Nog adres

«Хуры тынтæ»-йы дыккаг номыр

Æрæджы мыхуыры рацыд Хуссар Ирыстоны сабиты журнал «Хуры тынтæ»-йы дыккаг номыр. Уый кæд иу чысыл афæстиат, уæддæр РХИ-йы Хицауады финансон æххуысы руаджы рухс федта æмæ фæхæццæ йæ чысыл журналкæсджытæм.
«Хуры тынтæ»-йæн йæ фыццаг номыр та мыхуыры рацыд 2014 азы. Журналæн арæзт æрцыд презентаци, цыранмæ æрбамбырд сты нæ республикæйы интеллигенцийы минæвæрттæ, ирон æвзаджы специалисттæ. Джусойты Нафи райзæрдæйæ банысан кодта журналы фæзынд æмæ йын бузныг загъта йæ сæйраг редактор Цыбырты Мадинæйæн. Загъта ма, зæгъгæ, хуыздæр уаид, æмæ журнал афæдзы мидæг æхсæз хатты бæсты куы цæуид æрвылмæй дæр, фæлæ уæдæй нырмæ кæд дзæвгар рæстæг рацыд, уæддæр журналы номыртæй рацыд æрмæстдæр дыууæ.
Цыбырты Мадинæ рагæй фæстæмæ у ирон мыхуыры хæлар, бирæ азты дæргъы фæкуыста рауагъдад «Ирыстон»-ы, дыууæ азмæ æввахс та бакуыста журнал «Фидиæуг»-ы редакцийы. Сылгоймаг йæ мадæлон æвзагмæ уарзондзинад йæ мады гуыбынæй рахаста, хæрз чысылæй фæцайдагъ ма-дæлон æвзагæн аргъ кæныныл, рагæй фыссы сабитæн æмдзæвгæтæ. Йæ фыццаг æм-дзæвгæ ныффыста, уартæ ма Цхинвалы районы Зары хъæуы астæуккаг скъолайы 8-æм къласы куы ахуыр кодта, уæд æмæ йын мыхуыр æрцыд журнал «Фидиуæг»-ы. Æмдзæвгæйы уыд ахæм рæнхъытæ: «Æз куы суаин фыссæг, уæд ныффыссин стыр роман Ирыл». Сылгоймаг кæд стыр роман нæ ныффыста, уæддæр ын бирæ бантыст саразын ирон мыхуыры къабазы. Мыхуыры уал ын рацыд сывæллæттæн йæ 'мдзæвгæты æмбырдгонд «Мæ лæвар», зæгъгæ. Ныртæккæ йын мыхуырмæ цæттæ сты ноджы æртæ чины-джы, æмæ йæ ныфс ис, уыдон дæр рухс кæй фендзысты, уымæй. Æмдзæвгæтæ фыссынæн ын тынг баххуыс сты Дзугаты Георги (дзæнæтыбадинаг) æмæ поэт Хъодалаты Герсан, уыдон-иу ын сæ раппæлыдысты æмæ йæ афтæмæй разæнгард кодтой.
Цыбырты Мадинæ нын журнал рауадзыны тыххæй фергом кодта йæ хъуыдытæ: «Цивилизацион бæстæтæй алкæцыйы дæр мыхуыры цæуынц сывæллæттæн цалдæргай журналтæ сæ мадæлон æвзагыл. Цæгат Ирыстон-Аланийы дæр сывæллæттæн уадзынц цал-дæр журналы, уыдоны нымæцы «Ногдзау» æмæ «Барсик» дæр. Арæх-иу сæм батæхуды кодтон, зæгъын, искуы хуссарирыстойнаг сывæллæттæ дæр куы бацин кæниккой сæ номыл уагъд журналыл. Фæстаг азты уæл-дай стырдæр хъусдард здæхт цæуы мадæлон æвзаджы рæзтмæ. Уый фæдыл РХИ-йы Хицауады цур арæзт æрцыд къамис дæр. Къамисы уæнгтæ бакуыстой программæ, цыран 9-æм пункты нысан цæуы мадæлон æвзагыл сывæллæтты журнал рауадзын. Уый базонгæйæ, сарæзтон макет æмæ йæ бавдыстон РХИ-йы Хицауад æмæ Ахуырад æмæ зонады министрадмæ. Мæ фæндыл тынг бацин кодта РХИ-йы Парламенты раздæры Сæрдар Коцты Станислав дæр, уый бахатыд РХИ-йы Хицауады Сæрдары раздæры хæдивæг Джиоты Аллæмæ, кæцыйы финансон æххуы-сы руаджы журнал «Хуры тынтæ»-йы фыццаг номыр федта рухс.
