Nog adres

Цæгат Ирыстоны

Адæмы домæнтæн аргъ кæнын хъæуы
Дзæуджыхъæуы завод «Электроцинк»-ы ныхмæ бирæ митингтæ æмæ протесттæн, æппынфæстаг, разынд сæ фæстиуæг. Æрæджы горæты центры скуыста, уæлдæфы сыгъдæгдзинад чи бæрæг кæны, ахæм аппарат-станцæ. Уый æппынæдзух бæрæг кæндзæн уæлдæфы сыгъдæгдзинады къæпхæн. Маниторыл нымæц иуæй уæлæмæ куы нæ уа, уæд нысан кæны уæлдæфы сыгъдæгдзинад нормæйыл кæй у, иуæй фæфылдæр, уæд уæлдæф чъизи у. Уыцы бæрæггæнæнтæ цæудзысты Роспотребнадзормæ.
Фæлæ, цæрджыты хъуыдымæ гæсгæ, уый фаг нæу, хъæуы бæлвырддæр мадзæлттæ аразын. Активисттæ куыд зæгъынц, афтæмæй ахæм станцæ кæронмæ не 'ххæст кæны экологон домæнтæ. Уый æрмæстдæр бæрæг кæны газ æмæ рыгы хауæдздзæгтæ, фæлæ нæ бæлвырд кæны, «Электроцинк» кæй раппары, уыцы æфсæйнаджы рыгтæ, кæцытæ адæмыл æфтауынц алыхуызон низтæ.
Куыд зонæм, афтæмæй адæмы бирæ домæнты бындурыл 2010 азы Роспотребнадзор бафыста бадзырд заводы разамындимæ æрдз бахъахъ-хъæныны фæдыл мадзæлттæ саразыныл. Бадзырды пункттæй иу у уæлдæрамынд станцæ сæвæрын дæр.
Гом Акционерон æхсæнад «Электроцинк» хауы Уралы Хæххон металлургион компанийы скондмæ. Уадзы цинк, зды, кадмий æмæ сондоны туагад. Кæд республикæйæн чысыл пайда нæ хæссы, куыстæй сифтонг кодта æртæ мины бæрц адæймаджы, уæддæр йæ зиан фылдæр у. Адæймагæн æнæниздзинадæй зынаргъдæр ницы ис æмæ йæ хъахъхъæнын хъæуы.
Митингтæ цæуынц дарддæр. Цæрджытæ Роспотребнадзорæй домынц, цæмæй сæ бадзырды пункттæ сæххæст кæнын бадомой æмæ экологон экспертизæ саразой. Заводы разамындæй та курынц, цæмæй куыстуаты алыварс километр дæрддзæгæн санитарон-хъахъхъæнæн зонæ, стæй бирæ æндæр сыгъдæггæнæн фæрæзтæ саразой.

