Nog adres

Фембæлд Гафезы уынджы цæрджытимæ

img_0793.jpg
РХИ-йы Президент Тыбылты Леонид фæбалц ис горæт Цхинвалы Гафезы уынгмæ æмæ фембæлд бынæттон цæрджытимæ. Цæрджытæ йæм бахатыдысты, ацы районы сабитæн хъазæн фæзуат саразыны куырдиатимæ.
Бæстæйы сæргълæууæг бахæс кодта горæты администрацийы сæргълæууæг Æлборты Аланæн ацы фарстыл бакусын æмæ сабиты фæзуаты хæрзарæзтады тыххæй бæлвырд фæндæттæ бахæссын. Уый банысан кодта, зæгъгæ, алкæцы фарстмæ дæр æркæсын хъæуы цæстуынгæ нывæст æм куы уа, уæд.
Микрорайоны цæрджыты фæндонмæ гæсгæ спортивон залимæ фæзуат саразæн ис дыууæуæладзыгон кæлæддзаг арæзтады бынаты. Уый цæрынæн нал бæззы æмæ йæ хъæуы ныппырх кæнын.
«Ацы бæстыхай ам лæууы 20 азы дæргъы. Уый цæрынæн нал бæззы, æмæ ныртæккæ æвзæрын кæны тæссагдзинад, уымæн æмæ нæ сывæллæттæ арæх балидзынц уырдæм. Хуыцау бахизæд, фæлæ сыл мацы æрцæуа», - банысан кодтой уыдон.
Тыбылты Леонид, Æлборты Алан æмæ Паддзахадон исад æмæ зæххы фæдыл ахастыты Комитеты сæрдар Пæррæстаты Сергеимæ æркастысты бæстыхаймæ. Горæты администрацийы сæргълæууæг куыд фехъусын кодта, афтæмæй ацы арæзтад у кооперативон.
«Махæн не 'мбæстæгты æдасдзинадæй сæйрагдæр ницы ис, уæлдайдæр та сывæллæтты. Мах уынæм, ацы арæзтад, æцæгæйдæр, æдзæллаг уавæры кæй ис, æмæ йæ ныппырх кæнын кæй хъæуы. Фæлæ, кæд кооперативон у, уæд уый нысан кæны, æмæ йын ис хицæуттæ», - загъта бæстæйы сæргълæууæг. Уый бахæс кодта Æлборты Алан æмæ Пæррæстаты Сергейæн цыбыр æмгъуыдмæ ацы бæстыхаймæ хауæг фарстатыл бакусын.
Бæстæйы сæргълæууæгмæ ма радтой бирæнымæц фарстатæ. Микрорайоны цæрджытæй кæй-дæрты цымыдис кодта уынджы астæуты цы фæндаг цæуы, уыцы фарст, æндæрты та уынджы хæрзарæзтады æмæ æндæр æрвылбонон фарстытæ. Æппæт ацы фарстыты фæдыл Президент радта хæслæвæрдтæ горæты администрацийы сæргълæууæгæн.

Президент стыр хъусдард аздæхта бынæттон фæсивæды проблемæтæм, кæцытæ Тыбылты Леонидмæ лæвæрдтой бирæнымæц фарстытæ. Фæсивæд æм бахатыдысты, цæмæй сын баххуыс кæна футболæй хъазæн фæз сифтонг кæныны тыххæй. Уыдон æй сæхи хъарутæй ныридæгæн расыгъдæг кодтой. Президент зæрдæ бавæрдта фæсивæдæн ацы фарст аскъуыддзаг кæныны тыххæй, уымæн æмæ, йæ ныхæстæм гæсгæ, фæсивæды фарстытæ сты иууыл ахсджиагдæр.
Микрорайоны цæрджытæ райгондæй баззадысты бæстæйы сæргълæууæгæй йæ лæмбынæг ахасты тыххæй, æмæ йын зæрдæ бавæрдтой, ацы фарстыты скъуыддзаг кæныны хъуыддаджы активон хайад кæй райсдзысты.
Республикæ Хуссар Ирыстоны Президенты официалон сайт