Nog adres

ЗÆРДÆЙЫ ХЪАРМ - ÆХХУЫСХЪУАГ ЗÆРÆДТÆН

DSCN7566.jpg
Цард диссаг у, алчидæр дзы рацæуы алыгъуызон фæндæгтыл. Æппындæр æй ничи фæзоны, стыр Хуыцау ын цавæр хъысмæт сныв кæндзæн, уый. Фæлæ цахæмфæнды царды фæндæгтыл ма рацу, уæддæр дзы адæймагæн йе 'взонджы бонтæй хуыздæр æмæ рæсугъддæр ницы вæййы. Уæд алчидæр вæййы ныфсджын æмæ тыхджын, афтæ ма фæнывæнды фи-дæны царды алыгъуызон рæсугъд фæндтæ. Адæймагыл цард йæ уæз куы æруадзы, азтæ йыл куы ацæуынц, уæд йе 'нæниздзинад дæр бирæбæрцæй фæцуды. Уæдæ ирон æмбисонд куыд зæгъы, уымæ гæсгæ зæронд æвæгæсæг, сидзæрæй-мæгуырдæр. Царды разыны ахæм адæймæгтæ, ацы æмбисонды мидис сæ хъысмæ-тыл дзурæг кæмæн свæййы. Уыдон та вæййынц ахæмтæ, æмæ дзы кæмæн бынтон æввахс хиуæттæ æмæ зæнæг нæ радты Хуыцау, чи та рохуаты баззайы йæ хиуæттæй æмæ йæ зæнæгæй дæр. Хъыгагæн, ирон адæмы 'хсæн дæр разыны ахæм дурзæрдæ адæймæгтæ æмæ се 'ввахс адæймæгты хъизæмайраг цардмæ уæлæнгай цæстæй фæкæсынц.
Ахæм адæймæгтæ та, ома, сæ бинонтæй рæвдыд хъуагæй чи баззайынц, уыдон сæ бынат ссарынц нæ горæты цы æвæгæсæг адæймæгты пансионат «Аудындзинад» ис, уым. Кæд адæймагæн хи бинонты ад ничи кæны, уæддæр ацы пансионаты чи цæры, уыдон æнкъарынц фаг рæвдыд, чи сæм кæсы, уыдоны 'рдыгæй æмæ сæ чысыл сæ маст айрох вæййы. Сæ ном ма сын ссарынц, куыд нæ республикæйы къухдариуæгад, афтæ хицæн адæй-мæгтæ дæр. Уый та сын вæййы уæлдай æхсызгондæр.

30-æм октябры та сæм фæуазæг сты нæ горæты 5-æм астæуккаг скъолайы 9 æмæ 10-æм кълæсты ахуыргæнинæгтæ, афтæ ма ацы скъолайы ногдзауты организацийы уæнгтæ дæр.
Пансионат «Аудындзи-над»-ы цæрджытæн ацы скъолайы ахуыргæнинæтæ бацæттæ кодтой чысыл концерт, бакастысты сын æмдзæвгæтæ, æрбахастой сын аддджинæгтæ дæр.
Куыд ма загътам, уымæ гæсгæ чысыл уæлдай хъусдард дæр сын вæййы тынг æхсызгон, ацы уæззау царды дæрзæг арм чи банкъардтой, уыцы ацæргæ адæймæгтæн. Ныр дæр та стыр æхцон-дзинад райстой, ацы скъолайы ахуыргæнинæгтæ сын цы музыкалон номыртæ балæвар кодтой, уыдонæй. Æгæрыстæмæй, концертмæ кæсгæйæ-иу сæ хъуыдытæ дæр хъæрæй загътой, зæгъгæ, куыд хорз у æвзонгад, иууылдæр куыд рæсугъд æмæ арæхстджын сты. Уымæ гæсгæ сæ цины æнкъа-рæнтæ æвдыстой æмдзæгъдæй æмæ рæвдаугæ цæстæнгасæй. Мадзалы хайадисджытæ дзы иуæй-иуты кафынмæ дæр рахуыдтой.
Фæлæ ацы пансионаты чи цæрынц, уыдоны 'хсæн ис уатон рынчынтæ дæр, кæцытæн сæ бон концертмæ кæсын нæ бацис.
Мадзалы кæрон бузныджы ныхæстæ загъта 5-æм скъолайы ахуыр-гæнинæгтæ æмæ ахуыргæнджытæн пансионат «Аудындзинад»-ы директор Теблойты Чермен:
- Стыр бузныг уын ноджыдæр нæ коллективы æмæ нæм чи цæрынц, уыдоны номæй дæр, кæй нæм æрбацыдыстут, уый тыххæй.
Сымах стут нæ фидæн æмæ уæ курæг дæн, цæмæй сымах уарзат цард, аргъ кæнат хистæр фæлтæрæн. Сæ зонындзинæдтæм сын хъусут, тыхст адæмæн та æххуыс кæнын куы зонат, уæд Ирыстоны ахæм пансионат æппындæр ницæмæн хъæудзæн.
Ацы хæрзаудæн мадзал сæрмагондæй уагъд æрцыдис 5-æм скъолайы уырыссаг æвзаг æмæ литературæйы ахуыргæнæг Уалыты Розæйы хъæппæрисæй. Уый нын куыд загъта, уымæ гæсгæ сæ мадзал ауадзын фæндыдис 1-æм октябры, уымæн æмæ уыцы бон нысан цæуы ацæргæ адæймæгты бонæй, фæлæ сын бæрæг аххосæгтæм гæсгæ нæ рауад. Фæлæ ахæм адæймæгты фарс æрбалæууын, зæрдæйæн хъарм ныхæстæ сын зæгъын никуы байрæджы вæййы.
- Æз ахуыргæнинæгтæн ацы хъуыды куы загътон, уæд сæхæдæг дæр æнæрхъæцæй æнхъæлмæ кастысты ацы бонмæ, кæд бæрæг кæндзыстæм пансионаты цæрджыты, зæгъгæ. Уымæ гæсгæ мах бафæнддзæнис, цæмæй не скъолайæн ахæм хæрзаудæн мадзæлттæ суой традицион, - загъта ма йæ раныхасы Уалыты Розæ.
Пансионаты цæрджытæн ма хъарм ныхæстæ загъта ацы скъолайы ахуыргæнæг Тедеты Ноннæ.
Уæдæ мах, ирон адæм, кæддæриддæр уыдыстæм кæрæдзийыл æнгом баст æмæ ахæм æххуыс-хъуаг адæймæгты фарсмæ балæууын кæй хъæуы, уый та алчидæр йæ хæсыл хъуамæ нымайа.

ТУАТЫ Ларисæ