Nog adres

Дохтыры амындтытæ

ФÆЗЗÆГ ÆМÆ ÆНÆНИЗДЗИНАД
Фæззæг, уæлдайдæр ноябрь, йемæ æрхæссы æнкъарддзинад, лæмæгъдзинад, депресси. Сæрд йемæ ахæссы хъæлдзæгдзинад æмæ уæнгрогдзинад, организм нын нæ зæрдыл æрлæууын кæны зæронд рыстытæ.
Фæззæг у æнахуыр æрдзон тайм-аут, цæмæй нæхи бацæттæ кæнæм карз зымæгон уазæлттæм, æркæсæм нæхимæ æмæ сфидар кæнæм нæ организмы зымæджы æрбалæудмæ. Зæрдыл дарын хъæуы, фылдæр хатт æнæниздзинад бахъахъхъæнынæн бирæ кæй ницы хъæуы: æмбæлон хæрд, змæлын æмæ хорз зæрдæйы уаг! Æмæ фæззæг та - уыцыиу рæстæджы тыллæджы сезон æмæ витаминты бæркад, ивддзинæдты æмæ ирдхуыз ахорæнты рæстæг æмæ æхсызгон сæрдыгон бонты мысинæгтæ.
Фæззæг куыддæр æрбалæууы, афтæ низтæй фыццаг йæ сæр сдары уазалдзыд. Организм зынтæй хæссы дымгæ, къæвда, уæлдæфы температурæйы æрхауд, фæзынынц низты фыццаг симптомтæ: ихæн кæнын, æхснырсæг, сæры, хъуыры рыст, хуыфын.

Фæззæджы къаддæр вæййы адæймаджы активондзинад - организм æвзары стресс æмæ буар хъарм кæнынæн хардз кæны фылдæр калоритæ. Медиктæ фидарæй зæгъынц, зæгъгæ, низты ныхмæ тохы ахъаз у иммунон системæ.
Зымæгон уазæлттæм хи бацæттæ кæнын хъæуы фæззæджы. Ацы рæстæджы актуалон у буар сфæлтæрын, афтæ ма иммунитет фæбæрзонддæр кæнын дæр.
Мæнæ уын хуымæтæг æмæ эффективон амындтытæ æнæниздзинад бахъахъхъæнынæн.
1. Скæнут уæ уæлæ хъарм дарæс. Афон у, бауырнын кæнат уæхицæн, сæрдыгон бонтæ кæй фесты, уый. Уазалдзыд у фыццаг къахдзæф алыгъуызон низтæм.
2. Уæхи хизут æхсæнадон бынæттæй. Уазалдзыд æмæ гриппæй цæмæй бахъахъхъæнат уæхи, уый тыххæй бирæ адæм кæм æмбырд кæны, уырдæм нæ хъæуы арæх цæуын. Къаддæр пайда кæнут æхсæнадон транспортæй, хуыздæр у фистæгæй цæуын.
3. Хæдзар æмæ кусæн бынаты арæх сыгъдæг кæнут уæлдæф.
4. Афоныл скæнут вирусты ныхмæ препараттæй профилактикæ. Уый у иууыл эффективондæр мадзал низтæй хи бахизынæн.
5. Ма радтут бар, цæмæй уыл сагъæс æмæ стресс фæтых уой. Хорз зæрдæйы уаг у иууыл хуыздæр иммуностимулятор.

