Nog adres

Нæ зæххыл кæддæриддæр æлдариуæг кæнæд сабырад æмæ æнцойад

lenia_1.jpg
Президенты сидт Республикæ Хуссар Ирыстоны адæммæ

Зынаргъ æмбæстæгтæ!
Абон Хуссар Ирыстоны адæм нысан кæнынц историон бон. 25 азы размæ 1989 азы 23 ноябры æнæхотых ирон лæппуты чы-сыл къорд Цхинвалмæ æрбацæуæны æрурæдта, Хуссар Ирыстоны сæйраг горæтмæ æрбабырсынмæ хъавæг гуырдзиаг фашистты бирæминон марш.
Цхинвалмæ æрбацæуæн снывæстой æмæ сорганизаци кодтой Гуырдзыстоны националистон тыхтæ, куыд стырмасштабон акци, афтæ. Сæ нысан уыд, æрмæст сæ тых равдисын нæ, фæлæ ирæтты бафхæрын, сæ мадæлон æвзаджы æмæ фыдæлты зæххы сæраппонд сæ бартыл кæй сдзырдтой, уый тыххæй. Уыцы рæстæджы Гуырдзыстон, формалонæй, Советон Цæдисы сконды уæвгæйæ, уыд национал-экстремистты дæлбар, кæцытæ сæ фæндæттæ æххæст кæнын кодтой Гуырдзыстоны республикон къухдариуæгадæн.
ССР Цæдисы скондæй рахизын сфæнд кæнгæйæ, тбилисаг сепаратисттæ автономитæм кастысты, куыд сæ фæндтæ æххæст кæныны сæйраг ныхдуртæм, афтæ. Националистон истери æмæ æнæгуырдзиаг цæрджытæм æнæуынондзинад цырен кæнгæйæ, æнæхъæн Гуырдзыстоны расидтысты антиирон кампани, ныфс æвæрдтой, æфсæйнаг цъылынæй ирæтты Кавказы хæхты фалæмæ асæрфын. Цхинвалмæ стæры рацæуынæй дыууæ къуырийы размæ гуырдзиаг радикалтæ Ленингоры районы ауагътой тæрсынгæнæн акци - ныддæрæн æй кодтой, уый хъуамæ суыдаид ирæтты сæйраг горæты сæ архайдтыты репетици.

Сæ уæлиондзинадыл æууæндгæйæ, æмæ алы ран дæр æфсæрмдзæстыгдзинад æмæ æнæдзырдæй коммæгæсдзинадыл æмбæлгæйæ, гуырдзиаг националисттæ æнхъæл нæ уыдысты, кæй фæзындзæн, сæ фæндаг сын чи æрæхгæна, ахæм тыхтæ. Уыдоны нæ уырныдта, сæ фæндаг сын ирæтты чысыл къорд кæй æрæхгæндзæн æмæ æнхъæлдтой, æхсарджын ирон лæп-путы фæстæ кæй лæууынц гæрзифтонг æмæ æппæт архайдтытæм дæр цæттæ чи сты, ахæм цæдисон хæстонтæ. Иу суткæйæ фылдæр ныхмæлæууынады фæстæ æнæхуынд уазджытæ аздæхтысты фæстæмæ.
Уыцы цауты фæстæ областы хъæуты райдыдтой гуырдзиаг фашистты сырдон митæ æмæ блокадæ. Разæй уыдысты уæззау тохты æмæ хъизæмæртты бирæ азтæ, фæлæ 1989 азы 23 ноябры Цхинвалмæ æрбацæуæны ныхмæлæуды рæстæджы нæ къу-хы бафтыд фыццаг æмæ нысаниуæгджын уæлахиз, кæцы сæрибардзинады сæрыл тохы Хуссар Ирыстоны адæмæн радта хи-сæрмагонд тыхтыл æууæндындзинад æмæ йын уыд стыр символикон нысаниуæг.
23 ноябры бон Хуссар Ирыстоны историмæ бацыд, куыд Фыдыбæстæйы хъахъхъæнджыты равдисгæ стыр æхсардзинады бон, сæ сæрибардзинад æмæ фыдæлты зæхх бахъахъхъæныны сæрыл растæг æппæт адæмы иудзинады бон. Уыцы бон ма-хæн ссис национ сæрыстырдзинады æмæ хуссарирыстойнаг адæмы хъæддыхдзинады бон.
Провокацион мадзаларазджыты æнхъæлмæкæсынадмæ æнæ кæсгæйæ, тæрсынгæнæн акци бæрзонд систа ирæтты национ химбарынад æмæ ссис Хуссар Ирыстоны цæрджыты политикон активондзинады катализатор, адæм æрбангом сты, Райгуырæн бæстæйы сæрмæ æрæмбырдуæвæг мæлæтдзаг тæссагдзинады ныхмæ; сæрибардзинадыл тохы арæзт республикæ бафæрæзта æппæт фæлварæнтæн дæр æмæ йæ къухы бафтыд хæдбардзинад.
Алы аз дæр 23 ноябры мах æрæмысæм, Хуссар Ирыстоны сæрибардзинады æмæ нæ адæмы рухс фидæны тыххæй сæ цард нывондæн чи æрхастой, нæ уыцы хъæбатырты рухс нæмттæ. Мах цыт кæнæм Фыдыбæстæ хъахъхъæнджытæн, кæцытæ агрессоры ныхмæ æнæмсæр тохы равдыстой стыр хъæбатырдзинад æмæ, æмбал кæмæн нæй, ахæм æхсар. Фыццаджы фыццаг, мах бузныг стæм, уæззау фыдæвзарæн азты æмæ фæсхæст æндидзынады рæстæджы нæ фарсмæ чи æрбалæууыд, уыцы Стыр Уæрæсейæ.
23 ноябрь Хуссар Ирыстоны нысан цæуы куыд Æхсардзинады æмæ адæмон иудзинады бон, афтæ. Нæ адæм хъуамæ бахъуыды кæной ахæм æмбарынад: æрмæстдæр æрбангом уæвгæйæ, иумиагадæмон нысаны сæрвæлтау, нæ тыхтæ баиу кæнгæйæ, нæ бон уыдзæн нæ интерестæ хъахъхъæнын æмæ нæ хæрзиуæгон фæндтæ æмæ нывæстытæ æххæст кæнын.
Уæдæ, уадз, æнæфехæлгæ уæд нæ адæмы иудзинад!
Уадз, нæ зæххыл кæддæриддæр æлдариуæг кæнæд сабырдзинад æмæ æнцойад!
Уадз, нæ адæмы царды уæд æмразыдзинад æмæ фæрныгад!
Уастырджийы хорзæх уæ уæд, мæ зынаргъ æмбæстæгтæ!
Республикæ Хуссар Ирыстоны
Президент ТЫБЫЛТЫ Леонид