Горæты рæзтæн
Фæстаг рæстæг бындуронæй æрæ лифтытæ лифтытæ ивыны куыстытæм. Дзæуджыхъæуы цы 820 лифты ис, уыдонæй 696 дзуапп нал дæттой абоны домæнтæн,тас сæ уыд фыдбылыз æрцæуынæй. Иуты дзы хъуыд бынтондæр аппарын, иннæты сцалцæг кæнын. Ныр уавæр йæ бынатæй фенкъуыст. Дыууæ азы размæ цы федералон программæ æрцыд арæзт «Капитальный ремонт многоквартирных домов Владикавказа», уымæн йæ пункттæй иу у лифты хæдзарады рацарæзт дæр. Лифты куысты æмгъуыд 25 азы йеддæмæ кæд нæу, уæддæр сæ фылдæр уыцы æмгъуыдæй раджы ахызт. Уыцы куыстытæн федералон бюджетæй цы 20 милуан сомы рахицæн кодтой, уыдонмæ ма бынæттон бюджетæй бафтыдтой фараст милуаны, æхцайы фондз проценты та бафтыдтой цæрджытæ сæхæдæг. Пъланмæ хаст куыстытæн сæ фылдæр конд фæцис. Ныр бирæуæладзыгон хæдзæрттæй бирæты ис нырыккон домæнтæн æппæтæй дæр дзуапп чи дæтты, ахæм лифтытæ, сæ фылдæр авгæй конд. Удæнцой лифттæн сæ электроникæ кусы æнæкъуылым-пыйæ, цæуынц лæгъз, æнæхъинцъæй. Цас æмбæлы, уымæй фылдæр ыл уæз куы 'рынцайа, уæд йæ бынатæй нæ анкъуысдзæн. Ныртæккæ ма чи кусы, уыцы зæронд лифтытæй 85 сты чи раивинаг, чи цалцæг кæнинаг.
Æхцайы фæрæзтæ куыд амоной, афтæ æххæстгонд цæудзысты уыцы куыстытæ дæр.
Йæ тыхы бацыд иннæ ног программæ дæр «Модернизация сетей уличного освещения г.Владикавказа на 2010-2012 год».
Нырмæ дæр горæты уынгтæн се 'ппæты дæр кæд рухсгæнæн фæрæзтæ уыд,уæддæр ивд цæ-уынц ногтæй. Æмткæй аивта рухсгæнæн системæ дæр. Рагæй цы цырæгътæй пайда кæнæм, уыдоны раивдзысты натрийы цырæгътæ. Ахæм-тæ кусынц цалдæр азы, электрон тых та хардз кæнынц хæрз чысыл. Уыимæ рухсытæ арæзт æрцæудзæн фæсфæд рæтты дæр, стæй скъолаты, муниципалон объектты. Факттæ куыд амонынц, афтæмæй фыдракæндтæн сæ фылдæр арæзт æрцæуы талынг бынæтты. Ныр изæрыгон дæр рухс,райдзаст уынгты адæм цæудзысты æдæрс-гæйæ. Ныридæгæн уал æххæстгонд æрцыд программæйы иу хай. Уынгтæ æмæ æндæр бы-нæттæй фæндзайæ фылдæр ифтонг æрцыдысты нырыккон рухсгæнæн фæрæзтæй.
Куыстытæ кæронмæ куы ахæццæ уой,уæд аив, хæрзарæзт горæты фæлгонц рæвдаудзæн адæмы цæст.

Нæ сабиты фидæн - ахуырад
Фæстаг азты ахуырады программæтæм цы ногдзинæдтæ хаст æрцыд, уый руаджы республикæйы скъолатæ ифтонг æрцыдысты алыхуызон ахуыргæнæн техникæ æмæ цæстуынгæ æрмæджытæй. Уæрæсейы хицауады сæрдар Владимир Путин царды кæй рауагъта,уыцы программæйæн стыр ахадындзинад ис. Уыцы проект кæронмæ æххæст куы 'рцæуа, уæд Уæрæсейы ахуырады системæ дунейы раззагдæрты æмрæнхъ æрлæудзæн нырыккон домæнтыл æнцайгæйæ. Ахуыргæнæн уагдæтты бындуронæй фæхуыздæр уыдзæн материалон-техникон базæ, фæфылдæр уыдзæн ахуыр-гæнджыты мызд. Цæгат Ирыстоны Ахуырады министрады специалистты хъуыдымæ гæсгæ, фыццаджыдæр æркæсын хъæуы Иунæг паддзахадон фæл-варæнмæ,цæмæй алыхуызон æнæрастдзинæдтæ ма уа. Уый феххуыс уыдзæн республикæйы курдиатджын фæсивæдæн, цæмæй сæ зонындзинæдтæ равдисой бæстæйы хуыздæр ахуыр-гæнæндæтты. Программæйы стыр æргом здæхт цæуы профессионалон ахуырады къабазмæ дæр. Куыд зонæм, афтæмæй нæ фаг кæнынц квалификацион кусджытæ æмæ специалисттæ.
Путины программæмæ гæсгæ, профтехахуырады æмвæзад афтæ бæрзонд хъæуы сисын æмæ йæм конкурс куыд уа. Уымæн æмæ нæ царды бындур фылдæр кусæг кадртæй аразгæ у.
Джусойты Нинæ