Nog adres

Штабы радон рабадт / Куыстытæ кæронмæ фæхæццæ кæнынц

PB220088.JPG
29-æм ноябры ауагъд æрцыд 2014 азæн Хуссар Ирыстоны экономикон рæзтæн ахъазгæнæг Инвестицион программæйы реализацийыл контроль кæныны фæдыл штабы радон рабадт.
Хицауады Сæрдар æрæмбырдуæвджытæн сæ зæрдыл æрлæууын кодта, аз йæ кæрон-мæ кæй фæхæццæ кæны, уымæ гæсгæ 2014 азæн Инвестпрограммæ реализацийыл контроль кæныны фæдыл штабы ацы рабадт дæр кæй у, цы фæстаг рабадтытæ ма дзы хъуамæ уа, уыдонæй сæ иу. Куыд загъта, афтæмæй куыстытæ бахæццæ сты кæронбæттæн стадимæ æмæ уый та махæй алкæмæй дæр домы æппæт тыхтæ дæр Инвестпрограммæ æмгъуыдмæ сæххæст кæнынмæ аздахын. Инвестпрограммæйы нысан та у республикæйы цæрджыты культурон-цардуагон нысаниуæджы ахсджиаг объекттæ рæстæгыл эксплуатацимæ радтын.
Рабадты паддзахадон унитарон куыстуат «Водоканал»-ы директор Зассеты Сергей куыд фехъусын кодта, афтæмæй «Канализацион дæттæ биологон æгъдауæй сыгъдæггæнæн арæзтад»-ы объектты бæстон-гæнæн куыстытæ фæуыдзысты азы кæронмæ.
Рабадты дарддæр дзырд цыд горæты хæрзарæзтцæуæг уынгты эксплуатацимæ радтыны фæстæ сæм йæ хъус чи æмæ куыд дардзысты фæндагон нысæнттæ, светофортæ æвæрынимæ баст хæрдзтыл. Горæты администрацийы сæргълæууæг Æлборты Алан куыд банысан кодта, афтæмæй ацы фарст кæронмæ скъуыддзаг нæма у, æмæ йыл куыст цæуы. Уый ма куыд банысан кодта, афтæмæй Юстицийы министрад æмæ паддзахадон исад æмæ зæххы фæдыл ахастыты комитет горæты администрацийы балансмæ радтой «Хурзæрин»-ы микрорайоны æртæ бирæфатерон цæрæн хæдзары.
Хицауады Сæрдар куыд банысан кодта, афтæмæй ацы хæдзæрттæ ныр горæты администрацийы дæлбар кæй сты, уымæ гæсгæ администраци æппæт дæр хъуамæ араза, цæмæй мацы къуылымпытæ уа æппæт коммуникациты куысты æмæ æмбæлон уавæртæ арæзт цæуа сæ цæрджытæн. Уымæй дарддæр ма скъуыддзаг цæуой цæрæнуатон фондæй пайда кæныны фарстатæ.

