Nog adres

Схорзæхджын кодтой æфсæддон развæдсгарджыты

img_2961.jpg
Æфсæддон развæдсгарджыты боны цытæн Цхинвалы уагъд æрцыд Хуссар Ирыстоны Хъахъæнынады министрады Хицæн развæдсгарæг батальоны хæстонты схорзæхджын кæныны цытджын церемони. Уæлдай тынгдæр чи басгуыхт, уыцы развæдсгарджытæн ведомствойы хорзæхтæ радта Хъахъхъæнынады министры хæстæ æххæстгæнæг инæлар-лейтенант Гассеты Ибрагим.
«Æфсæддон развæдсгарынады кусджытæ бацахстой стыр бынат нæ Республикæйы рæзыны хъуыддаджы, æмæ абон развæдсгарджыты батальоны бындурæвæрджыты традициты хъахъхъæнгæйæ, сымах дарддæр лæггад кæнут Хуссар Ирыстоны хæрзиуæгæн», - загъта уый.
Хуссар Ирыстоны Хъахъæнынады министры Бардзырд-мæ гæсгæ Æфсæддон развæдсгарæджы боны цытæн дыууæ развæдсгарæгæн лæвæрд æрцыдысты «лейтенант» æмæ «прапорщикы» нæмттæ.
Хæстон цæттæдзинады се стыр æнтыстытæ æмæ иттæг хорз хæстон уагахасты тыххæй æмæ Æфсæддон развæдсгарæджы боны цытæн развæдсгарджыты батальоны дыууæ æфсæддонæн та лæвæрд æрцыдис Хъахъæнынады министрады майдантæ «За боевые заслуги». Дæлхайы цалдæр æфсæддонæн дæр лæвæрд æрцыд Хъахъæнынады министрады Кады грамотæтæ æмæ æхцайы премитæ.

Хуссар Ирыстоны штатон развæдсгарæн дæлхæйттæ арæзт æрцыдысты 1990 азты райдианы Республикæйы ныхмæ гуырдзыйы агрессийы тæккæ тæмæны. Æфсæддон развæдсгарынады сырæзыны хъуыддаджы ахсджиаг хайбавæрд уыдис Хуссар Ирыстоны сæрхъызой, номдзыд æфсæддон-политикон архайæг Джиоты Алан (Парпат)-æн.