Nog adres

Цæгат Ирыстоны

DSCN0516.JPG
ФЕМБÆЛД БИБЛИОТЕКÆЙЫ
Ацы аз Культурæйы æмæ литературæйы азы фæлгæтты бирæ мадзæлттæ арæзт цæуы. Уыдонæй уыд, æрæджы Дзæуджыхъæуы фæси-вæдон библиотекæйы цы фембæлд - тымбыл фынг уыд, уый дæр. Уыцы фембæлд сæрмагондæй арæзт æрцыд 3 марты, Фыссæджы дунеон бон кæй уыд, уый фæдыл. Ардæм æрбацыдысты ахуырады управленийы бæрнон кусæг Бигъуылаты Людмилæ, Фысджыты цæдисы æмсæрдар Ходы Камал, иннæ фысджы-тæ Хуыгаты Сергей, Дзасохты Музафер, Хозиты Барис, Колыты Витали, Будайты Милуся, Хохойты Энвер, журналисттæ, студенттæ, чиныг кæсджы-тæ… Фембæлд амыдта библиотекæйы директор Царахаты Ритæ æмæ ныхасы бар радта Ходы Камалæн. Уый бакаст, хицауады номæй фысджытæм Хицауады Сæрдары хæдивæг Челæхсаты Рустем кæй æрбарвыста, уыцы арфæйы телеграммæ Фысджыты дунеон боны фæдыл. Уый фæстæ Камал радзырдта Фысджыты цæдисы историйæ цымыдисаг хабæрттæ, бакаст цалдæр æмдзæвгæйы.
Тынг мидисджын уыд филологон зонæдты доктор, профессор Хуыгаты Ирланы доклад литературæйы иуæй-иу фарстаты фæдыл. Хуыгайы фырт бæлвырддæр æрлæууыд литературон критикæйы домæнтыл. Цы уацмыстæ раиртæста, уыдон рахаста фембæлды архайджыты размæ.
Нысанмæ здæхт уыдысты йæ фæндтæ литературон критик Гетойты Ларисæйæн дæр. Уый куыд банысан кодта, афтæмæй литературæйы азы сног кæнын хъæуы раздæры традицитæ. Уыдон та сты: мыхуыры фæрæзты æдзухон рубрикæтæ скæнын, тымбыл стъолтæ, фембæлдтытæ аразын фысджытимæ, юбилейтæ бæрæг кæнын, хъæуты, районты цæрджытимæ, скъоладзаутимæ, литературон изæртæ, чиныгкæсджыты кружоктæ аразын æмæ афтæ дарддæр. Куыд ма бафиппайдта, афтæмæй нæ фысджытæ се 'ппæт дæр тыхсынц, чиныгкæсæг кæй нал ис, ууыл, æмæ уæлдæр ранымад мадзæлттæ та стыр ахъаз фæуаиккой, цæмæй фæсивæд чиныгмæ се 'ргом тынгдæр раздахой.

Уыцы лыггæнинаг фарстаты фæдыл уыд йæ ныхас Дзасохты Музаферæн дæр, уый дæр бахаста бæлвырд фæндæттæ, стæй бакаст йе 'мдзæвгæтæй цалдæр.
Уый фæстæ 13-æм скъолайы ахуырдзаутæ бакастысты нæ ирон фысджытæй цалдæры æмдзæвгæтæ. Культурæйы колледжы ахуыргæнинæгтæ та равдыстой сæ аивад зарын æмæ фæндырдзæгъдынæй.
Нæ уацх.