Штабы рабадты Хъуылымбегты Доменти Цхинвалы æмæ районы администрациты сæргълæуджытæн бахæс кодта, цæмæй æнæхицау бæстыхæйтты сбæрæг кæныны фæдыл райсой мадзæлттæ.
«Ахæм объектты номхыгъд хъæуы æрбавдисын 3 декабрмæ. Уымæй дарддæр ма уыцы объектты адих кæнын хъæуы ахæмтыл, кæцытæн ма эксплуатацигæнæн ис æмæ ахæмтыл, ногæй аразæн æмæ æндидзынгæнæн кæмæн ис», - банысан кодта Хицауады Сæрдар.
Премьер-министр сæрмагонд хъусдард аздæхта эксплуатацимæ лæвæрдцæуæг объектты бавдисыны фарстмæ. Уый банысан кодта Арæзтады министрад æмæ генподрядон организацийы лæмæгъ æмархайд РХИ-йы Экологион, технологион æмæ арæзтадон хъусдарды комитетмæ документтæ бавдисыны фæдыл. Æмæ уый та фылдæр хатт свæййы арæзтадон куыстытæн финанс кæныны процесс фæстиат кæныны аххосаг.
Экологион, технологион æмæ арæзтады хъусдарды комитеты сæрдар Тъехты Суликъо куыд банысан кодта, афтæмæй Инвестпрограммæйы фæлгæтты эксплуатацимæ лæвæрдцæуæг объектты фæдыл документтæ исыны куыст цæуы æмæ фæуыдзæнис азы кæронмæ. Уый ма куыд загъта, афтæмæй катайдзинад æвзæрын кæны Ереды хъæуы Арæзтадон æрмæджыты заводы арæзтадон куыстытæ иууыл æххæст кæй не 'рцыдысты проектон-сметæйон документацимæ гæсгæ, бæлвырддæрæй та йæ эстакадæ. Хицауады Сæрдар бахæс кодта, цæмæй ацы цухдзинад иуварс æрцæуа æмæ дзы æнамонд цаутæн бынат ма уа.
Дзауы районы рынчындоны арæзтады фæдыл дзургæйæ, Хицауады сæрдар йæ аразæг подрядон организацийæн бахæс кодта, цæмæй кусджыты нымæц фæфылдæр кæной æмæ куыстытæ рæвдздæр ацæуой.
Уый ма куыд банысан кодта, афтæмæй кæронмæ скъуыддзаг кæнын хъæуы районты фельдшерон-акушерон пунктты алыварс территориты схæрзарæзт кæныны фæдыл фарст дæр.
«Цыбыр æмгъуыдты сæм бауадзын хъæуы электроэнерги æмæ дон, афтæ ма сæ алыварс территориты схæрзарæзт кæныны фæдыл куыстыты хъæуы фæуын, цæмæй сын нормалон куыст кæнынæн уа æмбæлон уавæртæ», - загъта Хъуылымбегты Доменти.
Рабадты ма дзырд цыд арæнгæрон зонæйы хæдзæрттæ аразыны æмæ сæ арæзтады фæдыл.

* * *
РХИ-йы Хицауады Сæрдар Хъуылымбегты Доменти ма ауагъта кусæгон æмбырд, кæцыйы хайад райстой хицауады сæрдары хæдивæг Тъехты Алан, хъæууон хæдзарады министр Гуыцмæзты Маирбег, районон администрациты сæргълæуджытæ, фиддонон структурæты, мидхъуыддæгты министрады, æрдзхъахъхъæнынады ведомствоты минæвæрттæ.
Куыд пайда цæуы республикæйы зæххытæй, уыцы нымæцы хъæууон хæдзарады? Горæты территорийыл арæзтадтæ аразгæйæ, куыд хъахъхъæд цæуынц горæтарæзтады нормæтæ, æрдзы хъæздыгдзинæдтæй пайда кæныны, арендæйы æмæ зæххы фадгуытæ дæттыны нормæтæ? Уыцы æмæ бирæ æндæр фарстатæ хаст æрцыдысты боны фæткмæ. Æмбырды куыд нысан цыд, афтæмæй уыдон хъæуы æвæстиатæй скъуыддзаг кæнын.
Хицауады Сæрдар бæлвырд хæслæвæрдтæ радта æмбæлон структурæтæн, цæмæй иумæ бакусой арендæйы механизмтæ æмæ республикæйы зæххы фадгуытæй æмæ æрдзон хъæздыгдзинæдтæй эксплуатаци кæныны фарстатæ æрбæстон кæныныл.
«Дарддæр афтæ кусæн нал ис, кæй куыд фæнды, афтæ пайда кæны зæххæй, уæвæг паддзахадон закъæттæ ницæмæ даргæйæ. Уый та, фыццаджыдæр, зиан кæны нæ экологийæн, æмбæстæгтæн сæхицæн. Паддзахадон бюджетмæ нæ цæуынц милуангай сомтæ… Æз амалиуæгады ныхмæ нæ дæн, уадз, адæм сæхицæн кусой, фæлæ алцыдæр аразын хъæуы закъонмæ гæсгæ, процессыл хъæуы контроль кæнын», - банысан кодта хицауады сæргълæууæг.
БЕСТАУТЫ Валя