Nog adres

Медицинон лæггæдтæ фæхуыздæр кæныны нысанæн

981.jpg
Нæ республикæйы дарддæр цæ-уынц медицинон уагдæтты планон басгæрстытæ. Æрæджы хицауады бæрнон кусджытæ бабæрæг кодтой республикон рынчындоны куыст æмæ уавæртæ, сæ архайд æмæ æнтыстытæ. Уый тыххæй нæ газеты уыд информаци.
Ивгъуыд цыппæрæмы та Цхинвалы сывæллæтты поликлиникæмæ басгæрсты нысанæн æрбацыд Хуссар Ирыстоны президенты социалон фарстыты фæдыл æххуысгæнæг Сиукъаты Родион æмæ æндæр бæрнон адæймæгтæ. Родион уацхæсджытæн куыд радзырдта, аф-тæмæй Цхинвалы сывæллæтты поликлиникæйы сæйраджыдæр бабæрæг кæндзысты хъæуæг документтæ куыд æмæ цахæм бæрцæй арæзт цæуынц, уый. Бабæрæг ма кæндзысты, поликлиникæ кусджытæй, алыгъуызон дзаумæт-тæ æмæ кусæнгæрзтæй куыд ифтонг у, уый дæр. Æркæсдзысты фадыгон дохтырты куыст æмæ уавæртæм дæр, сæ хъус ма æрдардзысты поликлиникæйы финансон æмæ материалон фарстыты цы згъуыдтæ ис, уыдонмæ дæр.
Басгæрсты рæстæджы ныхас цыдис, зæгъгæ, республикон рынчындоны сывæллæтты хайады цы сабитæ вæййынц, бирæ хатт дзы бынат дæр нал вæййы - уыдоны фылдæр хаймæ нæ вæййы æрвитæн гæххæтт. Сæ хъомылгæнджытæ сæ бакæнынц сывæллæтты поликлиникæйы иувæрсты. Басгæрсты хайадисджытæ, стæй сывæллæтты поликлиникæйы дохтыртæ дæр банысан кодтой, зæгъгæ, цæмæй республикон рынчындоны сывæллæтты хайад фæуæгъд, фæсæрибардæр уа, гъæдджын куыстытæн дзы уа хуыздæр уавæртæ æмæ гæнæнтæ, уый тыххæй алы хъомылгæнæг дзы дæр хъуамæ зона: сывæллон йæхи æвзæр куы фæхата, науæд хъомылгæнæгæй мæгуырауæй исты куы фæхата, уæд, фыццаджыдæр, бацæуын хъæуы Цхинвалы сывæллæтты поликлиникæмæ.

Скъуыддзаг дæр уыдон хъуамæ акæной, сывæллонæн стационарон уавæрты хъæуы хос кæнын æви хæдзарон уавæрты. Бирæтæ та æнæ исты аххосагæй дæр сæ сабиты бакæнынц рынчындонмæ. Кæд нæ фæхъæуы саби рынчындоны схуыссын кæнын, уæддæр йæ хъомылгæнджытæ фæдомынц, цæмæй йæ схуыссын кæной. Дохтыртæ сæм куы нæ фæхъусынц, уæд дзы хъаугъатæ дæр рауайы, иутæ та хицæуттæ æмæ зон-гæтæ агурынмæ фæвæййынц æмæ саби æнæхъуаджы свæййы рынчындоны пациент, байсы кæйдæр, стационарон хос кæмæн фæхъæуы, ахæм рынчын сабийы бынат.
Бæрнон кусджытæ куыд банысан кодтой, афтæмæй сывæллæтты поликлиникæйы цы цухдзинæдтæ æмæ хатдзæгтæ рафæлгъауой, уыдоны тыххæй бацæттæ кæндзысты хъæуæг документтæ æмæ сæ бавдисдзысты æнæниздзинад хъахъхъæныны министрадмæ, уыдон сыл ноджыдæр бакусдзысты, сæ бон цы уа, уый рараст æрцæудзæнис, рараст цы цухдзинæдтæ не 'рцæуа, уыдоны тыххæй та сæ домæн бавдисдзысты хицауады разамындмæ.
ГÆЗЗАТЫ Иван