ФÆЗЗЫГОН ДЕПРЕССИ
Дохтыртæ-психотерапевтты хъуыдымæ гæсгæ, фæззыгон депресси æрмæст æвзæр зæрдæйы уаг нæ, фæлæ низау дæр у.
Ахуыргæндты бæлвырдгæнæнтæм гæсгæ нæ планетæйы алы фæндзæм цæрæгмæ дæр бахъары фæззыгон депресси. Бон кæй фæцыбырдæр вæййы, арæх кæй уары къæвдатæ, уымæ гæсгæ мах фæцух вæййæм рухсæй, нæ уарзон хуры тынтæй, йæ хъармдзинадæй. Фæззæг къаддæр кæны серотонины æмвæзад. Цы пайда у серотонин адæймагæн? Серотонин хонынц «æхцондзинады гормон», уый лæмæгь кæны тыхстдзинады уавæр, хуыздæр кæны зæрдæйы уаг, ахъаз кæны фынæй æмæ аппетитæн.
Фæззыгон боныхъæд бирæ хатт фадат нæ дæтты æрдзы хъæбысы тезгъо кæнынæн, фылдæр рæстæг куы æрвитай хæдзары, телевизоры фарсмæ, уæд афтæмæй сæры магъз фæллайы..
Арæх афтæ вæййы - «сахуыр вæййынц фæззыгон депрессийыл». Адæймаг-иу фæззыгон рæстæг æвзæр хатыд йæхи. Æмæ фæстагмæ йæхицæн бауырнын кодта: «Сæрд фæцис, ралæууыдис æвзæр фæззыгон рæстæг, къæвдатæ, цъыф, нал сæ фæразын!». Уæдæ афтæ: зæрдæйы уаг аразын уæхицæй кæнгæ у.
Америкæйæгтæ фæтых вæййынц фæззæджы депрессийыл психотерапевтты æххуысæй. Баххуыс сын кæнынц квалификациджын специалисттæ æмæ адæймаг ацæуы хъæлдзæгæй, ног къахдзæфтæ кæнгæйæ, «америкæйаг бæллицмæ».
Уæдæ, куыд у махмæ та? Фæззæджы цæрджыты фылдæр хай фæкæнынц хъаст: «Ныр та - фæззæг, йе 'взæр къæвдатимæ», фæззыгон депрессийæ, арæх фынæй кæнынæй, фæлладдзинадæй, æвзæр зæрдæйы уагæй. Хорз, рахъаст кодтат. Дарддæр цы? Кæрæдзийы зæрдыл æрлæууын кодтат уæ зæрдæты æвзæр уаг æмæ уæ алчи йæхи фæндагыл ацыд, фæдывæр кодтат фæззыгон депресси.
Пайдайы амындтытæ, куыд фервæзат фæззыгон депрессийæ
Депрессийæ фервæзын кæндзæн, зæрдæйы уаг дын цы фæхуыздæр кæна, уый. Цурк цуркæй æппарын хъæуы.
* Хæдзары уæвгæйæ, алы ран дæр ссудзут рухсытæ, архайут, цæмæй уæ алыварс уа хъулон-мулон дзаумæттæ, скæнут тар нæ, фæлæ ирддæргъуыз дзаумæттæ.
* Хæрут апельсинтæ, серотонин бирæ кæм ис, ахæм продукттæ, зæгъæм, шоколад, банантæ, инжир, финиктæ. Архайут, цæмæй уæ хæринæгтæ æгæр сой æмæ калориджын ма уой. Фылдæр хæрут халсартæ, дыргътæ, гагадыргътæ.
* Цымут алыгъуызон кæрдæджытæй арæзт натуралон цайтæ.
* Хæдзары кæд ничи ис, иунæгæй стут, уæд уæхи стухут хъарм, райсут хорз чиныг, бакæсут æй. Райсут альбомтæ, уæ зæрдæйæн æхсызгон къамтæ кæм ис, ахæмтæ.
* Бакæсут хорз кинонывтæм.
* Фæззæджы дæр бирæтæ зымæгмæ кæнынц æвæрæнтæ. Уымæй дæр, æрмæст халсартæ æмæ дыргьтæ нæ, фæлæ ма алыгъуызон кæрдæджытæ, гагадырдгътæ, цæмæй зымæджы дæргьы цымат алыгъуызон цайтæ æмæ дæттæ.
Бафæзмут сæ сымах дæр.
* Архайут, цæмæй фынæй кæнат афоныл, баулæфын кæнут уæ сæры магъз æнкъард хъуыдытæй.
* Депрессийæ цæмæй рахизат, уый тыххæй хъæуы змæлын, архайын. Уæ хъус æрдарут спортмæ. Алы бон дæр цæут сыгьдæг уæлдæфмæ.
Сæйраджыдæр, БАУАРЗУТ УÆХИ! Бауарзут, уæ алыварс чи ис, уыдоны. Архайут ууыл, цæмæй уæм уа фылдæр хорз, ныфсы хъуыдытæ.