Nog adres

ИС ÆНТЫСТЫТÆ, ИС ПРОБЛЕМÆТÆ ДÆР

Фæстиуджытæ арæзт æрцыд, Цхинвалы районы администрацийы ахуырады хайад 2014 азы цы куыст бакодта, уымæн. Хыгъдон рæстæджы ахуырады хайад бакодта бæрæг куыст æмæ здæхт уыд ахуыры дарддæры гъæд фæхуыздæр кæнын æмæ ахуыргæнинæгты фидæны активон цардмæ бацæттæ кæнынмæ. Районы цы ахуырадон скъолатæ ис, уыдон æххæстæй ифтонг сты ахуыргæнджыты кадртæй, ис сæм ахуырдзинады æмбæлон ценз æмæ педагогон куысты фæлтæрддзинад. Уыцы хъуыддаджы сын ахадæн æххуыс кæны РХИ-йы куыстæй Ахуырады министрады ифтонг кæныны къамис. Ахуыргæнинæгтæ ифтонг сты ахуыргæнæн чингуытæ æмæ æндæр æнæмæнгхъæуæг æрмæджытæй, афтæ ма аивадон литературæйæ дæр. Афæдзы дæргъы ахуыргæнæн уагдæттæ æнкъардтой æххуыс районы æмæ республикæйы разамонæг органты æрдыгæй. Уымæ гæсгæ азæй азмæ хуыздæр кæнынц сæ куысты уавæртæ, фидардæр кæны скъолаты материалон-техникон базæ.
Ацы ахуыры аз цытджын æгъдауæй байгом сты Къостайыхъæу æмæ Бихъары астæуккаг скъолатæ. Зæгъын хъæуы уый, æмæ Къостайыхъæуы ног скъола абоны бонмæ у Цæгат Кавказы регионы хуыздæр скъолатæй сæ иу. Æппæт скъолаты дæр уагъд æрцыдысты Республикæйы боны цытæн мадзæлттæ, афтæ ма бацæттæ æмæ банысан кодтой Хетæгкаты Къостайы, Абайты Васо æмæ М. Лермонтовы юбилейтæ. Хыгъдон рæстæджы дæргъы алы методист æмæ инспектор систематикон æгъдауæй цыдысты скъолатæм, æххуыс сын кодтой ахуырадон æмæ хъомыладон куыст фæхуыздæр кæныны сæраппонд. Æхсызгон у зæрдæйæн, районы скъолаты ахуырдзаутæ активон хайад кæй райстой куыд районы, афтæ республикон фæлгæтты дæр цы алыгъуызон мадзæлттæ уагъд æрцыд, уым. Зæгъæм, Дменисы астæуккаг скъолайы ахуыргæнинаг Джиголаты Марат ахызт республиконт конкурс «Стъалыты ферттывд»-ы финалмæ, ацы скъолайы иннæ ахуырдзаутæ ма хайад райстой «Зарæг-хæлардзинады хид» æмæ националон кæфтытæ хуыздæр сæххæст кæныны конкурсты.

Ахуыр-хъомыладон куыст фæхуыздæр кæнын фылдæр баст вæййы скъола, бинонтæ æмæ æхсæнады зæрдиаг æмархайды руаджы. Районы ахуырады хайады минæвæрттæ, фæсивæды хъуыддæгты фæдыл комитет, прокуратурæйы кусджытæ æмæ æндæр бæрнон адæймæгтæ цыдысты скъолатæм æмæ алыгъуызон ахсджиаг темæты фæдыл ахуыргæнинæгтæн уагътой профилактикон беседæтæ, зынхъомылгæнæн сывæллæтты ныййарджытимæ уагътой беседæтæ. Ахуырады хайады Совет рабадтыты æркæсы æмæ æруынаффæ кæны ахсджиаг фарстытыл. Скъолаты педсоветты рабадтыты организацион фарстытимæ иумæ дзырдтой ахуыргæнджыты уроктæ раст радих кæнын , ахуыры цыппæрæм хайы фæстиуджытæ æмæ дарддæры хæстæ, хицæн предметы ахуыры уавæр, къласгæсты куыст æмæ æндæр фарстытыл.
Ахуыры азы фæстиуджытæй куыд зыны, афтæмæй скъолаты педколлективты куысты ис бæ-рæг æнтыстытæ, фæлæ уыимæ иумæ сæ куысты ис пробле-мæтæ дæр. 240 ахуыргæнинагæй сæ фылдæр ахуыр кæнынц рæстæмбис нысæнттыл, уый ахъуыдыйаг фарст у æмæ ахуыргæнджыты бахъæудзæн фылдæр кусын ахуырфæразондзинады гъæд фæхуыздæр кæныны сæраппонд. Ныфсæвæрæн ис, ахуыры билингвалон системæ кæй рараст кæндзæн уавæр. Иуæй-иу скъолаты къухдариуæггæнджытæм ис фагæй фылдæр уроктæ æмæ уый та хъыг дары ахуыр-хъомыладон куыстыл контроль кæнынæн. Арæх хъæрмады фарст рæстæгæй рæстæгмæ сæвзæры Къостайыхъæу, Бихъар æмæ Дампъалеты астæуккаг скъолаты. Бирæ скъолаты та хæринагаразæн æмæ хæрæндон сты иу хатæны. Нуазыны æмæ хардзы дон хæссын хъæуы суадонæй, хæлцадон продукттæ æфснайдæуы халсæрттимæ иу агъуысты. Ахуырады хайадæн уыдон, кæй зæгъын æй хъæуы, зындгонд сты æмæ сæ разамынд æмæ хайады коллектив аиуварс кæндзысты уыцы цухдзинæдтæ æмæ згъуыдтæ.
ХУЫБИАТЫ Н.