Nog adres

Ног æрсиддонтæ райстой æфсæддон ардбахæрд

Хуссар Ирыстоны Гарзджын тыхты фæззыгон æрсидты цытджын ардбахæрды церемони æрæджы уагъд æрцыд Æнусон арты раз Хъайтарты аллеяйы. Æвзонг æрсидтонтæн ацы нысаниуæгджын цауы фæдыл арфæ кæнынмæ æрбацыдысты хицауады уæнгтæ, сæ хиуæттæ.
Ардбахæрд уагъд æрцыд Цхинвалы æфсæддон гарнизоны афицертæ æмæ солдатты рæнхъæйлæуды 'хсæн, æмæ Хуссар Ирыстоны Паддзахадон гимны зæлтæм. Фыццаг хатт ардбахæрды текст æрсиддонтæ бакастысты мадæлон ирон æвзагыл, уымæй бæрæг хицæн кодта уымæйразмæ церемонитæй. Ардбахæргæйæ 31 æвзонг æрсиддоны дзырд радтой хъаруджын, цæсгомджын, дисциплинæ хъахъхъæнгæйæ æмæ намысджынæй кæй æххæст кæндзысты æфсæддон уставы домындзинæдтæ.
Æфсæддон ардбахæрд райсыны цытæн æвзонг солдаттæн арфæ ракодта РХИ-йы хъахъхъæнынады министр Валери Яхновец:
«Нырæй фæстæмæ сымах систут нæ Гарзджын тыхты æххæстбарджын минæвæрттæ. Мах бæрны ис Республикæ Хуссар Ирыстоны æдасдзинад хъахъхъæнын. Мæн ныфс ис Гарзджын тыхтæм уæ бацыдæй ноджыдæр кæй фæныфсджын æмæ хæстхъом уыдзысты».
saldat.jpg
Республикæйы къухдариуæгады номæй æрсиддонтæн арфæйы ныхæстæ загъта Хицауады Сæрдары хæдивæг Хъуылымбегты Доменти: «Хуыцау зæгъæд, æмæ уæ ацы къахдзæф кады æмæ цыты къахдзæф суа. Фыдыбæстæ хъахъхъæнджыты фæлтæрты 'хсæн бастдзинад ма хъуамæ нымæг кæна, уымæ гæсгæ уæ зæрдыл дарут уæ фыды фыдты, кæ-цытæ хъайтаронæй хъахъхъæдтой æмæ сæрибардзинад æрхастой Стыр Фыдыбæстæйон хæсты. Абоны номыл йæ сæр нывондæн чи ‘рхаста, уыдонæй алкæй дæр хъуыды кæнут.
2008 азы августы, Хуссар Ирыстон æмæ йæ алы цæрæджы хъысмæт скъуыддзаг куы цыд, уæд нæ лæппутæ уæрæсейаг æфсæддонтимæ слæууыдысты знаджы ныхмæ æмæ æрхастой сæрибардзинад æмæ хæдбардзинад. Уый сымахæн уыдзæн бафæзминаг дæнцæг».
Мадзалы кæронбæттæн гарнизоны æфсæддон дæлхæйттæ цытджын маршæй рацыдысты Æнусон арты раз.