Nog adres

Сылгоймаг барджын кæны фæндагыл

Хуссар Ирыстоны ис æрмæстдæр иунæг паддзахадон автоахуыргæнæндон, фæлæ хъæздыг у йæ истори. Уый кусын райдыдта æхсайæм азты Хуссар Ирыстоны Автономон областы мидхъуыддæгты управленийы. Ахуыргæнæндонæн йæ куыст урæд æрцыд гуырдзыйы агрессийы аххосæй, фæстæдæр, 2013 азы ногæй райдыдта йæ архайд, Хуссар Ирыстоны паддзахадон университеты цур. Бирæ автоуарзджытæ ссардтой ам бынат, бирæ дзы рацыд дæсны шофыртæ.
Нæхæдæг æй куыд уынæм, афтæмæй нæ абоны царды тынг зын у æнæ хæдтулгæйæ цардимæ æмдзу кæнын, уымæн æмæ царды уылæнтæ размæ бырсынц тагъддæр æмæ тагъддæр. Остап Бендер куыд загъта, афтæмæй хæдтулгæ æртынæм азты дæр куынæуал уыди хъæздыгдзинады нысан. Уый йæ хуыдта «средство передвижения», ома, хъуыддæгты фæдыл цæмæй дæ бон азилын уа, уый фæрæз. Цардæн та йæ домæнтæ сты, фылдæр нын цæмæй æнтыса. Кæй зæгъын æй хъæуы, хъуамæ нæ уый ахæм тыхст уавæры ма баппара, цæмæй нæ цард дугъон бæхы хуызæн суа, æнцой мауал зонæм, фæлæ куыд амал ис, афтæмæй нæхи фæливын ма хъуамæ бауадзæм царды цыбыр æмгъуыдæн, цардæн йæ гуылфæны лæгæрдгæйæ.
Чизоны, исчи зæгъа, цас диссаг у шофыры куыст, зæгъгæ, фæлæ бынтон афтæ дæр нæу!

Хуссар Ирыстоны автоахуыргæнæндоны куыст æвæрд у иттæг бæрзонд æмвæзадыл. Стыр хъусдард здæхт цæуы куыд теорийы, афтæ практикон зонындзинæдтæм дæр. Мæхæдæг уыдтæн æвдисæн, ахуыры процессы æртæ ахуыргæнæджы - Дзабиты Владимир (теори), Гатыгкоты Эдуард æмæ Гатыгкоты Альберт (практикæ) цæй диссаджы хъарм зæрдæйы ахастимæ хæлар кæнынц сæ зонындзинæдтæ ахуыргæнинæгтæн, уымæн. Адæймаг ног хъуыддагыл зынтæй фæцайдагъ вæййы бирæ хатт ахæм гуымир рæдыд ауа-дзы, æмæ фæлтæрд ахуыргæнæгмæ уый хъуамæ дис фæкæсид, хъуамæ рамæсты уаид, куыд ницы дæм хъары, зæгъгæ. Раст зæгъгæйæ, мæхæдæг арæх уагътон ахæм рæдыдтытæ, æмæ-иу тынг æфсæрмы кодтон ацы дыууæ ахуыргæнæгæй, фæлæ уæддæр уыдон никуы сдзырдтой схуыст ныхас æвæлтæрд ахуыргæнинагмæ.
Мæхæдæг æвдисæн уыдтæн, ацы ахуыргæнæндоны ахуыргæнинæгты бæрæг фылдæр хай сылгоймæгтæ кæй сты. Уыцы хъуыддаг хорзæрдæм кæй æндавы фæндаджы æдасдзинадыл дæр æмæ ахуыргæнæндоны куыстыл дæр, уый зын бауырнæн у, фæлæ æцæгæйдæр афтæ у. Уыцы хъуыдыйæн æвдисæн сты ахуыргæнджытæ Дзабиты Владимир æмæ Гатыгкоты Эдуард дæр. Дзабиты Владимир куыд зæгъы, афтæмæй сылгоймаг шофыртæ сты бирæ ауæрдондæр æмæ арæхстджындæр, фистæгæй цæуджытæм дæр æмæ фæндаджы нысæнттæм дæр сты цыртдзастдæр. Хуссар Ирыстоны автоинспекцийы информаци æмæ пропагандæйы хайады бæрнон кусæг Уалыты Альмæ дæр ацы хъуыддагыл уæлдай ницы загъта. Уый хъуыдымæ гæсгæ, сылгоймæгтæ нозтмæ иттæг æмхиц не сты, фæндаджы æнамонд цаутæ та фылдæр нозтджынты аххосæй æр-цæуынц.
Уæдæ сылгоймаг хæдтулгæйы руль йæхимæ кæй æрбайста, æмæ барджын кæй ссис фæндагыл дæр, уымæн йæ аххосæгтыл куынæ дзурæм, уæд ын ис иттæг зæрдæрухсы фæстиуджытæ. Ацы хъуыддаг цард йæхæдæг æрдомдта, æмæ царды домæны ныхмæ та адæймагæн йæ бон цы у.
Нæ ахуыргæнджытæ нын куыд амыдтой, афтæмæй шофыр хъуамæ æнкъаргæ кæна хæдтулгæйы мидызмæлд. Æнкъарыны хъуыддæгты та сылгоймагæн æмбал кæм ис!
ГОДЖЫЦАТЫ Н.