Хуссарирыстойнаг сывæллæттæн æнæмæнгæй дæр хъæуы уадзын сæ мадæлон æвзагыл журнал. Стыр уырыссаг фыссæг М.Горький загъта, зæгъгæ, фыссын хорз хъæуы, фæлæ ноджы хуыздæр фыссын та хъæуы сывæллæттæн, уымæн æмæ сывæллæттæ сæхæ-дæг хицæн паддзахад сты. Æнæуыйдæр мæ рагæй фæстæмæ фæндыд нæ чысыл хуртæн исты хорзы бацæуын æмæ мын куыддæр фадат фæцис, афтæ æппæт тыхтæй дæр бацархайдтон, цæмæй журнал рухс федтаид, уый тыххæй. Мæ фæнд у нæ республикæйы районты, хъæуты скъолатæм бацæуын, цæмæй сбæрæг кæ-нон курдиатджын скъоладзауты æмæ журналы мыхуыр кæной се 'мдзæвгæтæ, аргъæуттæ, нывтæ», - радзырдта Цыбырты Мадинæ.
Журнал хуызджын, рæсугъд фæлыст кæй у, алыгъуызон нывтæ дзы кæй ис, уымæй уæлдай тынгдæр йæхимæ æлвасы сывæллæтты. Номыр баконд æрцыд сæргонд «Аргъæутты дунейæ», цыран мыхуыр æрцыдысты аргъæуттæ «Рувас æмæ уæрыкк», «Хур æмæ хæфс». Сæргонд «Сфæлдыстадон бын-тæ»-йы мыхуыр æрцыдысты сабитæн Дзугаты Георги, Икъаты Владимир, Цæгæраты Гиго, Плиты Харитоны фыст æмдзæвгæтæ. Сæргонд «Арвырон»-ы та мыхуыр сты поэт Хъодалаты Герсан, Харебаты Леонид, Гуыцмæзты Мери, Туаты Ленæ, Джиоты Катяйы æмдзæвгæтæ. «Фæндараст мын зæгъ», зæгъгæ, ахæм сæргонды бын æрыгон журналкæсджытæ бакæсдзыстыБагаты Эмилия æмæ Гаглойты Оксанæйы фыст аргъæуттæ «Дыууæ æмбалы» æмæ «Бæх æмæ рувас». Афтæ ма Плиты Кристинæ, Плиты Гришикы æмдзæвгæтæ. Сæргонд «Кæстæрты цæстæнгас мадæлон æвзагмæ»-йы та сабитæ сæ мадæлон æвзагæн куыд аргъ кæнынц, уый базоныны тыххæй сæйраг редактор фæуазæг Цхинвалы 6-æм астæуккаг скъолайы 8-æм «а» къласы ахуыргæнинæгтæм. Журналы мыхуыр æрцыдысты Багаты Эмилия, Гаглойты Оксанæ, Дыгъуызты Руслан, Джиголаты Илонæ, Джиголаты Аринæ, Джиголаты Каринæ, Зæгъойты Сослан, Зассеты Сергей, Куыдзеты Мария æмæ Плиты Къостайы хъуыдытæ мадæлон æвзаджы тыххæй. Сæргонд «Нæ чысыл нывгæнджытæ»-йы бын мыхуыр æрцыдысты 6-æм скъолайы ахуыргæнинæгтæ Къæбысты Андрей, Кокойты Аидæ, Колыты Аксойы номыл Аивæдты лицейы 6-æм къласы ахуырдзау Тедеты Динæйы конд нывтæ. Журналы ма ис базон-базоны дзæкъул дæр. Журналы аивдæр кæнынц 10-æм скъолайы ахуыргæнинаг Плиты Кристинæйы конд нывтæ.
Цыбырты Мадинæ равдыста йæ катайдзинад журналы фидæны хъысмæты тыххæй, уы-мæн æмæ абоны онг регистрацигонд нæма æрцыд. Фæлæ йæ ныфс ис, РХИ-йы Президент Тыбылты Леонид æм йе 'ххуысы къух кæй фæдаргъ кæндзæн, уымæй. Афтæ ма стыр бузныг зæгъы Хицауады Сæрдар Хъуылымбегты Доментийæн.
Адæмы зæрдæмæ тынг фæцыд сабиты журнал æмæ равдыстой сæ хъуыды, зæгъгæ, 20 азы дæргъы хæстон тæссаг уа-вæрты цæргæйæ, сывæллæттæ сæ сабибонты хорзæй ницы федтой, æрмæстдæр хъазыдысты хæстытæй, хъуыстой сармадзанты богъ-богъмæ. Абон уавæр хуыздæрырдæм фæивта æмæ, уадз, нæ сабитæн уа сæхи сæрмагонд журнал. Чи йæ критикæ кæны, уыдонæн та мæ зæгъын фæнды, кæд уыдон хуыздæр зонынц, кæнæ сæм хуыздæр фæндтæ ис, уæд æрбалæууæд сæйраг редакторы фарсмæ æмæ йын хæларзæрдæйæ баххуыс кæнæт. Цыбырты Мадинæйæн та бузныг зæгъын хъæуы йæ хорз хъæппæрисы тыххæй, кæцы бирæ бафыдæбон кодта журнал рауадзыны тыххæй æмæ æхцондзинад æрхаста сабитæн.
ДЖИОТЫ Е.