Nog adres

БÆРНДЗИНАДЫ ÆНКЪАРÆНТИМÆ

990.jpg
Куыст, стæй кæцыфæнды хъуыддагмæ дæр адæймаг, уæлдайдæр та, райдианæй хорз ахаст куы дара, уымæн та йын алы хатт дæр вæййы гæнæнтæ, уæд фæстæдæр æнтыстæн æнæрауайгæ нæ вæййы. Æмæ æнтыстытæ æрмæст куысты нæ сырæ-зынц, фæлæ ма хисæрмагонд хъуыддæгтæ æмæ царды дæр. Ахæм адæймæгтæй иу у не 'мбæстаг Къæбысты Олег.
Нæуæдзæм азты райдайæны адæм куы бамбæрстой, пырх кæны Советон Цæдис, йæ республикæты адæм, иутæ фæйнæрдæм худинаджы æмæ æгады лыгъд кæнынц, гадзрахатæй цæуын райдыдтой сæ хъомысджын паддзахадыл, уæд ирон адæм, кæд æххæстæй нæма æмбæрстой дарддæр аразын куыд æмæ цы хъæуы, уæддæр арæзтой паддзахад, бонæй бонмæ рæзтысты йе структурæтæ. Уæд Хуссар Ирыстоны таможнæ саразыныл хъазуатонæй чи архайдта, æвзонг ирон лæппуты хонын чи райдыдта, уыдон уыдысты Козаты Андрей, Джиоты Уырызмæг æмæ æндæртæ. Уыцы азты, рахъуыды-бахъуыдыйы фæстæ, уырдæм кусынмæ бацыдис не 'мзæххон, æвзонг лæппу Къæбысты Олег. Райдайæны йæм афтæ фæкаст, цыма бацыдис хъуыддаг æй кæм нæ уыд, уырдæм. Куыстмæ цыд, кæд зивæгæй, уæддæр ног куыстуаты фæткойтæ иунæг хатт дæр нæ хæлдта.

Æмбæлтты фæрцы, стæй бонæй бонмæ куыстыты гуырахст кæй рæзт, йæхи бынат дзы кæй ссардта, уый фæрцы аивта йæ раздæры фæндтæ. Фæзынд ын ног, йæхихуызæн æвзонг æмкусджытæ æмæ йæ куыст уæд йæхимæ æлхъывта тынгдæр.
Уæдæй кæд рацыд 20 азæй фылдæр, уæддæр Олег арæх æрæмысы уæды æмбæрстгонд хъуыддæгтæ æмæ зындзинæдтæ, уæддæр у райгонд æмæ сæрыстыр, таможнæйы кусгæйæ кæй баззад, уый тыххæй. Олег абон у, таможнæйы хæстæ чи æххæст кæны, уыцы къордтæй иуы хистæр. Фæбæрæг кæнынц æмæ фесгарынц, нæ республикæмæ цы уæзтæ ласт цæуынц, уыдон. Уыдон та уыйбæрц бирæ сты, æмæ цæмæй чи не 'мбæлы, ахæм уæзтæ горæтмæ ма æрбафтой, уый тыххæй сæ арæх бахъæуы уæлæмхас сахаттæ бакусын дæр. Сæ архайдтытæй сын къаддæр зындзинæдтæ нæ фæаразынц то-варласджытæ дæр, фæлæ Олегæн йæ къордимæ бантыст сæ æрсабыр кæнын, хъуыддаг быцæутæ æмæ хъаугъаты онг никуы æруадзынц. Уавæр кæд раздæры азтæм абаргæйæ нал у афтæ мæгуырау, уæддæр абон дæр фæзыны, йæ рæдыдтытыл чи нæ фæсæтты, ахæмтæ. Фæткхалджытæй та хатыр никæмæн вæййы. Æнæзакъонон товартæ æрцæуынц ист æмæ ма бафидынц ивар дæр.
Олег райгуырд æмæ схъомыл Цхинвалы. Скъола дæр каст фæцис ам. Сæ бинонтæ æндæр бинонтæй ницæмæй хицæн кодтой, цардысты Советон дуджы хуымæтæг бинонты цардæй æмæ уымæй уыдысты райгонд æмæ сæрыстыр. Гуырдзиаг фыдгæнджытæ Ирыстонмæ лæбурын куы райдыдтой, уæддæр Олег йæ бинонты иу бон дæр иунæгæй нæ ныууагъта, уыд сæ фарсмæ æмæ куыд йæ бон уыд, афтæ цавта знаджы чъизи ных.
Олег Советон Æфсады рæнхъыты йæ хæс фыста Прибалтикæйы. Йæ адæммæ йын Олег у тынг мæсты, уымæн æмæ йæ уарзон Советон Цæдис пырх кæнын райдыдта уырдыгæй. Советон Æфсады рæнхъытæй æрыздæхыны фæстæ Олег ахуыр кæнынмæ бацыд Хуссар Ирыстоны паддзахадон педагогон институтмæ. Ам дæр Олег равдыста хорз удыхъæд. Цæттæйæ цыд фæлварæнтæм. Йе 'мкурсонты 'хсæн парахат кодта хæлардзинад æмæ сын Олег уыд уарзон адæймаг. Олегы хорз удыхъæды миниуджытыл дзурæг ма у уый дæр, æмæ куыстмæ куы бацыд, уæд цы тырнындзинæдтæ æмæ фæндтæ уыдис, уыдон абон къаддæр нæ, фæлæ фесты фылдæр. Уыимæ ма йæм сытынг сты, куыст цы принципиалон æмæ рæстдзинады домæнтæ домы, уыдон дæр. Уырнинаг у, сæ сæххæст кæныныл нырæй фæстæмæ дæр кæй архайдзæнис нырмæйау æнæ-зивæг æмæ стыр бæрндзинады æнкъарæнтимæ.
Абон Уæрæсейы таможнæйы кусджытæ нысан кæнынц сæ профессионалон бæрæгбон. Олег сын сæйраджыдæр зæгъы, цæмæй уой æнæниз, сæ куысты сын уа стыр æнтыстытæ. Æмæ сын Ирыстоны таможнæимæ цы бирæ иудзинæдтæ æмæ кæрæ-дзиæмбарынад ис, уыдон дарддæр дæр кæной фылдæр æмæ хуыздæр.
ГÆЗЗАТЫ Иван