыст здæхт хъуамæ уа æрмæстдæр Хуссар Ирыстоны адæмы фæрныгады рæзт æмæ хуыздæр кæнынмæ.
«Мах кусæм нæ адæмы, нæ республикæйы тыххæй. Хуссар Ирыстоны цæрджытæ хъуамæ хъусой æрмæстдæр хорздзинæдтæ: æххæсткæнынадон хицауиуæгады куыст, парламенты, партиты куыст, æвзæрстытæй æвзæрстытæм нæ, фæлæ регулярон æгъдауæй, æдзухæй. Ныртæккæ та цы рауад? Мах райстам негатив, кæцы бынтондæр здæхт нæу нæ республикæйы фæрныгады, йæ имиджы æмвæзад бæрзонддæр кæнынмæ. Æз ноджыдæр банысан кодтон, Парламент кæй хъуамæ кæна йæ комкоммæ куыст æмæ æххæст кæна закъонфæлдыстадон функци», — йæ ныхасмæ бафтыдта Президент.
Уый банысан кодта, зæгъгæ, «абонмæ цъус фæндæттæ ис закъондæттынадон инициативæимæ. Уыдон фылдæр цæуынц æххæсткæнынадон хицауиуæгадæй æмæ æппындæр нæ аив кæнынц закъондæттынадон органы куыст».
«Хуссар Ирыстоны разамынад иттæг хорз уыны, нырма цæс хъæуы саразын республикæйы æндидзынад æмæ рæзтæн. Æмæ уый уынынц æрмæст Парламент нæ æмæ хицæнæй сисгæйæ иу парти, уый уыны махæй алчи дæр. Йæ разы æндæр хæстæ ничи æвæры. Мах алцыдæр уынæм æмæ æмбарæм», — йæ ныхасмæ бафтыдта Президент.
Тыбылты Леонид ма банысан кодта, зæгъгæ, уымæн абон фембæлд уыдзæн, Республикæйы Парламенты чи сты, æппæт уыцы политикон партиты минæвæрттимæ.
«Æз кæддæриддæр цæттæ дæн, Хуссар Ирыстоны рæзтмæ здæхт чи сты, ахæм хъуыдытæ æмæ фæндæттæм байхъусынмæ. Æз хъуыды кæнын афтæ æмæ мах хъæуы арæхдæр æмбæлын, фæндæттимæ ралæууын, кæрæдзиимæ сæ зонгæ кæнын», — загъта Президент.
Йæ рады парти «Ныхас»-ы минæвæрттæ æмæ йæ лидер Æлборты Алан паддзахады сæргълæууæгæн радзырдтой, сессимæ цæй тыххæй нæ бацыдысты, уый.
«Мах нæ хъавæм Парламенты куыст ныууромынмæ. Нæ хъуыды, парламентон фракцийы, нæ партийы алы депутаты хъуыды ничи фехъуыста. Парламенты Сæрдаримæ фембæлды мах банысан кодтам, фæсарæйнаг хъуыддæгты министр Санахъоты Дауытмæ æнæууæнчы вотум равдисыны тыххæй фарстмæ ахасты нæ хъуыды хынцыд не ‘рцыд уыйразмæ сессийы. Фылдæр чи сты, уыцы парти „Иуугонд Ирыстон“ йæхæдæг уынаффæ райсгæйæ, махимæ ницы консультацитæ ауагъта. Уымæ гæсгæ мах не сразы стæм сессийы хайадисын, кæцымæ хаст æрцыдис ацы фарст», — загъта уый.
Æндæр фарстытыл кусыны, банысан кодтой парти «Ныхас»-ы минæвæрттæ, уыдон цæттæ сты хайадисынмæ, фæлæ ма банысан кодтой, зæгъгæ, куыстæн хъуамæ уа конструктивон характер.
Æддагон политикæ æмæ æхсæнпарламентон бастдзинæдты фæдыл РХИ-йы Парламенты комитеты сæрдар Коцты Игорь банысан кодта, зæгъгæ, алы депутатæн дæр фракцийы хъуыдыйæ дарддæр ис æмбæстагон позици, кæцыимæ уыдон æрцыдысты ахæм хатдзæгмæ.
Парти «Ныхас»-æй депутат Бесаты Зитæ табанысан кодта, зæгъгæ, алы ран дæр æмæ алы хатт дæр хуыздæр фæрæз у бадзурын æмæ иу хъуыдымæ æрцæуын.
«Ис алыгъуызон цæстæнгæстæ æмæ уыдоныл æрдзурын, æруынаффæ кæнын хъæуы. Уымæ гæсгæ нырма цалынмæ фарст уынаффæйы стадийы ис, уæдмæ йæ иуварс авæрын хъæуы, цæмæй æндæр ахсджиаг фарстаты фæдыл куыст ма æрлæууа. Æппæт хъуыддæгты дæр хъæуы паддзахдон æгъдауæй скъуыддзаг кæнын. Ис позици æмæ ис фарстытæ, кæцытыл хъæуы кусын», — загъта уый.