Nog adres

Кæнынц цалцæггæнæн куыстытæ

Доны ахадындзинад стыр у адæмон хæдзарады æппæт къабæзты дæр. Æвæццæгæн, æрвылбон дæр адæймаджы цæст кæй уыны, уымæн уый бæрц нысаниуæг нал фæдæтты, стæй йæ фæсауæрц кæныныл дæр тынг нал фæархайы, нæхæдæг дæр æм куыдфæндыйы цæстæй фæкæсæм. Уæддæр хорз, æмæ нæ республикæйы Хицауады хъусдарды фæрцы хъæуты цæрджытæ фæстаг рæстæджы хуыздæр ифтонг цæуынц нуазыны донæй. Уыдон нымæцмæ хауы Цхинвалы районы Къостайыхъæу дæр. Зæгъын хъæуы уый, æмæ ацы хъæуы цæрджыты æнусон бæллиц цалдæр азы размæ бындуронæй скъуыддзаг æрцыд æмæ æмбæстæгтæ тынг нал тыхсынц. Фæлæ алы хъуыддагмæ дæр рæстæгæй рæстæгмæ хъæуы хъус дарын, цæмæй æнæкъуылымпыйæ æххæст кæна йæ архайд. Хъыгагæн, иуæй-иу бынæтты дон нал цыд фагбæрцæй æмæ уый аххосæй иуæй-иу æмбæстæгтæ æвзæрстой зындзинæдтæ. Цæрджыты рæстаг домæн бахынцыдта районы цæрæнуатон-коммуналон хæдзарады управлени æмæ ам ныр цалдæр боны кæнынц цалцæггæнæн куыстытæ.

Ногæй хъуамæ иуæй-иу рæтты раивой зæронд хæтæлтæ, йæ иумиаг дæрд-дзæг уыдзæн 1500 метры. Скъолайы бæстыхаймæ цы доны хахх цæуы, уымæ ма ноджы æндæрæрдыгæй бауадздзысты сæй-раг хахх æмæ уый фæстæ донæй ифтонг цæудзæн хуыздæр. Цæрæнуатон-коммуналон хæдзарады управленийы инженер Хуыбиаты Ахмæт куыд загъта, афтæмæй ма, раздæримæ абаргæйæ, донæй ифтонг кæныны уавæр фæхуыздæр уыдзæн æндæр уынгты цæрджытæм дæр. Куыстытæ æххæст кæныныл хъаруджынæй кусынц техникæйыл кусджытæ Плиты Маир æмæ Козаты Алан.
ХУЫБИАТЫ Н.